Bakıda Ədalət mühakiməsinin səmərəliliyi üzrə Avropa Komissiyasının plenar iclası keçirilir

Bakı:

24 °C

60 %

4 m/s

Əlaqə

AZ RU EN

Ana səhifə / Siyasət / Bakıda Ədalət mühakiməsinin səmərəliliyi üzrə Avropa Komissiyasının plenar iclası keçirilir

Bakıda Ədalət mühakiməsinin səmərəliliyi üzrə Avropa Komissiyasının plenar iclası keçirilir

04.07.2014 [09:54]

Azərbaycan Avropa Şurasına üzv qəbul olunduqdan sonra bu mötəbər təşkilatla və onun struktur qurumları ilə səmərəli əməkdaşlıq münasibətləri qurulub, birgə fəaliyyət çərçivəsində mütərəqqi islahatlar həyata keçirilərək mühüm nailiyyətlər əldə olunub. Avropa Şurasının 65 illiyinin qeyd olunduğu bir vaxtda cari ilin mayında bu qurumun Nazirlər Komitəsinə sədrlik Avstriyadan Azərbaycana keçib.
Ölkəmizin məhkəmə sisteminin müasirləşdirilməsində əldə etdiyi müsbət nəticələr və Avropa Şurasının Ədalət mühakiməsinin səmərəliliyi üzrə Komissiyası (CEPEJ) ilə faydalı əməkdaşlığı nəzərə alınaraq sədrlik çərçivəsində 50-dən çox ölkədə məhkəmə-hüquq islahatlarının həyata keçirilməsinə kömək edən və ədalət mühakiməsinin səmərəliliyinin artırılmasına əhəmiyyətli töhfələr verən CEPEJ-in plenar iclasının Strasburqdan kənarda - Bakıda keçirilməsi qərara alınıb.
Tədbirdə iştirak etmək üçün CEPEJ-in rəhbər şəxsləri, o cümlədən qurumun prezidenti Con Steysi və Komissiya üzvləri Azərbaycana səfərə gəliblər.
Səfər zamanı qonaqlar Fəxri xiyabanda Ulu öndər Heydər Əliyevin xatirəsini ehtiramla yad edərək məzarı önünə gül dəstələri qoyublar.
Görkəmli oftalmoloq alim, akademik Zərifə xanım Əliyevanın da xatirəsi anılıb, məzarı üzərinə tər çiçəklər düzülüb.
Sonra qonaqlar Şəhidlər xiyabanında ölkəmizin müstəqilliyi və ərazi bütövlüyü uğrunda mübarizədə canlarından keçmiş qəhrəman Vətən övladlarının məzarlarını ziyarət ediblər.
AzərTAc xəbər verir ki, iyulun 3-də “JW Abşeron Marriott” otelində CEPEJ-in plenar iclasının təntənəli açılışı olub.
Açılış mərasimində Azərbaycan Respublikasının ədliyyə naziri, Məhkəmə-Hüquq Şurasının sədri Fikrət Məmmədov, Ali Məhkəmənin sədri Ramiz Rzayev, Avropa Şurası İnsan Hüquqları və Qanunun Aliliyi üzrə Baş Direktorluğunun rəhbəri Filip Buaya, CEPEJ-in prezidenti Con Steysi, Ədliyyə Nazirliyinin məsul şəxsləri, Məhkəmə-Hüquq Şurasının və Hakimlərin Seçki Komitəsinin üzvləri, hakim assosiasiyalarının nümayəndələri və hakimlər iştirak ediblər.
Mərasimdə çıxış edən nazir F.Məmmədov ölkəmizin Avropa Şurası, o cümlədən Ədalət mühakiməsinin səmərəliliyi üzrə Avropa Komissiyası ilə faydalı əməkdaşlığını vurğulayaraq dünyada getdikcə nüfuzu artan CEPEJ-in plenar iclasının Bakıda keçirilməsini əlamətdar hadisə kimi dəyərləndirib, təməli Ümummilli lider Heydər Əliyev tərəfindən qoyulmuş və Azərbaycan Prezidenti İlham Əliyevin rəhbərliyi ilə uğurla davam etdirilən genişmiqyaslı məhkəmə-hüquq islahatları barədə məlumat verib.
Ölkəmizdə hakimlərin ən şəffaf seçim qaydasının təsbit olunduğunu bildirən nazir Azərbaycanın bu sahədə müsbət təcrübəsinin CEPEJ tərəfindən Avropada örnək kimi dəyərləndirildiyini vurğulayıb, dünyada məhkəmə hakimiyyətinin müstəqilliyinin təşviqini və yaxşı təcrübələrin mübadiləsinin əhəmiyyətini qeyd edib.
Ali Məhkəmənin sədri R.Rzayev Azərbaycanın Avropa Şurası, o cümlədən CEPEJ ilə məhkəmə-hüquq sahəsində uğurla əməkdaşlıq etdiyini vurğulayıb.
Çıxışlarda Ermənistan-Azərbaycan, Dağlıq Qarabağ münaqişəsi, Ermənistan tərəfindən torpaqlarımızın 20 faizinin zəbt olunması faktı qonaqların diqqətinə çatdırılıb.
Avropa Şurası İnsan Hüquqları və Qanunun Aliliyi üzrə Baş Direktorluğunun rəhbəri F.Buaya çıxış edərək CEPEJ-in plenar iclasının Bakıda yüksək səviyyədə təşkil olunmasına görə minnətdarlığını bildirib, vətəndaşların məhkəmələrə çatımlığının asanlaşdırılmasından və ictimai etimadın yüksəldilməsindən, məhkəmə fəaliyyətinin açıqlığından danışıb, hüquqi dövlətlərdə məhkəmə hakimiyyətinin müstəqilliyinin böyük əhəmiyyət kəsb etdiyini vurğulayıb.
CEPEJ-in prezidenti C.Steysi ölkəmizdə demokratik hüquqi dövlət quruculuğu sahəsində mütərəqqi addımların atıldığını qeyd edərək Azərbaycanın qısa müddətdə hərtərəfli dinamik inkişafa nail olmasını yüksək qiymətləndirib və ölkəmizin bu uğurlarını dünyada paylaşmasının əhəmiyyətini vurğulayıb.
Sonra CEPEJ-in plenar iclası gündəlikdə duran məsələlərin müzakirəsi ilə davam edib. İyulun 4-də işini davam etdirəcək iclasda bir sıra mühüm məsələlərə baxılacaq, o cümlədən məhkəmə sistemlərinin müqayisəli təhlilini əks etdirən və qurumun islahatlar üçün “yol xəritəsi” sayılan növbəti hesabatı müzakirə olunacaq.