Müalicəni təbiətdə axtar

Bakı:

15 °C

94 %

3 m/s

Əlaqə

AZ RU EN

Ana səhifə / Sosial / Müalicəni təbiətdə axtar

Müalicəni təbiətdə axtar

16.03.2022 [10:16]

Yazın soyuqdəyməsindən və qripindən necə qorunaq?

MÜŞFİQƏ

“Min dərdin min bir dərmanı var” deyiblər. Respublikamız zəngin və rəngarəng bitki sərvətinə malikdir. Belə ki, Azərbaycanda dörd mindən artıq çiçəkli bitki növü yetişir. Onların əksəriyyəti müalicə əhəmiyyətlidir. Dərmanlarda olduğu kimi, bitkilərdə də ölçü, yan və əlavə təsirlər mövcuddur. Ona görə də həmin məqamlara diqqət yetirilməli və xəstəliyə uyğun bitkilər seçilməli, onlardan düzgün istifadə edilməlidir.

Ev şəraitində soyuqdəymənin müalicəsində ən səmərəli üsullardan biri preparat, məlhəm və məcun deyil, bol isti maye qəbul edilməsidir. Çay və ya dəmləmənin çox içilməsi toksinləri orqanizmdən sürətlə xaric edir. Qəbul edilən maye vitaminlərlə zəngin olanda müalicə daha yaxşı səmərə verir. Sağlam olmaq üçün qidalarla yanaşı, içilən çayların da çox böyük əhəmiyyəti var. Şəfalı bi?kilərdən dəmlənilmiş çayların içilməsi immuniteti gücləndirir, artıq çəkidən qoruyur, eyni zamanda, bəzi problemlərin aradan qalxmasına yardım edir.

Həkim-fitoterapevt İlahə Əliyeva soyuqdəymə çaylarından bir neçəsinin hazırlanma qaydası haqqında məlumat verib. Onun sözlərinə görə, ən yaxşı üsullardan biri ballı-limonlu çaydır: “Hazırlanma qaydası çox sadədir, dəmləməyə bir az limon şirəsi və 1 çay qaşığı bal əlavə edilməsi onu C vitamini ilə zənginləşdirir, mikrob və iltihab əleyhinə təsir göstərir. Diqqət edin ki, limon şirəsi və bal qaynar deyil, bir qədər soyumuş çaya əlavə olunmalıdır. Zəncəfilli-limonlu çay da soyuqdəymə zamanı çox yaxşı fayda verir. Yarım çay qaşığı xırdalanmış zəncəfil kökləri, hərəsindən 1 xörək qaşığı limon şirəsi və bal, bir çimdik darçın qarışdırılır, üzərinə çox qaynar olmayan isti su əlavə edilir. Onun qəbulu orqanizmi isidir, tərlədir və mikroblarla mübarizəyə kömək edir”.

Həkim-fitoterapevtin dediyinə görə, xəstəliklərin müalicəsində köməkçi vasitə olaraq istifadə edilən bitki çaylardan biri də çobanyastığıdır. Çobanyastığı xırıltılı səs və öskürək zamanı tənəffüs yollarını sakitləşdirən iltihab əleyhinə təsirə malik yağ ehtiva edir.

Demək olar ki, bütün xəstəliklərə qarşı istifadə olunması faydalıdır.

Soyuqdəymə xəstəlikləri zamanı kəklikotu çayı virusəleyhinə təsir edir, xəstənin vəziyyətini yüngülləşdirir, sağalmanı tezləşdirir: “Kəklikotu soyuqdəymə üçün ən məşhur dərman bitkilərindən biridir. Kəklikotu ilə çay və ya buxarın qəbulu boğaz ağrısı üçün faydalıdır. Çayı hazırlamaq üçün 1 çay qaşığı quru kəklikotunu 1 stəkan qaynar suda 20 dəqiqə dəmləmək lazımdır. Çaya bal və limon da əlavə etmək olar. Soyuqdəymə xəstəliklərinin ilk əlamətləri özünü büruzə verəndə bu çay çox yaxşı təsir edir, xəstəliyin inkişafının qarşısını alır. Gün ərzində bu çaydan 1-2 fincan içmək olar”.

Süfrənin əvəzsiz bitkilərdən biri olan nanənin faydalarını sadalamaqla bitməz. Mütəxəssis deyir ki, nanə çayının buxarı ilə nəfəs almaq burun tıxanıqlığını aradan qaldırır və sinusları açır: “C vitamini ilə zəngin bitkinin dəmlənməsi isə olduqca asandır. Bir çaynik qaynar suya 2-3 çay qaşığı qurudulmuş nanə yarpağı ataraq dəmlənməyə qoyuruq. 10-20 dəq dəmləndikdən sonra əldə etdiyimiz qarışığı süzürük. Çay əvəzinə içə bilərsiniz. Zövqə görə, nanə çayına limon da sıxa bilərsiniz. Şirin olmasını istəyirsinizsə, yarım çay qaşığı bal əlavə etmək kifayətdir”.

Soyuqdəymə və qrip ilə mübarizədə istifadə edilən ən təsirli və mikroböldürücü bitki yarpızdır. Yarpız tərləməni artıraraq qızdırmasalıcı təsir göstərir.

“Zəncəfilli-limonlu çay da soyuqdəymə zamanı çox yaxşı fayda verir. Yarım çay qaşığı xırdalanmış zəncəfil kökləri, hərəsindən 1 xörək qaşığı limon şirəsi və bal, bir çimdik darçın qarışdırılır, üzərinə çox qaynar olmayan isti su əlavə edilir. Onun qəbulu orqanizmi isidir, tərlədir və mikroblarla mübarizəyə kömək edir. Rəndələnmiş təzə zəncəfili bir stəkan suya tökün və qaynadın. Zəncəfili çox qaynatmayın, yoxsa dadı acılaşar. Bu səbəbdən qaynamağa başlar-başlamaz odun üzərindən götürün və dəmlənməsi üçün 5 dəqiqə gözləyin. Süzgəcdən süzüb üzərinə bal ilə limon suyu əlavə edərək için”, - deyə İ.Əliyeva söyləyib.

Qeyd olunub ki, bunlardan başqa itburnu çayı da soyuqdəymə zamanı çox faydalı və təsirli müalicə üsullarından biridir. Belə ki, qurudulmuş itburnu meyvələrini xırdalayın, 5 xörək qaşığı götürülərək termosda 1 litr qaynar suda dəmləyin, səhərdən başlayaraq 1 saat fasilə verməklə 1 stəkan için.

Paylaş:

Baxılıb: 845 dəfə