Kütləvi İnformasiya Vasitələrinin İnkişafına Dövlət Dəstəyi Fondunun yeni təyin edilmiş Müşahidə Şurasının ilk iclası keçirilib

Bakı:

14 °C

82 %

1 m/s

AZ RU EN

Ana səhifə / Siyasət / Kütləvi İnformasiya Vasitələrinin İnkişafına Dövlət Dəstəyi Fondunun yeni təyin edilmiş Müşahidə Şurasının ilk iclası keçirilib

Kütləvi İnformasiya Vasitələrinin İnkişafına Dövlət Dəstəyi Fondunun yeni təyin edilmiş Müşahidə Şurasının ilk iclası keçirilib

13.06.2013 [01:03]

İyunun 12-də Azərbaycan Respublikasının Prezidenti yanında Kütləvi İnformasiya Vasitələrinin İnkişafına Dövlət Dəstəyi Fondunun yeni təyin edilmiş Müşahidə Şurasının ilk iclası keçirilib.
Fonddan AzərTAc-a bildiriblər ki, iclası açan Azərbaycan Respublikası Prezidenti Administrasiyasının İctimai-siyasi məsələlər şöbəsinin müdiri Əli Həsənov yeni təyinatla bağlı icraçı direktoru və Müşahidə Şurasının üzvlərini təbrik edib. Diqqətə çatdırıb ki, ötən dörd ildə Fond səmərəli fəaliyyət göstərib, “Azərbaycan Respublikasında kütləvi informasiya vasitələrinin inkişafına dövlət dəstəyi Konsepsiyası”nın qarşıya qoyduğu vəzifələrin yerinə yetirilməsi istiqamətində zəruri tədbirlər həyata keçirib.
Əli Həsənov diqqətə çatdırıb ki, Azərbaycan Prezidenti İlham Əliyevin göstərdiyi yüksək etimadı doğrultmaq, ölkəmizdə KİV-lərin müstəqilliyinin inkişaf etdirilməsi, mətbuatın maddi-texniki bazasının gücləndirilməsi və digər məsələlərin həlli məqsədilə həyata keçirilən dövlət siyasətinə əməli işlə daha böyük töhfələr vermək üçün Fondun kollektivi və Müşahidə Şurasının üzvləri bundan sonra da əzmlə çalışmalıdırlar.
Şöbə müdiri deyib: “Ötən dörd ildə Fondun fəaliyyətinin təşkili, KİV-lərə yardım mexanizminin formalaşdırılması, onun təkmilləşdirilməsi üçün zəruri tədbirlər görülmüşdür. Fondun maliyyə dəstəyi, reallaşdırdığı digər tədbirlər mətbuatın iqtisadi müstəqilliyini gücləndirmiş, onun problemlərinin həllinə müsbət təsir göstərmişdir. Fond məqsədyönlü fəaliyyəti ilə cəmiyyətdə və media arasında nüfuz qazanmışdır. İndiki mərhələdə isə artıq hazır mexanizmə, yetkin fəaliyyət proqramına əsaslanaraq Azərbaycan mediasının daha dərindən öyrənilməsi, onun ehtiyaclarının müəyyənləşdirilməsi və ödənilməsi üçün var qüvvənizlə çalışmalısınız”.
Özünə və Müşahidə Şurasının üzvlərinə göstərilən etimada görə dövlətimizin başçısına minnətdarlığını bildirən Fondun icraçı direktoru Vüqar Səfərli ötən dörd ildə qurumun fəaliyyətinin təşkili və mətbuata yardım məqsədilə həyata keçirilən tədbirlərdən danışıb, habelə gələcək planlar barədə məlumat verib.
Sonra Fondun Müşahidə Şurası sədrinin və onun müavininin seçilməsi məsələsi müzakirə edilib.
Təkliflər dinlənildikdən sonra Beynəlxalq Avrasiya Mətbuat Fondunun sədri Umud Mirzəyevin Fondun Müşahidə Şurasının sədri, “İki sahil” qəzetinin baş redaktoru Vüqar Rəhimzadənin isə sədr müavini seçilməsi təklifi səsə qoyulub və yekdilliklə qəbul edilib.
İclasda Azərbaycan Mətbuat Şurasının sədri Əflatun Amaşov, Beynəlxalq Avrasiya Mətbuat Fondunun sədri Umud Mirzəyev, “525-ci qəzet”in baş redaktoru Rəşad Məcid, “İki sahil” qəzetinin baş redaktoru Vüqar Rəhimzadə çıxış edərək Fondun gələcək fəaliyyəti barədə fikirlərini bölüşüblər.

Paylaş:

Baxılıb: 1208 dəfə