Hərbi əməliyyatlar, yoxsa psixoloji müharibə?

Bakı:

24 °C

47 %

3 m/s

Əlaqə

AZ RU EN

Ana səhifə / Siyasət / Hərbi əməliyyatlar, yoxsa psixoloji müharibə?

Hərbi əməliyyatlar, yoxsa psixoloji müharibə?

08.02.2022 [10:43]

Qərb iddia, Rusiya isə istisna edir

P.İSMAYILOV

Ukrayna mövzusu ilə bağlı yenidən həyəcan təbili çalınmaqdadır. ABŞ Prezidentinin milli təhlükəsizlik məsələləri üzrə müşaviri Ceyk Sallivan bildirib ki, ABŞ Rusiyanın Donbassı ilhaq edə biləcəyini istisna etmir. Onun fikrincə, Rusiya Federasiyasının planları müxtəlif ola bilər: “Ukraynanın şərqindəki Donbass kimi tanınan əraziləri ilhaq etmək ehtimalı, yaxud da kiberhücumlar, siyasi sabitliyin pozulması”. Sallivanın sözlərinə görə, son aylar ABŞ və müttəfiqləri bütün mümkün ssenarilərə hazırlaşmaq üçün çalışırlar. Müşavir onu da əlavə edib ki, Ukraynaya qarşı hər hansı bir təcavüz olarsa, ABŞ müttəfiqləri ilə birgə Rusiyaya ciddi iqtisadi təzyiqlər edəcək.

Ötən həftə ABŞ Rusiyanı daha çox qoşunu geri çəkməyə sövq etmək səylərinin bir hissəsi olaraq Almaniya və Şərqi Avropaya 3000 əlavə əsgər göndərdiyini elan edib. ABŞ rəsmilərinə istinad edən “Reuters” və “Washington Post” isə Rusiyanın Ukraynaya genişmiqyaslı müdaxilə üçün lazım olan qüvvə və vasitələrin təxminən 70 faizini Ukrayna sərhədlərinə çəkdiyini yazıb. Amerika kəşfiyyat mənbələrinin məlumatına görə, Ukrayna ilə sərhədə cəmləşdirilən batalyon taktiki qruplarının (BTQ) sayı 83-ə çatıb. Məlumatda vurğulanır ki, cəmi bir həftə əvvəl bu say 60-a yaxın olub. Daha 14 qrupun isə yolda olduğu bildirilir. Nəşrlərdə BTQ-lərin ümumi sayına “Müttəfiqlərin qətiyyəti” təlimində iştirak etmək üçün Belarusa yollanan Rusiya hərbçilərinin daxil olub-olmadığı aydın deyil. Krımdakı hərbçilərlə bir yerdə Ukrayna sərhədində yerləşdirilən Rusiya hərbçilərinin sayının 100-130 min nəfər olduğu bildirilir. Nəşrlər, həm də ABŞ rəsmilərinə istinad edərək genişmiqyaslı əməliyyat keçirilməsi halında mümkün itkilər barədə təxminləri yazıblar. Hesablamalara görə, Ukrayna hərbçiləri arasında 5-25 min, Rusiya hərbçiləri arasında 3-10 min, mülki şəxslər arasında 25-50 min itki ola bilər. Bundan əlavə, toqquşmanın Avropa İttifaqı ölkələrində 5 milyona qədər qaçqının didərgin düşməsinə səbəb ola biləcəyi iddia edilir. Yazılarda mümkün hərbi kampaniyanın gedişatının qiymətləndirilməsindən də bəhs edilir. İddia olunur ki, rus hərbçilərinin Kiyevə daxil olması üçün cəmi 2 gün lazım ola bilər, lakin bu şəhərin ələ keçirilməsi çoxsaylı itkilərlə müşayiət olunacaq.

Rusiya tərəfi isə Ukraynanı işğal etmək planının olmadığını bildirir və belə bir təhlükə barədə yazıb-yaradan Qərb siyasətçilərini və medianı tənqid edir. Rusiyanın BMT-dəki daimi nümayəndəsinin müavini Dmitri Polyanski son yazılanları dəlilik və təşviş adlandırıb.

Məsələ ilə bağlı fikirlərini bölüşən Milli Məclisin Azərbaycan-Ukrayna parlamentlərarası əlaqələr üzrə işçi qrupunun üzvü Elşad Mirbəşir regionda gedən proseslərin ciddi şəkildə izlənildiyini diqqətə çatdırıb. Onun fikrincə, Qərb mətbuatının yaydığı məlumatlar birmənalı qarşılana bilməz: “Sözügedən açıqlamalarda kəşfiyyat məlumatları dərc olunur ki, bu məlumatların həqiqiliyi şübhə altındadır. Hətta bəzi media orqanları Ukraynada baş verəcək müharibədə öləcək və ya qaçqın düşəcək olan insanların sayını belə qeyd edirlər. Bu, bir daha onu göstərir ki, ABŞ və müttəfiqləri hazırda daha çox psixoloji təzyiqlə məşğuldurlar. Maraqlıdır ki, Vaşinqton və müttəfiqləri bir tərəfdən danışıqların aparılması, dialoqun genişləndirilməsi üçün cəhdlər etdiklərini deyirlər, Avropa İttifaqı çərçivəsində Rusiya ilə problemin həllini müzakirə edirlər. Digər tərəfdən isə, bu cür məlumatlar yayırlar. Fikrimcə, deyilənlər, sadəcə proqnozlardır. Nəzərə alınmalıdır ki, Fransa Prezidenti Emmanuel Makron Kiyevdə görüşlər keçirəcək. Bundan qabaq isə Rusiya dövlət başçısı ilə müzakirələr aparılıb. Demək ki, hələ də dialoq mühiti var və problemin danışıqlar yolu ilə həlli mümkündür”.

Millət vəkilinin sözlərinə görə, regionda baş verə biləcək qarşıdurma heç bir ölkənin maraqlarına uyğun deyil. Bu baxımdan, regionun aparıcı siyasi qüvvələri də Ukrayna ilə Rusiya arasında kompromisin tapılması üçün cəhdlər göstərirlər. E.Mirbəşir Türkiyənin və Azərbaycanın bu istiqamətdəki səylərinin olduqca yüksək qiymətləndirildiyini bildirib. “Bir müddət öncə Azərbaycan Prezidenti Ukraynaya səfər etdi. Ardından isə Rusiya Prezidenti ilə telefon danışığı oldu. O cümlədən Türkiyə prezidenti Rəcəb Tayyib Ərdoğanın bu istiqamətdə mühüm səylərini müşahidə edirik. Sülh danışıqları hər zaman ən yaxşı çıxış yolu sayılıb. İndiki halda da bu yolun seçilməsi daha məqbuldur”, - deyə millət vəkili əlavə edib.

Paylaş:

Baxılıb: 1112 dəfə