Sabiq diplomat Vəhdət Sultanzadə vəfat edib

Bakı:

13 °C

76 %

5 m/s

Əlaqə

AZ RU EN

Ana səhifə / Xəbər lenti / Sabiq diplomat Vəhdət Sultanzadə vəfat edib

Sabiq diplomat Vəhdət Sultanzadə vəfat edib

28.03.2022 [10:29]

Sabiq diplomat Vəhdət Sultanzadə vəfat edib.

Bunu APA-ya açıqlamasında Vəhdət Sultanzadənin qızı Firuzə Sultanzadə deyib.

Onun sözlərinə görə, atası bu gün 13:30-da II Fəxri Xiyabanda dəfn olunacaq.

Vəhdət Məmmədağa oğlu Sultanzadə 1935-ci il oktyabrın 14-də Bakı şəhərində anadan olub. Orta təhsilini Bakıda 6 saylı məktəbdə alıb. Azərbaycan Dövlət Universitetində Şərqşünaslıq fakültəsinin məzunu olub.

1962-1966-ci illərdə SSRİ-nin Əfqanıstan İslam Respublikasındakı nümayəndəliyində tərcüməçi kimi çalışıb. 1970-1980-ci illərdə səfirlikdə müxtəlif vəzifələr tutub. SSRİ-nin İran İslam Respublikasındakı konsulu olub. 1-ci dərəcəli Müşavir diplomatik dərəcəsini alıb.

1988-1991-ci illərdə SSRİ-nin Türkiyə Respublikasındakı konsulu olub. 1991-1993-ci illərdə Rusiyanın Türkiyə Respublikasındakı konsulu kimi fəaliyyət göstərib.

1992-ci ildə Azərbaycanın İƏT-ə daxil olmasını təşkil edib. Bakı-İstanbul marşrutu ilə ilk turist reysini təşkil edib.

1994-cü ildə İƏT-ə üzv ölkələrin Kasablanka şəhərində (Mərakeş Krallığı) zirvə görüşünün təşkilində, hazırlanmasında və keçirilməsində iştirak edib. Vəhdət Sultanzadənin səyləri nəticəsində bu zirvə görüşündə İƏT-in qəbul etdiyi qətnamədə Ermənistan ilk dəfə olaraq Azərbaycana qarşı təcavüzkar kimi qəbul edilib.

1997-ci ildə İƏT-ə üzv ölkələrin Tehran şəhərində (İran İslam Respublikası) zirvə görüşünün təşkilində, hazırlanmasında və keçirilməsində iştirak edib.

2006 -2010-ci illərdə Azərbaycan Respublikasının Türkmənistandakı səfirliyində müşavir kimi fəaliyyət göstərib.
“Qardaşlıq münasibətlərinin inkişafına verdiyi töhfəyə görə” Türkmənistanın dövlət mükafatına – “Vatana bolan söýgüsi üçin” (“Vətənə sevgisinə görə”) medalı ilə təltif edilib.
2010-2015-ci illər aralığında Azərbaycan Respublikasının Türkmənistanda fövqəladə və səlahiyyətli səfiri vəzifəsini tutub. O, Xəzər dənizində Azərbaycan-Türkmənistan “Dostluq” karbohidrogen yatağının istismarı layihəsinin birinci mərhələsində fəal iştirak edib.

2015-ci ildə Azərbaycan Respublikasının Türkmənistanda fövqəladə və səlahiyyətli səfiri olmaqla yanaşı Azərbaycan Respublikasının Əfqanıstan İslam Respublikasında fövqəladə və səlahiyyətli səfiri olub.

Yaxın Şərqin diplomatiyası, tarixi, mədəniyyəti və ədəbiyyatı haqqında silsilə məqalələrin və kitabların (“Diplomatik protokolun praktiki məsələləri”, “Nizaminin hikmət və nəsihətləri” adlı 2 nəşr, 5 cildlik “Heydər Əliyev və Şərq” əsərinin həmmüəllifi) müəllifidir. Sakıp Sabancının “Dəyişən və yüksələn Türkiyə” kitabını Azərbaycan dilində hazırlayıb və nəşr edib, fars dilində “Heydər Əliyev və İran” adlı kitab nəşr edib.

Paylaş:

Baxılıb: 871 dəfə