700 bal toplayan abituriyentlərin uğur yolu

Bakı:

27 °C

51 %

5 m/s

Əlaqə

AZ RU EN

Ana səhifə / Sosial / 700 bal toplayan abituriyentlərin uğur yolu

700 bal toplayan abituriyentlərin uğur yolu

27.07.2016 [09:55]

Xəbər verildiyi kimi, iyulun 15-də Tələbə Qəbulu üzrə Dövlət Komissiyası tərəfindən (TQDK) 2016/2017-ci tədris ili üçün ali təhsil müəssisələrinə qəbul olmaq istəyən cari ilin məzunları üçün I və IV ixtisas qrupları üzrə qəbul imtahanı keçirilib. Qeyd edək ki, imtahan respublikanın 11 şəhərində - Bakı, Naxçıvan, Gəncə, Sumqayıt, Mingəçevir, Şəki, Ağcabədi, Göyçay, Şirvan, Lənkəran və Xaçmaz şəhərlərində ümumilikdə 47 binada aparılıb. İmtahanda iştirak etmək üçün sənəd vermiş 25956 abituriyentdən 1035 nəfəri imtahana gəlməyib. Eləcə də, imtahanda iştirak edən 24921 abituriyentdən 13 nəfəri qaydaları pozduğu üçün imtahandan xaric olunub və nəticələri ləğv edilib.
İmtahanda I ixtisas qrupu üzrə 3 oğlan abituriyent, IV ixtisas qrupu üzrə isə 2 oğlan, 1 qız olmaqla ümumilikdə 3 abituriyent bütün test tapşırıqlarına düzgün cavab verib və maksimum nəticə - 700 bal toplayıb.
I ixtisas qrupu üzrə maksimum nəticə əldə edən abituriyentlərdən biri də Ağayev Tural Şəfahət oğludur. 1999-cu ildə Bakı şəhərində anadan olan T.Ağayev Türkiyə Dəyanət Vəqfi-Bakı Türk Liseyinin məzunudur. Əldə etdiyi nəticədən qürur duyduğunu bildirən T.Ağayevin sözlərinə görə, düzgün motivasiya və sistemli çalışaraq hər bir abituriyent bu nəticəni əldə edə bilər: “Sualları çox rahatlıqla cavabladım. 700 bal topladığımı öyrənəndə çox sevindim. Uşaqlıqdan dərslərimi oxumağa xüsusi səy göstərmişəm. Hər dəfə yeni bir bilgi əldə edəndə dostlarımla diskussiyalar aparmışıq. Sınaqlardan topladığım nəticələr məni daha çox ümidləndirirdi ki, mən də 700 bal toplaya bilərəm. Məndən öncəki abituriyentlərə baxıb həmişə onlar kimi yüksək nəticə əldə edəcəyimi arzulayırdım. Nəhayət ki, buna nail oldum və ailəmin ümidlərini doğrulda bildim. Valideynlərimin gözlərindəki sevinc yaşlarını görmək mənə dünyalara dəyərdi. Heç şübhəsiz, üzərimdə əməyi olan dəyərli müəllimlərimin də rolu əvəzsizdir”.
“Bu gün ölkəmizdə dövlətin təhsilə göstərdiyi diqqət və qayğı hər birimizdə böyük sevinc hissi yaradır. Təhsilin inkişafına göstərilən diqqət bu sahədə önəmli uğurların əldə olunmasına səbəb olur”, - deyə Tural Ağayev bildirib.
I ixtisas qrupu üzrə maksimum nəticə göstərən abituriyentlərdən biri də Sultanlı Nadir Faiq oğludur. O, 1999-cu ildə Bakı şəhərində anadan olub. Hər zaman dərslərinə olan məsuliyyəti və marağı ilə seçilən N.Sultanlının dediyinə görə, təhsilə maraq yaranmasında ailəsinin çox böyük rolu olub. Boş vaxtlarında mütaliə edən gənc məktəbdə tədris olunan bütün fənləri yaxşı oxumağa çalışıb. Sevincini öncə ailəsi, sonra isə məzunu olduğu Ankara-məktəb liseyindəki müəllimləri ilə bölüşüb: “700 bal topladığım üçün çox sevincliyəm. Sınaqlardan topladığım yüksək qiymətlər məni daha da ruhlandırsa da, daim öz üzərimdə çalışırdım. Kimya mühəndisliyi fakültəsini seçmək istəyirəm. Gələcəkdə magistratura pilləsini xaricdə davam etirməyi düşünürəm. Hazırda qəbul imtahanlarına hazırlaşan həmyaşıdlarıma demək istəyirəm ki, gecə-gündüz demədən çalışmaqdansa, sistemli şəkildə dərslərinə vaxt ayırsalar, bu nəticə onlar üçün də əlçatan olar. Valideynlərimin qürurverici sözləri və qohumlarımın sevinci, demək olar ki, bütün əziyyətli günlərimi unutdurmuş oldu”.
Müşfiqə BAYRAMLI

Paylaş:

Baxılıb: 776 dəfə