Ramil Orucov: Avropa İttifaqı Azərbaycanın irəli sürdüyü qlobal miqyaslı təşəbbüsləri dəstəkləyir

Bakı:

22 °C

57 %

1 m/s

AZ RU EN

Ana səhifə / YAP xəbərləri / Ramil Orucov: Avropa İttifaqı Azərbaycanın irəli sürdüyü qlobal miqyaslı təşəbbüsləri dəstəkləyir

Ramil Orucov: Avropa İttifaqı Azərbaycanın irəli sürdüyü qlobal miqyaslı təşəbbüsləri dəstəkləyir

21.07.2022 [10:33]

İyulun 18-də Avropa Komissiyasının Prezidenti xanım Ursula Fon der Lyayenin Azərbaycana səfəri, Prezident cənab İlham Əliyevlə keçirilən görüşü, Azərbaycan ilə Avropa İttifaqı arasında enerji sahəsində Strateji Tərəfdaşlığa dair Anlaşma Memorandumunun imzalanması bir daha nümayiş etdirdi ki, ölkəmiz qlobal məkanda strateji əhəmiyyətli dövlət kimi tanınıb.

Bunu acıqlamasında YAP Gəncə şəhər təşkilatının sədri Ramil Orucov bildirib. O qeyd edib ki, müstəqil ölkəmiz Prezident cənab İlham Əliyevin həyata keçirdiyi müstəqil siyasət, milli maraqlara əsaslanan uğurlu diplomatiya sayəsində Avropa İttifaqı dövlətləri ilə əməkdaşlıqda yeni mərhələyə qədəm qoyub. Qarşılıqlı maraqlar əsasında inkişaf edən Azərbaycan-Avropa İttifaqı münasibətləri enerji sahəsində strateji tərəfdaşlığa dair Anlaşma Memorandumunun imzalanması ilə davam edib. Əslində bu Avropa İttifaqı ilə Azərbaycan arasında imzalanan ilk sənəd deyil. 2006-cı ildə Anlaşma Memorandumunu və 2011-ci ildə Cənub Qaz Dəhlizi ilə bağlı Birgə Bəyannaməni imzalamışdır. Bu da Azərbaycan Avropanın enerji təhlükəsizliyi və təchizatının şaxələndirilməsi üçün mühüm əhəmiyyət kəsb edir.

Azərbaycanla Avropa İttifaqı arasında imzalanan enerji sahəsində Strateji Tərəfdaşlığa dair yeni Anlaşma Memorandumu dövlətlərarası münasibətlərin daha da inkişaf etməsində mühüm rol oynayacaq.

Azərbaycanın xarici siyasətinin əsas prioritetlərindən biri, təbii ki, Avropa İttifaqı ilə tərəfdaşlıqdır. Ölkə Prezidenti cənab İlham Əliyev yeni imzalanan Anlaşma Memorandumunu gələcək üçün bir növ yol xəritəsi adlandırdı və bəyan etdi ki, Azərbaycanın başlatdığı və Avropa İttifaqının, o cümlədən tərəfdaşlarımızın dəstəklədiyi enerji layihələri Avropanın enerji xəritəsini tamamilə dəyişir. Biz neft hasilatı ilə başladıq. Sonra qaz hasilatına keçdik. Xəzər dənizini Qara dəniz və Aralıq dənizi ilə birləşdirən neft kəmərini çəkdik. Əlbəttə ki, 3500 kilometr uzunluğu olan Cənub Qaz Dəhlizi boru kəməri sistemlərini inteqrasiya etdi və bununla təbii qazımız Avropa qitəsinə çatdırılır. İki ildən az müddətdə Cənub Qaz Dəhlizi tam gücü ilə işləyir. Bütün seqmentlər istismar olunur. Biz bu əməkdaşlığın müsbət faydasını artıq görürük. Enerji təhlükəsizliyi məsələləri bu gün heç zaman olmadığı qədər vacibdir. Azərbaycan ilə Avropa İttifaqı arasında enerji sahəsində uzunmüddətli, proqnozlaşdırılan və çox etibarlı əməkdaşlıq təbii ki, böyük nailiyyətdir.

Ölkəmiz ilə Avropa İttifaqı arasında bir çox sahələri əhatə edən, o cümlədən neft, qaz və bərpaolunan enerji mənbələrini, hidrogeni, enerji səmərəliliyini və digər məsələləri nəzərdə tutan enerji dialoqu start götürüb. Azərbaycanda bərpaolunan enerjinin istehsalına, külək və Günəş enerjisinə artıq sərmayə qoyulur. Qarabağın və Şərqi Zəngəzurun azad olunmuş ərazilərində Günəş və külək enerjisinin potensialı 9200 meqavat olan nəhəng resurs ehtiyatlarımız, Azərbaycanın geostrateji mövqeyi Avropa İttifaqına üzv dövlətlərin də ölkəmizlə siyasi və iqtisadi münasibətləri inkişaf etdirməyə marağını artırır.

Bütün bunlar bir daha təsdiq edir ki, Avropa İttifaqı Azərbaycanın irəli sürdüyü qlobal miqyaslı təşəbbüsləri dəstəkləyir və ölkəmizi regional güc kimi qəbul edir.

Paylaş:

Baxılıb: 608 dəfə