Müttəfiqliyə çevrilən dostluq

Bakı:

26 °C

57 %

7 m/s

Əlaqə

AZ RU EN

Ana səhifə / YAP xəbərləri / Müttəfiqliyə çevrilən dostluq

Müttəfiqliyə çevrilən dostluq

29.08.2024 [11:22]

Məlumdur ki, Azərbaycan Türk dünyasının güclənməsi, türkdilli dövlətlər arasında dostluq və qardaşlıq əlaqələrinin getdikcə daha da möhkəmlənməsi işinə hər zaman dəyərli töhfələr verib. Bu gün də Azərbaycan Respublikasının Prezidenti cənab İlham Əliyevin həyata keçirdiyi xarici siyasətin prioritet istiqamətləri arasında Türk dövlətlərinin bir birinə həm siyasi, həm də strateji baxımdan yaxınlaşmaları, türk dünyasının maraqlarının beynəlxalq səviyyədə təmin olunması və bu dövlətlər arasında möhkəm vəhdətin təmin olunması kimi məsələlər xüsusi yer tutur. Bu baxımdan Azərbaycan-Özbəkistan dostluq əlaqələrinin bu gün artıq yüksəldiyi müttəfiqlik səviyyəsi də bu sahədə həyata keçirilən siyasi strategiyanın effektivliyindən xəbər verir.

Azərbaycan və Özbək xalqları arasında dostluq əlaqələri tarixi köklərə bağlıdır. Hər iki ölkənin dövlət başçılarının şəxsi münasibətləri isə bu bağlılıq zəminində əlaqələrin inkişafını və dərinləşməsini təmin edib. O cümlədən Ölkə Prezidenti cənab İlham Əliyevin avqustun 22-də Özbəkistana etdiyi dövlət səfəri də ölkələrimiz və xalqlarımız arasında dostluq və əməkdaşlıq əlaqələrinin inkişafına növbəti böyük töhfədir. Avqustun 23-də Azərbaycan və Özbəkistan dövlət başçılarının mətbuata bəyanatla etdikləri çıxışlarında cənab Prezident İlham Əliyevin səfərinin nəticələrinə dair mühüm açıqlamalar yer alıb. Öz çıxışında dövlətimizin başçısı ilk növbədə son iki ildə Özbəkistana beş də səfər etdiyini diqqətə çatdırmış və bunun etibarlı münasibətlərin göstəricisi olduğunu qeyd etmişdir. Cənab Prezident bu gün həm Azərbaycanın, həm də Özbəkistanın müstəqil xarici siyasət kursu yürüdən, öz resurslarına güvənən, sosial-iqtisadi inkişafda böyük uğurlar qazanmış güclü müstəqil dövlətlər olduğunu və bu iki ölkə arasında dostluq və müttəfiqlik əlaqələrinin möhkəmlənməsinin birmənalı olaraq bütün Türk dünyasının güclənməsinə xidmət etdiyini vurğulamışdır. Dövlətimizin başçısı “Azərbaycan Respublikası ilə Özbəkistan Respublikası arasında müttəfiqlik münasibətləri haqqında Müqavilə”nin imzalanmasını böyük tarixi nailiyyət kimi dəyərləndirmiş və bildirmişdir ki, bu müqavilə iki ölkənin imzalaya biləcəyi ən yüksək beynəlxalq sənəddir. Bu sənədin imzalanması ilə iki qardaş xalq, iki müstəqil, güclü, suveren, nüfuzlu dövlət rəsmi müttəfiq oldular. Azərbaycan həmişə - istər işğal, istərsə də İkinci Qarabağ müharibəsi illərində və sonra da özbək xalqının qardaş dəstəyini hiss edib. Özbəkistan ilk ölkədir ki, Prezidentin təşəbbüsü ilə ölkəmizə mənəvi dəstək olmaqla yanaşı, həm də azad olunmuş ərazilərin bərpasında kömək edib. Bir il əvvəl, avqustun 23-də Azərbaycan və Özbəkistan prezidentləri Füzulidə Mirzə Uluqbəy adına 960 şagird üçün nəzərdə tutulan məktəbin açılışını etdilər.

Azərbaycan Prezidentinin Özbəkistana dövlət səfəri çərçivəsində ən müxtəlif mövzularda ətraflı müzakirələr aparılmış, ölkələrimiz arasında artıq mövcud olan strateji münasibətlərin daha da inkişaf etməsinə böyük töhfələr verəcək sənədlər imzalanmışdır. Cənab Prezident İlham Əliyevin qeyd etdiyi kimi, ölkələrimiz arasında ikitərəfli münasibətlərin inkişafına Azərbaycanda dövlət səviyyəsində daim xüsusi diqqət verilir. Əminliklə demək olar ki, bu səfər iki ölkə arasında münasibətlərin gələcək inkişafı üçün yeni perspektivlər açacaq.

Natiq Quluzadə

YAP Zəngilan rayon təşkilatının sədri

Paylaş:

Baxılıb: 600 dəfə