Bu gün Ümumdünya Ürək Günüdür

Bakı:

15 °C

88 %

8 m/s

Əlaqə

AZ RU EN

Ana səhifə / Xəbər lenti / Bu gün Ümumdünya Ürək Günüdür

Bu gün Ümumdünya Ürək Günüdür

29.09.2023 [12:00]

Günel

Ürək insanın ən zərif və ən zəhmətkeş daxili orqanıdır. Onunla dünyanı tanıyır, gözəllikləri hiss edir, həyatdan zövq alırıq. Lakin biz çox vaxt ürəyimizə lazımi diqqət və qayğı göstərmir, bəzən çox laqeyd yanaşırıq, yalnız ciddi problemlər yarananda sağlamlığımızı düşünürük. Bəlkə də elə buna görədir ki, bu gün ürək-damar sistemi xəstəliklərindən ölüm halları bu qədər çox yayılıb. Bütün dünya kardioloqları ürəyə dəyər verməyə, onun qayğısına qalmağa, onun fasiləsiz işini pis vərdişlərlə pozmamağa çağırır.

Bu gün Dünya Ürək Günüdür. Həmin gün ilk dəfə 1999-cu ildə Ümumdünya Ürək Federasiyasının təşəbbüsü ilə qeyd edilib. Ümumdünya Səhiyyə Təşkilatı, UNESKO və digər aparıcı təşkilatlar həmin təşəbbüsü dəstəkləyiblər. 2011-ci ildən etibarən dünyanın bir çox ölkələrində, o cümlədən Azərbaycanda hər il sentyabrın 29-u Dünya Ürək Günü kimi qeyd edilir.

Dünya Ürək Günü qlobal sağlamlıq kampaniyasıdır. Onun əsas vəzifəsi ürək-damar xəstəlikləri, onların səbəbləri və aradan qaldırılması yolları haqqında insanların maarifləndirilməsi, bu xəstəliklərin qarşısının alınması istiqamətində vacib profilaktik tədbirlərin həyata keçirilməsidir.

Ürək-damar xəstəlikləri hər il 18 milyondan çox insanın həyatına son qoyur. Ümumdünya Səhiyyə Təşkilatının proqnozuna görə, bu göstərici 2030-cu ildə 23 milyonu ötəcək. Həmin təşkilatın 2022-ci ildə yaydığı məlumata görə, insult və ürəyin işemik xəstəliyi dünya üzrə bütün ölümlərin 31%-ni təşkil edir. Ürək-damar xəstəliklərindən əziyyət çəkənlərin sayının ildən-ilə artması bir sıra sosial faktorlar, ətraf mühitin təsiri, ekoloji amillər, düzgün qidalanmamaq, artıq çəki, piylənmə, oturaq həyat tərzi və son illər artan psixi-emosional gərginliklə əlaqədardır.

Həmçinin, Ümumdünya Səhiyyə Təşkilatının məlumatına görə, infarkt və insult nəticəsində baş verən ölümlərin 80%-nin qarşısı sağlam qidalanma, pis vərdişlərin: siqaret və alkoqoldan istifadənin məhdudlaşdırılması, keyfiyyətli yuxu və fiziki aktivliyin artırılması ilə alına bilər.

Ürək “orqanizmin mühərriki”dir. Yaşadığımız bir ömür boyu o dayanmadan, fasiləsiz döyünərək bizə həyat bəxş edir. Ona görə də bu həyati vacib orqanı qorumalı, ona qayğı ilə yanaşmalıyıq. Bu işdə bizə yardımçı olacaq kardiocərrahları, kardioloqları və invaziv kardioloqları peşə bayramı - Dünya Ürək günü münasibətilə ürəkdən təbrik edir, onlara gələcək fəaliyyətlərində uğurlar diləyirik.

Paylaş:

Baxılıb: 422 dəfə