Cinayətkar Manvel Qriqoryan Ermənistana rəhbərlik etmiş quldur dəstəsinin əsl simasıdır

Bakı:

23 °C

73 %

2 m/s

Əlaqə

AZ RU EN

Ana səhifə / Siyasət / Cinayətkar Manvel Qriqoryan Ermənistana rəhbərlik etmiş quldur dəstəsinin əsl simasıdır

Cinayətkar Manvel Qriqoryan Ermənistana rəhbərlik etmiş quldur dəstəsinin əsl simasıdır

26.06.2018 [09:40]

Erməni generalın ortaya çıxan əməlləri bir daha sübut edir ki, illərlə işğalçı ölkədə iqtidarı əlində saxlayan Koçaryan-Sarkisyan rejimi erməni xalqına böyük faciələr yaşadıb
Son günlər Ermənistanda korrupsiyaya qarşı, o cümlədən ordudakı qanunsuzluqların ortaya çıxarılması ilə bağlı görülən bəzi tədbirlər rejimin mahiyyətini üzə çıxardır. Belə ki, bu günlərdə həbs olunan və Dağlıq Qarabağda müharibə zamanı soydaşlarımıza qarşı öz qəddarlığı ilə seçilən general Manvel Qriqoryanın törətdiyi cinayətlər Sarkisyan-Koçaryan hakimiyyətinin əsl simasının ortaya çıxması baxımından da əhəmiyyətlidir.
Erməni mətbuatına nəzər yetirəndə məlum olur ki, illərdir bu cinayətkar generalın qorxusundan susmağı üstün tutan əsgər ailələri onun törətdiyi cinayətləri dilə gətirməyə başlayıblar. Onlar əsgərlərin ərzağını özünün iqamətgahına daşıyan bu generalın 2016-cı ilin aprelində erməni əsgərlərə qarşı törətdiyi cinayətlərdən danışırlar.
“Azadlıq” radiosuna açıqlama verən əsgər valideynlərindən biri deyib ki, şəxsi zooparkı olan bu qəddar general həmin ərzaqlarla öz ayılarını yemləyib, əsgərləri acından öldürüb. Əsgərin valideyni deyir ki, aprel döyüşlərindən qabaq onun oğlu üç gün heç nə yeməyib. Onun sözlərinə görə, əgər oğlu ac olmasaydı, heç olmasa xəstəliklə mübarizə apara bilərdi. Əsgər analarından biri isə əsgərlərdən bir neçə kilometr uzaqlıqda saxladığı heyvanlara M.Qriqoryanın daha çox diqqət göstərdiyini deyir.
Generaldan təkcə valideynlər narazı deyillər. Keçmiş döyüşçülər, hətta “Arabo” dəstəsinin komandiri olmuş Manvel Yegiazaryan onun cinayətləri haqqında dəfələrlə deyildiyini, lakin keçmiş rejimin əsas dayaqlarından hesab edildiyi üçün onunla heç kimin bacarmadığını bildirib. Bu insanların dövlətin pullarını erməni milli valyutası ilə yox, dollarla talan etdiklərini deyən keçmiş komandir həmin cinayətkarların hədəfə alınmasının lazım olduğunu bəyan edir. Erməni cəmiyyətinin nümayəndələri etiraf edirlər ki, illərdir gör onlara nə qədər keyfiyyətcə aşağı olan insanlar rəhbərlik ediblər. Yəni erməni cəmiyyəti elə vəziyyətə çatıb ki, pisi, yoxsa yaxşını nümunə götürəcəyi məsələsində tərəddüd edir. Çünki pislər indi yaxşı yaşayırlar, məsələləri həll edə bilirlər.
O qədər dəhşətli faktlar ortaya çıxıb ki, artıq Ermənistan cəmiyyəti bu hadisələrdən şoka düşüb. Belə ki, hələ 1997-ci ildə M.Qriqoryanın əlindən ABŞ-a qaçan erməni ailəsi onun törətdiyi cinayətlərdən bəhs edir. Edqar Mnoyan adlı əsgərin hərbi xidmətdə olduğu vaxt generalın malikanəsində mühafizəyə cəlb edilməsi onun və ailəsinin faciəsinə səbəb olub. Hərbi xidmətdən qayıtdıqdan sonra Maliyyə Nazirliyində işə düzələn Edqarı girov götürən M.Qriqoryanın özü və adamları əsgərin yanına maşınla gedib-gələn atasının varlı olduğunu bildikləri üçün ondan oğlunun əvəzində 10 min dollar tələb ediblər. Tələblər bununla bitməyib. Onun atasının nəyi varsa əlindən alıblar. Amma oğlunu göstərməyiblər. Hətta oğurlanan Edqarın xalasının ərinin xidmət keçdiyi malikanəyə gedib onunla maraqlanması da başına bəla olub. Onu bir ay girovluqda saxlayıblar və 8 min dollar aldıqdan sonra buraxıblar. Mnoyan azad edildikdən sonra onun ailəsinə Ermənistanı tərk etmək tələbi qoyulub. 20 ildir ABŞ-da yaşayan ailənin qızı bu barədə danışmağa özündə güc tapıb.
Ermənistanda belə generalların rəhbərlik etdiyi ordunun hansı vəziyyətdə olduğu da artıq mediada yazılır və son günlər erməni məbuatı əsgərlərin Ermənistandan birbaşa Dağlıq Qarabağa göndərilməsi və hər ay müəyyən məbləğdə pul tələb edilməsi barədə faktları ortaya qoyur.
Bu cür dəhşətli faktlardan sonra Ermənistanda həbs olunan M.Qriqoryana verilən “qəhrəman” adının əlindən alınması tələb edilir. Ən maraqlısı isə odur ki, erməni mətbuatı əsl həqiqətləri üzə çıxarır və illərdir onlara cinayətkar və kriminal rejimin rəhbərlik etdiyini etiraf edirlər. Qriqoryan kim olub: kriminal avtoritet, hakim partiyanın deputatı, ən nəhayət, Serj Sarkisyan rejiminin simvolu.
Qaşqay

Paylaş:

Baxılıb: 689 dəfə