Biz niyə belə olduq?

Bakı:

21 °C

100 %

4 m/s

Əlaqə

AZ RU EN

Ana səhifə / Sosial / Biz niyə belə olduq?

Biz niyə belə olduq?

20.04.2022 [11:06]

Efirdə “xalq şousu” və ya aşınan dəyərlərimiz

İlhamə HƏKİMOĞLU

Yorğun bir günün ardından televizoru açırsan ki, dincələsən, pəh, görürsən ki, ən baxımlı kanallardan birində ailə dramı yaşanır. Böyük-kiçik qarışıb bir-birinə. Gəlin qayınananı söyür, qayınata gəlinə ağzına gələni deyir. Kimsə azyaşlı qızının zorlandığı iddiası ilə hay-küy salıb kompensasiya tələb edir. Namus bazarı açılıb, satan-satana qarışıb. Başqa kanalı açırsan, orada da eyni mənzərə. Bir dəfə olsa, deyərsən iş idi oldu. Di gəl ki, bu faciə hər gün yaşanır, insanlar məişət problemlərinin həllini aidiyyəti qurumlardan yox, Zaurla Xoşqədəmin proqramlarından gözləyirlər. Onlar da reytinq xatirinə bildikləri qədər vəziyyəti qızışdırır, efirə çıxanları ifadəmə görə üzr istəyirəm xoruz kimi döyüşdürməyincə əl çəkmirlər. Açılır sandıqlar, tökülür pambıqlar. Nə ar gözləyən olur, nə də abır duyğusu qalır. Kim kimə necə sataşıb, kim kimi necə kirlədib, ən xırda təfərrüatına qədər danışılır. Bir də hər axşam bu “xalq teatrını” həvəslə gözləyib, işini-gücünü bu proqramlara görə uyğunlaşdıran tamaşaçı kütləsi var. Nəfəs almadan dinləyən nənələr, babalar, xalalar, dayılar və özləri də fərqində olmadan bu tamaşaya şahidlik edən evin balaca fərdləri. O fərdlər ki, bu deyilən ayıbları dinləyə-dinləyə böyüyür, bunu normalmış kimi qəbul edir, başıpozuq bir nəsil yetişir. “Bu yanlışdır” desən, inanmayacaqlar, çünki “o boyda televizor” belə göstərib, bunu düz kimi təlqin edib. Televizorda görünməyi şərəf hesab edənlər var. Fərqi yoxdur orda necə göründün, söyüldün, təhqir edildin, ağladıldın və ya həyasızlıq edib bütün diqqətləri özünə cəlb etdin. Qadın kişi libasında, kişi qadın imicində özü ilə öyünür.

30-40 il əvvəl qızlar ana-atalarının yanında nişanlıları ilə danışmağa həya edər, hətta bəzi bölgələrdə kişilər böyüklərinin yanında xanımlarına xitab etməzdilər. Uşaqlarını böyüklərinin yanında əzizləməyə utanar, namus ləkəsi qanla yuyulardı. Qızları qoşulub qaçan atalar çöldə-bayırda başıaşağı gəzər, əksər hallarda gözə görünməzdilər. Qəlbi sınan atalar toy günü təyin edilsə də, hətta nəvələri olsa da, qızlarını bağışlamazdılar. Qayınana və qayınataya nəinki çəmkirmək mümkün deyildi, sözünün qabağına söz qoyulmazdı. Övladlar atalarını bir baxışından anlayıb xətalarını anlayar, bir kənara çəkilərdilər. Bəlkə də sərt görünə bilər, lakin elə bu sərt qaydalar bayraq kimi nəsildən-nəslə keçərək xalqı xalq olaraq yaşatdı.

İndi ata-analar övladlarının kiminləsə sevgili olmasını, kimdənsə uşağa qalmasını, cinsini dəyişmək istəyini, həmcinsləri ilə eşq macərasını həvəslə müzakirəyə çıxarırlar. Nə olursa olsun, təki pul qazansın. Kürəkəni döyən kim, ərinin, arvadının yataqda görüntülərini yayan kim, arvadını balasının gözü önündə baltalayan kim və bu xəbərləri ballandıra-ballandıra paylaşanlar, yayanlar kim. Hələ mən bəzi sosial şəbəkələrdə pul qazanmaq naminə soyunanları, ağlına gələni edənləri demirəm. Əxlaqsız namus, mütrüblər kişilik dərsi keçir. Zorlama, intihar xəbərləri reytinqlərdə üst sıralara çıxan gündən mənəviyyatımız ayaqlar altında sürünməyə başladı.

Vətənin bütövlüyü, xalqın qüdrəti ailənin möhkəmliyindən başlayır. Hədəfdə sərvət sayılacaq milli dəyərlərimiz dayanıb. Aşınırıq. Dəyər sistemimiz ciddi şəkildə zədələnib. Əmin olmaq olarmı ki, 20 ildən sonra cəmiyyətimiz daha qorxunc bir bataqlığın içində çabalamayacaq?

Milli kimliyimizi qoruyaraq dünyaya çıxmağı bacarmalıyıq. Əks halda var olsaq da, biz olmayacağıq.

Paylaş:

Baxılıb: 912 dəfə

Xəbər lenti

Hamısına bax