Münaqişəni daha da dərinləşdirən amillərdən ən başlıcası ATƏT-in Minsk qrupunun səmərəsiz fəaliyyətidir

Bakı:

22 °C

83 %

0 m/s

AZ RU EN

Ana səhifə / Siyasət / Münaqişəni daha da dərinləşdirən amillərdən ən başlıcası ATƏT-in Minsk qrupunun səmərəsiz fəaliyyətidir

Münaqişəni daha da dərinləşdirən amillərdən ən başlıcası ATƏT-in Minsk qrupunun səmərəsiz fəaliyyətidir

14.11.2014 [09:44]

“Biz Dağlıq Qarabağdakı və onun ətrafındakı hadisələrdən çox narahatıq, bu cür fəlakətlər daha böyük böhrana gətirib çıxara bilər”.
ATƏT-in Baş katibi Lamberto Zanyer bu fikirləri Ermənistan hava qüvvələrinə məxsus Mİ-24 tipli helikopterin Azərbaycan hava məkanında təmas xəttinə yaxın mövqelərimizi atəşə tutaraq vurulmasından sonra söyləyib. Qeyd edib ki, Qarabağda erməni helikopterinin vurulması münaqişəni daha da dərinləşdirə bilər.
Onun bu fikirləri ilə mətbuatdan tanış oldum. Dərin araşdırmalara ehtiyac duymadım. Çünki təxminən elə belə söyləyəcəyini düşündüm. İllərdir eşitdiklərimiz fikirlərin təkrarı, amma daha operativ, daha çevik.
Amma anlaya bilmədim ki, münaqişəni dərinləşdirə biləcək faktor kimi nəyi nəzərdə tutur? Helikopterin vurulmasını, yoxsa onun nümayişkaranə bir şəkildə Azərbaycanın hava məkanına soxulmasını?
Belə çıxmırmı ki, Ermənistan 22 ildən artıq bir müddətdə Azərbaycanın ərazilərini işğal altında saxlaya bilər, azərbaycanlıları etnik təmizləməyə məruz qoya bilər, Dağlıq Qarabağ ərazisində faktiki yaşayan ermənilərin sayından dəfələrlə artıq sayda hərbi birləşmələrlə qeyri-qanuni yollarla əldə etdiyi külli miqdarda döyüş texnikası, hərbi sursatla işğal olunmuş Azərbaycan ərazilərində qeyri-qanuni hərbi təlimlər keçirə bilər, yaşayış məskənlərimizi yerlə-yeksan edərək ekoloji fəlakətlərə yol aça bilər, bütün bunlar münaqişənin dərinləşməsi üçün risk yaratmır...?! ...ancaq həyasızcasına ərazimizə soxulan, mövqelərimizi atəşə tutan, bununla da dünyaya meydan oxumağa cəhd edən helikopterin tərəfimizdən vurulması böyük risklər yaradırmış.
Hörmətli Baş katibin diqqətinə çatdırmaq istəyirəm ki, münaqişəni daha da dərinləşdirən amillərdən ən başlıcası ATƏT-in Minsk qrupunun, eləcə də ATƏT-in özünün səmərəsiz fəaliyyəti, beynəlxalq hüququn, o cümlədən Helsinki prinsiplərinin BMT başda olmaqla bir çox beynəlxalq təşkilatların münaqişə haqda qəbul etdiyi sənədlərin yerinə yetirilməsinə göstərilən biganəlik, təcavüzə və təcavüzkar siyasətə qarşı dözümlülük, Ermənistanın beynəlxalq birliyin ərköyün uşağı kimi hərəkətlərinə və cinayətlərinə göz yummaq, bununla da ona şərait yaratmaqdır.
Hörmətli Baş katib!
Nə qədər ki, beynəlxalq ictimaiyyət tərəfindən səmimiyyətdən uzaq, real şəraitə qeyri-adekvat və dişsiz bəyanatlar səsləndiriləcək, bir o qədər də status-kvonun möhkəmlənməsinə “töhfə” veriləcək.
Regionun xalqları və dövlətləri isə sizdən vəziyyətin təsvirini verən yox, onu müsbət mənada dəyişməyə xidmət edən açıqlamalar və ona uyğun fəaliyyət gözləyir. Ədalətin və həqiqətin bərpası üçün birinci olmaq istəmirsinizmi?
Bahar Muradova
Milli Məclisin sədr müavini,
Azərbaycanın ATƏT Parlament
Assambleyasında nümayəndə heyətinin rəhbəri

Paylaş:

Baxılıb: 956 dəfə