Arayik Moskvaya niyə gedib?

Bakı:

13 °C

94 %

4 m/s

Əlaqə

AZ RU EN

Ana səhifə / Siyasət / Arayik Moskvaya niyə gedib?

Arayik Moskvaya niyə gedib?

10.02.2022 [10:47]

Cinayətkar özünə dəstək axtarır

Nardar BAYRAMLI

Ermənistan mətbuatında Qarabağ separatçılarının rəhbəri Arayik Arutyunyanın Moskvaya getməsi haqqında məlumat yayılıb. Separatçıların rəhbərinin Rusiyaya səfəri ilk dəfə deyil. Bundan əvvəl də A.Arutyunyan Rusiyanın paytaxtında dəfələrlə səfərdə olub. Erməni mətbuatı onu da yazır ki, Qarabağ separatçıları arasında “liderlik” uğrunda mübarizə güclənir. “Hraparak” qəzetinin yazdığına görə, İkinci Qarabağ müharibəsindəki məğlubiyyətdən sonra separatçıların rəhbərliyindən gedəcəyinə söz vermiş Arayik Arutyunyan vədinə xilaf çıxaraq, tərəfdarlarına siyasətdən getməyəcəyini deyib. Bu da Qarabağ separatçıları arasında ona müxalif olanların narazılığı ilə qarşılanıb. “Hraparak” yazır ki, Arayik Arutyunyan ətrafında çevrə yenidən daralıb. Belə ki, əvvəllər separatçılara rəhbərlik etmiş Bako Saakyan və Arkadi Qukasyanın yenidən hərəkətə keçdiyi bildirilir. Onların separatçılar arasında Arayik Arutyunyana qarşı qüvvə formalaşdırdıqları barədə məlumatlar yayılıb. Qəzet qeyd edir ki, separatçılar gələn il yeni lider seçməyi planlaşdırırlar. Bu səbəbdən də Qarabağdakı separatçıların keçmiş rəhbərləri və generallar artıq müzakirələrə başlayıb. Yeni namizədlər arasında daha çox əli azərbaycanlıların qanına batmış general Vitali Balasanyan Qarabağ separatçılarının “keçmiş müdafiə naziri” general Levon Mnatsakanyanın adı hallanır.

“Hraparak” yazır ki, Arayik Arutyunyan hazırkı postunda qalmaq üçün müxtəlif gedişlər etməyə cəhd göstərir. Onun Moskvaya səfəri də buradan qaynaqlana bilər.

Məsələ ilə bağlı qəzetimizə açıqlama verən Milli Məclisin deputatı Elman Məmmədov bildirib ki, separatçıların rəhbəri, müharibə cinayətkarı A.Arutyunyan Moskvaya səfəri bir sıra mətləblərdən xəbər verir. Onun sözlərinə görə, müharibə cinayətkarının hər hansı ölkəyə səfəri dözülməz haldır: “Cinayətkar A.Arutyunyan Rusiyaya hansı ölkənin pasportu ilə gedir? Arutyunyan o canidir ki, müharibə dövründə Azərbaycan şəhərlərini raket atəşinə tutmaq barədə göstəriş verdiyini etiraf edib və bu “qəhrəmanlıq” barədə ağızdolusu danışıb. Separatizmin nə olduğunu öz təcrübəsində görən və acısını yaşayan Rusiyaya belə cinayətkar şəxslərin səfəri başadüşülən deyil. Arutyunyanın Rusiyaya səfəri həm də Qarabağda “sülhməramlı missiya” həyata keçirən Rusiyanın bu istiqamətdə fəaliyyətinə uyğun gəlmir. Sülhməramlı kontingentin fəaliyyətinin nədən ibarət olduğu beynəlxalq hüquqda əksini tapıb. Burada əsas məqsəd sülhün və təhlükəsizliyin təmin edilməsi olmalıdır, müharibə cinayətkarlarını və separatizmi dəstəkləmək yox. Amma biz görürük ki, Rusiya hərbçiləri Qarabağa erməni daşımaqla məşğuldur, həm də bəzi xarici ölkələrin vətəndaşlarını qanunsuz olaraq həmin ərazilərə buraxırlar. Yəni, onlar sülhü və təhlükəsizliyi təmin etməkdən daha çox ermənilərin qayğısını çəkirlər”.

Millət vəkili qeyd edib ki, Arayikin əvvəlki səfərlərinə də Azərbaycan tərəfi etiraz edib və Rusiyanın rəsmi nümayəndələri bunun şəxsi səfər olduğunu bildiriblər: “Bütün hallarda separatçının bu səfəri qəbulolunmazdır. Yəqin Arayik yenə də özünə dəstək qazanmaq üçün oraya gedir. Amma bilməlidir ki, artıq Azərbaycan problemi həll edib, Dağlıq Qarabağ münaqişəsi başa çatıb. Gec-tez o, törətdiyi cinayətlərə görə cavab verəcək”.

Paylaş:

Baxılıb: 1198 dəfə