"Nezavisimaya Qazeta": Qəbələ Verbye ilə rəqabət aparır

Bakı:

23 °C

74 %

13 m/s

Əlaqə

AZ RU EN

Ana səhifə / Siyasət / "Nezavisimaya Qazeta": Qəbələ Verbye ilə rəqabət aparır

"Nezavisimaya Qazeta": Qəbələ Verbye ilə rəqabət aparır

14.08.2010 [09:07]

“Qəbələ Verbye ilə rəqabət aparır. Azərbaycan musiqi forumu ümumdünya festivalına çevrilir”. Rusiyanın “Nezavisimaya qazeta” nəşrinin müxbiri, Qəbələ Musiqi Festivalını işıqlandıran əcnəbi jurnalistlər qrupunun üzvü Viktoriya Panfilovanın məqaləsi belə adlanır. Məqalədə deyilir: “İyulun 25-dən avqustun 5-dək Azərbaycanın Qəbələ şəhərində II Beynəlxalq musiqi festivalı keçirlirdi. Artıq ikinci ildir ki, dünyanın hər yerindən ifaçılar, klassik musiqi biliciləri və pərəstişkarları buraya toplaşırlar. Bu yaxınlaradək Qəbələ ölkənin rayon mərkəzlərindən biri idi, indi isə artıq Azərbaycanın musiqi və mədəni mərkəzinə çevrilir”.
Festivalın bədii rəhbəri, SSRİ-nin və Azərbaycanın xalq artisti, Bakı Musiqi Akademiyasının rektoru Fərhad Bədəlbəyli qəzetə müsahibəsində deyib ki, festival onunla əlamətdardır ki, məsələn, Rostropoviç festivalı kimi Bakıda deyil, Qəbələdə keçirilir. Bu şəhərin çox qədim tarixi vardır. Bura uzun müddət Qafqaz Albaniyasının paytaxtı olmuşdur. Bu diyar nadir təbiəti, mənzərəli dağları, mehriban insanları ilə məşhurdur. Təsadüfi deyildir ki, Qəbələni “kiçik İsveçrə” adlandırırlar. Musiqiçilər və festivalın qonaqları burada İsveçrədə keçirilən Verbye festivalını yada salırlar. Yuri Başmet isə deyib ki, “bura Verbyedən də yaxşıdır”.
V.Panfilova yazır ki, festivalın Qəbələdə keçirilməsi ideyası təsadüfi yaranmayıb. İki il əvvəl burada Hollandiyanın “BELTMANN” markalı pianolarının istehsalına başlanıb. Qəbələdə yüksək səviyyəli turizm kompleksi fəaliyyət göstərir. Bunlardan hansının - piano fabriki, otel, yaxud festival ideyasının əvvəl yarandığı məlum deyildir. Təkcə bu aydındır ki, hər şey festival ətrafında yaranıb. İndi bu festivalda iştirak etmək böyük şərəf sayılır.
Qəbələyə gəlmiş musiqiçilərin siyahısı da bunu göstərir: London Kral Filarmonik Orkestri, dünyaşöhrətli ifaçılar - skripkaçı Xloye Xanslip, tenor Emilio Pons, pianoçu Boris Berezovski, vieolonçel çalan və dirijor Dmitri Yablonski, pianoçular Fərhad Bədəlbəyli və Murad Adıgözəlzadə, dirijor Rauf Abdullayev festivalı əsl musiqisevərlər üçün əlamətdar hadisəyə çevirmişlər. Qəbələ səhnəsində gənc ulduzlar da parlayır. Bəlkə də Bariton Cavid Səmədov festivaldan sonra bütün dünyada tanınacaq.
Fərhad Bədəlbəylinin sözlərinə görə, festivala təkcə klassik musiqi həvəskarları deyil, bəlkə də Motsartın, çaykovskinin, Şubertin, Bramsın, Hacıbəylinin ilahi musiqisini simfonik orkestrin ifasında canlı olaraq ilk dəfə dinləyən Qəbələ sakinləri də gəlirlər. Onlar özləri üçün yeni dünya açırlar. Heydər Əliyev Fondunun prezidenti, YUNESKO-nun xoşməramlı səfiri, Azərbaycanın birinci xanımı Mehriban Əliyeva deyib: “Bu günlər bizim hamımızı - həm tamaşaçıları, həm ifaçıları bir amil - musiqi birləşdirəcəkdir. Musiqinin dili tərcümə tələb etmir. Bu dil millətdən, dindən asılı olmayaraq hər kəs üçün aydındır”.
Azərbaycanda beynəlxalq musiqi festivallarının keçirilməsinin təşəbbüskarı da məhz Mehriban xanımdır. YUNESKO-nun baş direktoru İrina Bokova mədəniyyətlərarası dialoqun qurulmasında xidmətlərinə görə Mehriban xanıma “Qızıl Motsart” medalı təqdim edib.
İştirakçıların yekdil rəyinə görə, festival getdikcə şöhrətlənir. Bu il festival ötənilkindən qüdrətli keçib, gələn il isə bu ilkindən daha genişmiqyaslı və parlaq olacaq. Festival dünyanın hər yerindən musiqiçiləri cəlb edir. 2011-ci il festivalının iştirakçılarının siyahısı artıq tərtib edilib. Arzu edənlərin bəziləri, yer olmadığından tədbirə növbəti il qatıla biləcəklər. Bakı Musiqi Akademiyasının professoru, Əməkdar İncəsənət Xadimi Yalçın Adıgözəlov qəzetə müsahibəsində deyib: “ölkəni daha nə ilə tanıtmaq olar? Siyasətlə, mədəniyyətlə və idmanla. Bu, ən yaxşı vizit kartıdır”.

Paylaş:

Baxılıb: 1178 dəfə