İqor Korotçenko: Azərbaycan növbəti dəfə özünün siyasi sisteminin mükəmməlliyini və dayanıqlığını nümayiş etdirdi

Bakı:

23 °C

49 %

2 m/s

AZ RU EN

Ana səhifə / Siyasət / İqor Korotçenko: Azərbaycan növbəti dəfə özünün siyasi sisteminin mükəmməlliyini və dayanıqlığını nümayiş etdirdi

İqor Korotçenko: Azərbaycan növbəti dəfə özünün siyasi sisteminin mükəmməlliyini və dayanıqlığını nümayiş etdirdi

02.09.2024 [16:03]

Parlament seçkiləri ölkə qanunvericiliyinə tam uyğun şəkildə keçirilib və Azərbaycan xalqının iradəsini əks etdirib. Bu, Azərbaycanın bütün ərazisində baş tutmuş tarixi seçkilərdir.

AZƏRTAC xəbər verir ki, bunu sentyabrın 2-də növbədənkənar parlament seçkilərinin yekunlarına dair mətbuat konfransında Rusiyanın Siyasi Araşdırmalar İnstitutunun direktoru Sergey Markov deyib.

Onun sözlərinə görə, müşahidələrin nəticəsi kifayət qədər aydındır - seçkilər Azərbaycan qanunvericiliyinə tam uyğun şəkildə keçirilib, onları tam azad, demokratik, hüquqi, ədalətli və rəqabətli adlandırmaq olar.

“Onlar beynəlxalq təşkilatların son onilliklər ərzində müxtəlif növ seçkilərlə bağlı hazırlanmış tələblərinə tamamilə uyğundur və ən əsası, bu seçkilər Azərbaycan xalqının iradəsini tam şəkildə əks etdirir”, - deyən Markov əlavə edib ki, yeganə tövsiyə seçki məntəqələrində bütün namizədlərin əks olunduğu plakatların olmasının daha ciddi şəkildə təmin edilməsidir.

Rusiya Dövlət Dumasının deputatı Alla Polyakova deyib: “Mən 2021-ci ildən Dövlət Dumasının deputatıyam və əməkdaşlıq əlaqələrinin qurulduğu bəzi həmkarlarımın yenidən Azərbaycan parlamentinə deputat seçilməsindən məmnunam. Azərbaycanda dördüncü dəfədir seçkilərdə müşahidəçisi kimi iştirak edirəm və seçki prosesinin təşkilindən razıyam”.

Rusiyalı deputat diqqəti bir çox seçki məntəqələrinin məktəblərdə yerləşməsi faktına çəkib. O əlavə edib: “Əminik ki, Bakının bir çox məktəblərində rus bölməsi var. Ölkənin təhsil sisteminə rus dilinin öyrənilməsi də daxildir”.

A.Polyakova Rusiya Federasiyası ilə Azərbaycan Respublikası arasında parlamentlərarası dostluq qrupunun uğurlu fəaliyyətinin gələcəkdə də davam edəcəyinə əminliyini ifadə edib.

Rusiyalı müşahidəçi, Xəzər Strateji Araşdırmalar İnstitutunun baş direktoru İqor Korotçenko seçkilərin yekunu ilə bağlı deyib: “Dünən Bakı və onun ətraf rayonlarında 15-ə yaxın seçki məntəqəsinə baş çəkdik. Biz (müstəqil Rusiya müşahidəçiləri qrupu) seçki prosesinin aydın təşkilini, seçki komissiyası üzvlərinin yüksək hazırlıq səviyyəsini, seçkilərin qüsursuz təşkilini qeyd edə bilərik. Bu, dürüst, ədalətli, legitim və dünyada mövcud olan seçki texnologiyalarının bütün meyarlarına cavab verən səsvermə prosesi idi”.

İ.Korotçenko vurğulayıb ki, bu baxımdan Azərbaycan öz siyasi sisteminin mükəmməlliyini, sabitliyini bir daha nümayiş etdirdi: “Bir çox dövlətlərin sarsıldığı indiki təlatümlü dünyada Azərbaycan belə bir sabitlik, firavanlıq və irəliyə doğru inamla hərəkət edən bir adadır. Bunu bir daha təkrar edirəm, Azərbaycanın mövcud çağırışlara cavab verən və Prezidentin rəhbərliyi ilə Azərbaycan xalqının irəliyə doğru hərəkətinin əsasını təşkil edən siyasi sistemi böyük ölçüdə tərəqqini təmin edir”.

“Bir çox ölkələr, xüsusən də Qərb dövlətləri suveren dövlətlərdə ictimai-siyasi proseslərin inkişafını öz nəzarəti altına almağa çalışır. Bu baxımdan Azərbaycana təzyiq etmək əbəsdir. Fransa və digər dost olmayan ölkələr nə qədər səy göstərsələr də, mən tam əminəm ki, nəticə, o cümlədən sentyabrın 1-də keçirilən parlament seçkiləri Azərbaycanın istənilən xarici təsir amillərinə müqaviməti olacaq”, -deyə İ.Korotçenko qeyd edib.

Onun sözlərinə görə, Azərbaycan bu gün beynəlxalq ictimaiyyət tərəfindən tələb olunan qlobal tendensiyaları müəyyən edən ölkədir.

“Bu gün obyektiv olaraq Cənubi Qafqaz regionu ən mühüm geosiyasi və iqtisadi əhəmiyyət kəsb edir. Bu, dünyamızın gələcəyinin qəti şəkildə asılı olacağı bölgələrdən biridir. Rusiya Prezidenti Vladimir Putinin bu yaxınlarda Azərbaycana dövlət səfərini və Prezident İlham Əliyevlə apardığı danışıqları qeyd etmək çox vacibdir. Bütün bunlar o deməkdir ki, ölkələrimiz çiyin-çiyinə daha yaxşı gələcək qurur. Biz irimiqyaslı iqtisadi ticarət əməkdaşlığı layihələrini, enerji layihələrini həyata keçirəcəyik. Bu baxımdan, təbii ki, Rusiyanın ekspert icması və siyasi elitası Azərbaycanda parlament seçkilərinin uğurla keçirilməsini alqışlayır”, - deyə rusiyalı ekspert əlavə edib.

Korotçenko, həmçinin COP29-un Azərbaycanda ən yüksək səviyyədə keçiriləcəyinə əminliyini ifadə edib. O bildirib: “Noyabrın 11-dən 22-dək Bakı dünyanın mərkəzinə çevriləcək. Bu tədbir Azərbaycan dövlətinin gücünü, qüdrətini, Prezident İlham Əliyevin strateji vizyonunu bir daha nümayiş etdirəcək”.

Moskva Vilayət Dumasının deputatı, Ekologiya və təbii sərvətlər və mülkiyyət münasibətləri komitəsi sədrinin birinci müavini Aleksandr Roqov deyib: “Üçüncü dəfədir ki, müşahidəçi kimi seçkilərdə iştirak edirəm. Üstəlik, mən buraya forumlarda iştirak etmək üçün gəlmişəm. Azərbaycan bütün nümayəndə heyətləri üçün çox qonaqpərvər ölkədir. Qeyd etmək istərdim ki, səhər saatlarından səsvermə məntəqələrini gəzməyə başladıq, vətəndaşların əksəriyyəti səsverməyə gəlirdi. Seçkilər yüksək səviyyədə və qanunlar çərçivəsində, beynəlxalq standartlara uyğun keçirilib”.

Paylaş:

Baxılıb: 549 dəfə