Milli Onkoloji Mərkəzdə Uşaqları Beynəlxalq Müdafiə Gününə həsr olunmuş təntənəli bayram tədbiri keçirilib

Bakı:

21 °C

83 %

1 m/s

AZ RU EN

Ana səhifə / Sosial / Milli Onkoloji Mərkəzdə Uşaqları Beynəlxalq Müdafiə Gününə həsr olunmuş təntənəli bayram tədbiri keçirilib

Milli Onkoloji Mərkəzdə Uşaqları Beynəlxalq Müdafiə Gününə həsr olunmuş təntənəli bayram tədbiri keçirilib

01.06.2013 [09:00]

Mayın 31-də Milli Onkoloji Mərkəzdə 1 İyun - Uşaqları Beynəlxalq Müdafiə Gününə həsr olunmuş təntənəli bayram tədbiri keçirilib.
AzərTAc xəbər verir ki, bayram tədbirində əvvəlcə xəstəliyə düçar olmuş uşaqlara həsr olunmuş “Ümid yolu” adlı sənədli film nümayiş etdirilib.
Milli Onkoloji Mərkəzin direktoru, akademik Cəmil Əliyev uşaqları əlamətdar gün münasibətilə təbrik edərək, Mərkəzdə uşaqların müalicəsi üçün yaradılan şəraitə görə dövlətimizin başçısı İlham Əliyevə və Azərbaycanın birinci xanımı, Heydər Əliyev Fondunun prezidenti Mehriban Əliyevaya minnətdarlığını bildirib. Qeyd olunub ki, xəstəliyə düçar olmuş uşaqların qana olan ehtiyaclarına etinasız yanaşılmamalı və hər bir kəs balacalara həyat verəcək belə nəcib işlərdə fəal iştirak etməlidir.
Ailə, Qadın və Uşaq Problemləri üzrə Dövlət Komitəsinin sədri Hicran Hüseynova dövlətimizin uşaqların müdafiəsi, onların rifah içində böyüməsi üçün gördüyü işlərdən söz açaraq qeyd edib ki, müstəqil Azərbaycanın qurucusu Ulu öndər Heydər Əliyev uşaqlara son dərəcə böyük sevgi və qayğı ilə yanaşırdı. Bu baxımdan ölkəmizdə internat məktəblərində, uşaq evlərində yaşayan uşaqlara, onların hüquqlarının müdafiəsinə çox böyük nəzarət edilir.
“Uşaqlar cəmiyyətimizin sabahıdır” - deyən komitə sədri bildirib ki, onların qayğısız böyüməsi, yüksək standartlara cavab verən təlim-tərbiyə və tibbi xidmətlərlə təmin edilməsi, əlverişli sosial mühitdə fiziki və mənəvi baxımdan sağlam yetişməsi, habelə öz istedadlarını nümayiş etdirmələri üçün zəruri şəraitin yaradılması bizim əsas məqsədlərimizdəndir. Uşaqlarımızın hərtərəfli şəxsiyyət və ölkəmizin layiqli vətəndaşı olaraq formalaşmaları müstəqil Azərbaycan Respublikasının dövlət uşaq siyasətinin aparıcı istiqamətini təşkil edir.
H.Hüseynova xəstəliyə düçar olmuş uşaqlara Milli Onkoloji Mərkəzdə peşəkar həkim heyəti tərəfindən göstərilən diqqət və qayğını yüksək qiymətləndirib, uşaqlara dövlət səviyyəsində göstərilən qayğıdan danışıb.
Tədbirdə çıxış edənlər bu fidanların həyatları üçün önəmli rol oynayan qanvermə aksiyalarında iştirak etməyin vətəndaşlıq borcu olduğunu bildirib, uşaqları bayramları münasibətilə təbrik ediblər.
Təntənəli bayram tədbiri incəsənət ustalarının iştirakı ilə davam etdirilib.
Sonda uşaqlara Heydər Əliyev Fondu, Milli Onkoloji Mərkəz, “Azərbaycan Hava Yolları”, Mərkəzi Klinika, “Nar Mobile” və digər təşkilatlar adından hədiyyələr paylanıb.

Paylaş:

Baxılıb: 1862 dəfə