Milli Məclisdə təmsil olunan siyasi partiyalar ABŞ Konqresinə etiraz edib

Bakı:

22 °C

83 %

1 m/s

Əlaqə

AZ RU EN

Ana səhifə / Siyasət / Milli Məclisdə təmsil olunan siyasi partiyalar ABŞ Konqresinə etiraz edib

Milli Məclisdə təmsil olunan siyasi partiyalar ABŞ Konqresinə etiraz edib

16.12.2009 [09:36]

“Biz bir qrup millət vəkili son aylarda dəfələrlə cəbhə zonalarında yerləşən rayonlarda olmuş, bələdiyyə seçkiləri ilə əlaqədar onminlərlə insanla görüşmüşük. İnsanlar ölkə Prezidentinin siyasətini alqışlayır, görülən işlərə dəstək verirlər. Onlar həm də Dağlıq Qarabağ münaqişəsinin tezliklə həll olunmasının tərəfdarıdırlar”. Bunu jurnalistlərə açıqlamasında millət vəkili Tahir Rzayev deyib. Onun sözlərinə görə, Milli Məclisdə təmsil olunan siyasi partiyalar ABŞ Konqresinin Nümayəndələr Palatasının separatçı Dağlıq Qarabağ rejiminə maliyyə yardımı ayırması ilə bağlı qərarına qarşı etiraz bəyanatı ilə çıxış ediblər.
Parlamentin dünənki iclasının fasiləsi zamanı brifinq keçirən Sosial Rifah Partiyasının (SRP) sədri Xanhüseyn Kazımlı bildirdi ki, Milli Məclisdə təmsilçiləri olan iqtidarlı-müxalifətli 12 partiya ABŞ Konqresinin məlum addımını pisləyən müraciət qəbul edib və bu müraciətin ABŞ-ın Azərbaycandakı səfirliyi vasitəsilə Konqresə, o cümlədən, adıçəkilən ölkənin digər aidiyyatı orqanlarına çatdırılması istənilib. Müraciətdə qeyd olunur ki, ABŞ Konqresi ölkəsinin, həmçinin, strateji tərəfdaşlarının milli maraqlarına adekvat olmayan və daha çox erməni millətçilərinin bəşəriyyət üçün ziyankar mənafeyinə xidmət göstərən addımlar atır. ABŞ Konqresinin işğalçı Ermənistana və separatçı Dağlıq Qarabağ rejiminə 2010-cu il üçün ayırdığı son maliyyə yardımları bu baxımdan istisna təşkil etmir.
Müraciət müəlliflərinin fikrincə, Azərbaycanın 20 faizini işğal altında saxlayan Ermənistana 41 milyon və işğal olunmuş torpaqlardakı Dağlıq Qarabağ rejiminə 8 milyon ABŞ dolları məbləğində yardım göstərilməsi həmin ölkənin beynəlxalq ictimai rəydəki nüfuzuna xələl gətirməkdən başqa bir şey deyil: “Bu yardım dünyada sabitliyin təmin edilməsi, demokratik ənənələrin tənzimlənməsi və inkişafı istiqamətində aparıcı qüvvə kimi tanınmaqda, eyni zamanda, ATƏT-in Minsk qrupunun həmsədrlərindən biri olan ABŞ hökuməti və onun Konqresi üçün faydalı olmayan, dünya ictimaiyyəti tərəfindən nüfuz gətirməyən bir addım kimi qiymətləndirilir. Ona görə Azərbaycan parlamentində təmsil olunun siyasi partiyalar ABŞ Konqresi tərəfindən bu cür yanaşmanı, Azərbaycanın 20 faizini işğal edən Ermənistana, eləcə də onun bilavasitə himayəsi ilə mövcud olan separatçı Dağlıq Qarabağ rejiminə hər il yardım göstərilməsini Qafqazda sülhün və sabitliyin tənzimlənməsinə kölgə salan, bölgədə ABŞ hökuməti haqqında mövcud olan demokratik imicə xələl gətirən, dinc yanaşı yaşamaq prinsiplərinə zidd olan bir fəaliyyət kimi qəbul edir, bu kimi ikili standartlar üzrə münasibətlərə son qoyulmasını təkidlə tələb edirlər”.
Müraciətin sonunda bildirilir ki, Azərbaycan parlamentində təmsil olunan partiyalar separatçı rejimə maliyyə yardımı göstərilməsinə etiraz səsinin ABŞ-ın müvafiq dövlət və qanunvericilik qurumlarına çatdırılmasını onun Azərbaycandakı səfirliyindən xahiş edirlər.
Nardar BAYRAMLI

Paylaş:

Baxılıb: 1312 dəfə