“Hədəfim ən yüksək balı toplamaq idi”

Bakı:

27 °C

48 %

6 m/s

Əlaqə

AZ RU EN

Ana səhifə / Sosial / “Hədəfim ən yüksək balı toplamaq idi”

“Hədəfim ən yüksək balı toplamaq idi”

19.08.2017 [09:36]

Məlum olduğu kimi, 2017-2018-ci tədris ili üçün I-IV ixtisas qrupları üzrə keçirilən qəbul imtahanı başa çatıb. Öz bilik səviyyəsini sınaqdan keçirmiş və müsabiqədə iştirak etmək hüququ qazanmış abituriyentlər yığdıqları bala müvafiq olaraq ixtisas seçimi ediblər. Artıq ali təhsil müəssisələrinə qəbul olan abituriyentlərin qeydiyyatına başlanılıb. Odur ki, abituriyentlər avqustun 15-dən 25-dək sənədlərini daxil olduqları təhsil müəssisəsinə təqdim etməklə qeydiyyatdan keçməlidirlər.
Yeri gəlmişkən xatırladaq ki, bu dəfə imtahanda I ixtisas qrupu üzrə 7, II ixtisas qrupu üzrə 2, III ixtisas qrupu üzrə 3, IV ixtisas qrupu üzrə isə 3 nəfər olmaqla, ümumilikdə 15 abituriyent onlara təqdim olunmuş bütün test tapşırıqlarına düzgün cavab verib və maksimum nəticə - 700 bal toplayıb. Ənənəyə sadiq qalaraq, bu il də 700 bal toplayan abituriyentləri sizinlə tanış edirik. Belə ki, I ixtisas qrupu üzrə maksimum nəticə əldə edən rekordçulardan biri də Xırdalan şəhər 5 nömrəli tam orta məktəbin məzunu Jalə Məmmədovadır.
Məlumat üçün bildirək ki, bir sıra bilik yarışlarında qalib olan J.Məmmədova “Fənlərin dostluğu” olimpiadasında I yerə layiq görülüb, kimya üzrə respublika fənn olimpiadasının final mərhələsinə kimi yüksəlib. Bununla yanaşı, məktəbi fərqlənmə attestatı ilə başa vurub. Mayın 7-də keçirilən imtahanda 695 bal toplayan həmsöhbətimiz iyulun 22-də keçirilən ikinci imtahanda özünü bir daha sınayıb. Nəticədə, 700 bal toplamağa müvəffəq olub.
“İlk imtahanda yalnız bir suala cavab verə bilməmişdim. Hədəfim ən yüksək balı toplamaq idi. Odur ki, ikinci imtahana yenidən qatıldım. Öz savadımı bir daha sınaqdan keçirmək istədim və məqsədimə çatdım. Qeyd edim ki, ikinci imtahandakı suallar birinci ilə müqayisədə daha çətin idi” deyən abituriyent bu nəticə ilə də kifayətlənməyib daha böyük uğurlara can atdığını söyləyib. Onun sözlərinə görə, 700 bal toplayan abituriyent daha savadlıdır deyimi düzgün deyil: “650-dən yuxarı bal toplayan hər bir abituriyent yüksək potensiala malikdir. Sadəcə bu bir növ şans məsələsidir. Çünki diqqətsizlik ucbatından sualı düzgün oxumayıb və yaxud kodlaşdırmada da səhv etmək qaçılmazdır. Hesab edirəm ki, 700 bal toplamaqla kifayətlənməməli, daha böyük zirvələri fəth etməyə can atmalıyıq. Mənim də qarşıma qoyduğum bir neçə məqsədlər var ki, bunlardan birincisi təhsil alacağım Bakı Ali Neft Məktəbini fərqlənmə diplomu ilə bitirməkdir. Daha sonra dil bilgimi artırıb, xaricdə təhsilimi davam etdirmək istəyirəm. Gələcəkdə ən böyük arzum isə seçdiyim kimya mühəndisliyi ixtisasını ölkəmizdə tədris etməkdir. Bununla yanaşı, kiçik yaşlarımdan həm də rəsm çəkməyə böyük marağım vardı. Əfsuslar olsun ki, təhsilim ucbatından bu arzumu yarıda qoymalı oldum, amma bundan sonra yenidən davam etdirməyi düşünürəm”.
Müşfiqə BAYRAMLI

Paylaş:

Baxılıb: 542 dəfə