Azərbaycan Respublikasının Ali Məhkəməsi ilə Birləşmiş Ərəb Əmirliklərinin Dubay Məhkəmələri arasında əməkdaşlıq haqqında İşçi Proqramı imzalanıb

Bakı:

21 °C

83 %

0 m/s

AZ RU EN

Ana səhifə / Siyasət / Azərbaycan Respublikasının Ali Məhkəməsi ilə Birləşmiş Ərəb Əmirliklərinin Dubay Məhkəmələri arasında əməkdaşlıq haqqında İşçi Proqramı imzalanıb

Azərbaycan Respublikasının Ali Məhkəməsi ilə Birləşmiş Ərəb Əmirliklərinin Dubay Məhkəmələri arasında əməkdaşlıq haqqında İşçi Proqramı imzalanıb

18.09.2013 [09:34]

Birləşmiş Ərəb Əmirliklərinin Dubay Məhkəmələrinin baş direktoru Əhməd Səid bin Həzimin rəhbərlik etdiyi nümayəndə heyəti Azərbaycana səfəri çərçivəsində sentyabrın 17-də Azərbaycan Respublikasının Ali Məhkəməsində olub.
AzərTAc xəbər verir ki, qonaqlar Ali Məhkəmənin inzibati binasını gəzib, hakimlərin iş şəraiti ilə tanış olub, məhkəmə tarixi muzeyinə baxıblar.
Dubay Məhkəmələrinin baş direktoru muzeyin fəxri qonaqlar kitabına ürək sözlərini yazıb.
Sonra Birləşmiş Ərəb Əmirliklərinin Dubay Məhkəmələrinin baş direktoru Əhməd Səid bin Həzimin başçılıq etdiyi nümayəndə heyəti ilə Azərbaycan Respublikası Ali Məhkəməsinin sədri Ramiz Rzayev arasında görüş olub.
Görüşdə Ali Məhkəmənin sədri R.Rzayev qonaqlara ənənə və dəyərlərlə biri-birinə yaxın olan Azərbaycan və ərəb xalqları arasında həmrəyliklə bağlı çoxsaylı nümunələrin mövcudluğunu qeyd edib. Azərbaycan və Birləşmiş Ərəb Əmirlikləri arasında qarşılıqlı səfərlərin, iki ölkə arasında bağlanmış iqtisadi müqavilələrin, humanitar sazişlərin əməkdaşlıq əlaqələrinin daha da möhkəmlənməsi üçün böyük imkanlar açdığını diqqətə çatdırıb.
Ali Məhkəmənin sədri Azərbaycan ilə Birləşmiş Ərəb Əmirliklərinin məhkəmə-hüquq sistemləri arasında əlaqələrin yeni mərhələyə qədəm qoyduğunu, bu münasibətlərin uğurla inkişaf edərək beynəlxalq təşkilatlar çərçivəsində də genişlənəcəyini vurğulayıb. Bildirilib ki, respublikamızda məhkəmə-hüquq sahəsində həyata keçirilən tədbirlərin səmərəliliyi Ali Məhkəmənin yeni strukturunda və fəaliyyətində də öz əksini tapıb.
Ramiz Rzayev Birləşmiş Ərəb Əmirliklərinin Dubay Məhkəmələrinin baş direktorunun rəhbərlik etdiyi nümayəndə heyətinin Azərbaycana səfərinin ölkələrimizin məhkəmə orqanları arasında əməkdaşlığın daha da genişlənməsinə töhfə verəcəyinə əminliyini ifadə edib.
Əhməd Səid bin Həzim isə Dubayda məhkəmələrin fəaliyyət dairəsi barədə məlumat verib, Azərbaycan ilə Birləşmiş Ərəb Əmirlikləri arasında qarşılıqlı əməkdaşlığın böyük əhəmiyyət daşıdığını bildirib. Qeyd edib ki, bu əməkdaşlıq bundan sonra da davam etdiriləcək.
Görüşdə məhkəmə-hüquq təcrübəsi ilə bağlı fikir mübadiləsi aparılıb.
Sonda Azərbaycan Respublikası Ali Məhkəməsi və Birləşmiş Ərəb Əmirliklərinin Dubay Məhkəmələri arasında əməkdaşlıq haqqında İşçi Proqramı imzalanıb.

Paylaş:

Baxılıb: 1244 dəfə