Azərbaycan Ermənistanı döyüş meydanında məğlubiyyətə uğratdı və tarixi ədaləti bərpa etdi

AZ RU EN

Ana səhifə / YAP xəbərləri / Azərbaycan Ermənistanı döyüş meydanında məğlubiyyətə uğratdı və tarixi ədaləti bərpa etdi

Azərbaycan Ermənistanı döyüş meydanında məğlubiyyətə uğratdı və tarixi ədaləti bərpa etdi

09.11.2023 [13:42]

Prezident İlham Əliyev: «23 saat ərzində Azərbaycanın özünün suverenliyini və konstitusiya quruluşunu tam bərpa etdi»

Noyabrın 3-də Astanada Türk Dövlətləri Təşkilatının «Türk Əsri» çağırışı altında 10-cu yubiley Zirvə görüşü keçirilib. Azərbaycan Respublikasının Prezidenti İlham Əliyev tədbirdə iştirak edib. Prezident Kasım-Jomart Tokayev Prezident İlham Əliyevi və Azərbaycan xalqını ölkəmizin ərazi bütövlüyünün bərpası münasibətilə təbrik edib. Dövlətimizin başçısı Zirvə görüşündə çıxış edib. Türk dövlətləri ilə münasibətlərin möhkəmləndirilməsinin Azərbaycanın xarici siyasətinin əsas prioritetlərindən biri olduğunu deyən ölkə başçısı bildirib ki, etnik və mədəni köklərimiz, dilimiz, ortaq keçmişimiz münasibətlərimizin təməlini təşkil edir. Bu gün dünyanın müxtəlif bölgələrində beynəlxalq hüquq normalarının kobudcasına pozulduğunu diqqətə çatdıran Prezident İlham Əliyev qeyd edib ki, müharibələrin, qanlı münaqişələrin alovlandığı bir dövrdə, ilk növbədə, ölkələrin müdafiə potensialı təhlükəsizliyin əsas zəmanətinə çevrilir.

30 ilə yaxın müddət ərzində Ermənistanın Azərbaycan torpaqlarını işğal altında saxladığını və burada qeyri-qanuni qondarma rejim yaratdığını vurğulayan ölkə başçısı Ermənistan tərəfindən həyata keçirilmiş etnik təmizləmə nəticəsində bir milyondan artıq azərbaycanlının öz dədə-baba yurdlarından qovulduğunu diqqətə çatdırıb: «Ermənistan şəhər və kəndlərimizi yerlə-yeksan etmiş, tarixi və dini abidələrimizi dağıtmış və təhqir etmişdir. Bütün bu illər ərzində Azərbaycan münaqişəni sülh yolu ilə həll etməyə çalışırdı. Lakin Ermənistanın məqsədi işğala əsaslanan status-kvonu möhkəmləndirmək idi. Ermənistanın baş nazirinin 2019-cu ildə o vaxt işğal altındakı Xankəndi şəhərində “Qarabağ Ermənistandır və nöqtə” açıqlaması danışıqlara son qoydu. Ermənistan rəhbərliyi o vaxt Azərbaycanı “yeni torpaqlar uğrunda yeni müharibə” ilə hədələyirdi».

Prezident İlham Əliyev çıxışını davam etdirərək bildirib ki, 2020-ci ildə Ermənistan rəhbərliyinin təxribat xarakterli hərəkətləri və bəyanatları, o cümlədən hərbi təxribatları İkinci Qarabağ müharibəsini qaçılmaz etdi. Ölkəmizin başçısı əlavə edib ki, 2020-ci ildə 44 günlük Vətən müharibəsində Azərbaycan BMT Nizamnaməsinin 51-ci maddəsinə uyğun olaraq, özünümüdafiə hüququndan istifadə edərək Ermənistanı döyüş meydanında məğlubiyyətə uğratdı və ərazi bütövlüyünü və tarixi ədaləti bərpa etdi: «BMT Təhlükəsizlik Şurasının Ermənistan silahlı qüvvələrinin Azərbaycanın işğal olunmuş ərazilərindən çıxarılmasını tələb edən və 27 il kağız üzərində qalmış 4 qətnaməsinin icrasını özümüz təmin etdik. Cəmi 44 gün ərzində davam edən İkinci Qarabağ müharibəsi 10 noyabr 2020-ci il tarixində Ermənistanın kapitulyasiya aktını imzalaması ilə nəticələnmişdir».

Ölkəmizin başçısı onu da diqqətə çatdırıb ki, Ermənistanın ölkəmizə qarşı işğalçılıq və etnik təmizləmə siyasətinə baxmayaraq, məhz Azərbaycan Ermənistanla sülh sazişi imzalamağa hazır olduğunu bəyan eərək beş baza prinsipini təqdim edib.

Prezident İlham Əliyev 2023-cü il sentyabrın 19-da işğaldan azad edilmiş torpaqlarımızda qanunsuz erməni silahlı birləşmələri tərəfindən qəsdən yerləşdirilmiş minaların partlaması nəticəsində 6 mülki şəxsin və polis əməkdaşının həlak olduğunu, bundan sonra Azərbaycanın konstitusiya quruluşunun bərpası və qanunsuz hərbi birləşmələrin zərərsizləşdirilməsi məqsədilə lokal xarakterli antiterror tədbirləri həyata keçirdiyini bildirib. Ölkə başçısı 23 saat ərzində bitən əməliyyat nəticəsində Azərbaycanın özünün suverenliyini və konstitusiya quruluşunu tam bərpa etdiyini diqqətə çatdırıb.

Çıxışının sonunda Füzuli şəhərində inşası başa çatmış məktəbə görə Özbəkistan Prezidenti Şavkat Mirziyoyevə minnətdarlığımı bildirirən Prezident İlham Əliyev bunları Azərbaycan və Özbəkistan, Azərbaycan və Qazaxıstan xalqları arasında olan dostluğun və qardaşlığın təzahürü kimi ifadə edib.

Təhmasib Rüstəmov

YAP Qubadlı Rayon Təşkilatının sədri

Paylaş:

Baxılıb: 275 dəfə