“Azərsu” ASC ilə AzMİU arasında əməkdaşlıq uğurla davam edir

Bakı:

21 °C

78 %

3 m/s

Əlaqə

AZ RU EN

Ana səhifə / Elm / “Azərsu” ASC ilə AzMİU arasında əməkdaşlıq uğurla davam edir

“Azərsu” ASC ilə AzMİU arasında əməkdaşlıq uğurla davam edir

18.02.2015 [11:20]

Memarlıq və İnşaat Universitetində su təchizatı problemləri üzrə elmi-tədqiqat və tədris laboratoriyasının açılışı olub
Fevralın 17-də Azərbaycan Memarlıq və İnşaat Universitetində (AzMİU) “Azərsu” Açıq Səhmdar Cəmiyyətinin (ASC) dəstəyi ilə yaradılmış Su təchizatı problemləri üzrə elmi-tədqiqat və tədris laboratoriyasının açılışı olub. Açılış mərasimində çıxış edən AzMİU-nun rektoru, professor, millət vəkili Gülçöhrə Məmmədova müasir laboratoriyanın yaradılmasını universitetin tarixində əlamətdar hadisə kimi qiymətləndirərək bunu “Azərsu” ASC ilə uğurlu əməkdaşlığın bariz nümunəsi olduğunu diqqətə çatdırıb.
Azərbaycan Respublikasında təhsilin inkişafı üzrə Dövlət Strategiyasının həyata keçirilməsi ilə bağlı Fəaliyyət Planında təhsil müəssisələrinin maddi-texniki bazasının yaxşılaşdırılmasının başlıca vəzifə olduğunu xatırladan rektor yeni yaradılmış laboratoriyanın təhsilin inkişafına töhfə verəcəyini diqqətə çatdırıb.
“Azərsu” ASC-nin Elm, texnika və xarici əlaqələr şöbəsinin rəisi Çingiz Abdullayev 2012-ci ildə AzMİU ilə “Azərsu” ASC arasında imzalanmış müqavilədən irəli gələn məsələlərin uğurla icra edildiyini xatırladıb. Qeyd olunub ki, ötən dövrdə “Azərsu” ASC və AzMİU-nun təşkilatçılığı ilə birgə tədbirlər keçirilib, universitetin tələbələri “Yay məktəbi”, istehsalat təcrübələrinə cəlb olunub, “Təqaüd Proqramı”nın imkanlarından faydalanıblar.
Sonra Su təchizatı problemləri üzrə elmi-tədqiqat və tədris laboratoriyasının açılışını bildirən rəmzi lent kəsilib. “Azərsu” ASC-nin Mərkəzi Laboratoriyasının müdiri Elşən Nəzərov yeni yaradılmış laboratoriya barədə ətraflı məlumat verərək bildirib ki, bu sahədə “Azərsu” ASC-nin Mərkəzi Laboratoriyasının təcrübəsi əsas götürülüb. Laboratoriyada Almaniya, ABŞ və digər ölkələrin beynəlxalq səviyyədə tanınmış şirkətlərinin avadanlıqları və cihazları quraşdırılıb. Bu cihaz və avadanlıqların köməyi ilə içməli su və tullantı sularının fiziki-kimyəvi göstəricilərini təyin etmək, operativ, dəqiq və etibarlı analizlər aparmaq mümkün olacaq. Hazırda laboratoriyada quraşdırılmış cihaz və avadanlıqlar içməli su və tullantı sularının 40-dək göstəricisini təyin etməyə imkan verir. “Azərsu” ASC-nin Mərkəzi Laboratoriyası tərəfindən kadr hazırlığı sahəsində müvafiq tədbirlər də həyata keçiriləcək.
Tədbirdə çıxış edən AzMİU-nun əməkdaşları professor Fəqan Əliyev, dosent Asif Kəngərli yeni yaradılan laboratoriyanın imkanlarından bəhs edərək bildiriblər ki, burada müəllimlərin elmi tədqiqat işləri aparması, tələbələrin isə tədqiqat prosesləri ilə əyani tanış olması üçün hər cür şərait var. Universitetin rəhbərliyi və müəllimlər Su təchizatı problemləri üzrə elmi-tədqiqat və tədris laboratoriyasının yaradılmasında göstərilən dəstəyə görə “Azərsu” ASC-nin rəhbərliyinə minnətdarlıqlarını bildiriblər.
NADİR

Paylaş:

Baxılıb: 2296 dəfə