Milli Məclisin sədri Macarıstan Prezidenti Katalin Novak ilə görüşüb

Bakı:

25 °C

57 %

3 m/s

Əlaqə

AZ RU EN

Ana səhifə / Xəbər lenti / Milli Məclisin sədri Macarıstan Prezidenti Katalin Novak ilə görüşüb

Milli Məclisin sədri Macarıstan Prezidenti Katalin Novak ilə görüşüb

14.09.2023 [22:01]

Milli Məclisin sədri Sahibə Qafarova sentyabrın 14-də Macarıstan Prezidenti Katalin Novak ilə görüşüb.

Milli Məclisin Mətbuat və ictimaiyyətlə əlaqələr şöbəsindən AZƏRTAC-a bildiriblər ki, görüşdə Katalin Novak ailə dəyərlərinə böyük önəm verən Macarıstanın təşəbbüsü ilə keçirilən 5-ci Budapeşt Demoqrafik Sammitində Azərbaycanın iştirakının mühüm əhəmiyyət kəsb etdiyini vurğulayıb.

Ölkələrimiz arasında münasibətlərin yüksək səviyyədə olduğunu bildirən Katalin Novak qarşılıqlı səfərlərin bu əlaqələrin daha da inkişafına təkan verdiyini diqqətə çatdırıb. O, ölkələrimizin müxtəlif istiqamətlərdə uğurlu əməkdaşlığını qeyd edib.

Prezident Novak xalqımızın zəngin milli-mənəvi dəyərlərə malik olduğunu vurğulayaraq qeyd edib ki, macar xalqı kimi, Azərbaycan xalqı da ailə dəyərlərinə çox böyük önəm verir.

Milli Məclisin sədri Sahibə Qafarova Azərbaycan Prezidenti İlham Əliyevin salamlarını Macarıstan Prezidentinə çatdırıb.

Sammitin çox mühüm beynəlxalq forum olduğunu bildirən S.Qafarova əlavə edib ki, Azərbaycan Macarıstanın cəmiyyətin əsas vahidi kimi ailələri qorumaq və dəstəkləmək səylərini yüksək qiymətləndirir.

Milli Məclisin sədri həm dövlət başçısının, həm də Baş nazir Viktor Orbanın ailə dəyərləri haqqında fikirlərinə toxunaraq bildirib ki, Azərbaycanın və Macarıstanın bu mövzuda mövqeləri üst-üstə düşür, bu məsələlərdə birlikdə fəaliyyət göstərmək vacibdir. “Ailə dəyərləri Azərbaycan cəmiyyəti üçün çox önəmlidir və dövlətin himayəsindədir. Azərbaycan və Macarıstanın dövlət başçıları arasında ailə dəyərlərinin qorunması sahəsində beynəlxalq əməkdaşlığın inkişafı barədə fikir mübadiləsi aparıldığı da xatırlanıb. Görüşdə diqqətə çatdırılıb ki, Azərbaycan və macar xalqları oxşar ailə dəyərlərini bölüşür”, - deyə o qeyd edib.

Görüşdə, həmçinin ölkələrimiz arasında əməkdaşlıq gündəliyinin kifayət qədər zəngin olduğu ifadə olunub. Vurğulanıb ki, ölkələrimiz arasında iqtisadi, enerji, nəqliyyat, kənd təsərrüfatı, turizm, təhsil və digər sahələrdə fəal əməkdaşlıq mövcuddur. Sahibə Qafarova ölkələrimiz arasında strateji tərəfdaşlıq və dostluq əlaqələrinin inkişaf etdiyini bildirib. Eyni zamanda, qeyd olunub ki, parlamentlərimiz bir çox beynəlxalq parlament təşkilatları çərçivəsində yaxşı səviyyədə əməkdaşlıq edir.

Görüşdə qarşılıqlı maraq doğuran digər məsələlər ətrafında da fikir mübadiləsi aparılıb.

Paylaş:

Baxılıb: 618 dəfə