Azərbaycan idmanı yeni inkişaf dövrünə qədəm qoyub

Bakı:

18 °C

77 %

7 m/s

Əlaqə

AZ RU EN

Ana səhifə / YAP xəbərləri / Azərbaycan idmanı yeni inkişaf dövrünə qədəm qoyub

Azərbaycan idmanı yeni inkişaf dövrünə qədəm qoyub

05.05.2026 [13:43]

İdman ölkəsi kimi tanınan Azərbaycanın qazandığı uğurlar bu mövqeyini daha da möhkəmləndirir. İdmanın inkişafı üçün bütün zəruri tədbirlər həyata keçirilir. Belə ki, Dövlət Proqramlarının uğurlu icrası nəticəsində idmanın maddi-texniki bazası möhkəmlənir, o cümlədən mövcud idman qurğuları qorunub saxlanılır, yenidən qurulur, beynəlxalq standartlara uyğun yeni stadionlar, Olimpiya İdman kompleksləri tikilib istifadəyə verilir. Dövlətimizin idmanın inkişafına diqqət və qayğısı onun kütləviliyinin təmin edilməsində, gənc nəsildə idmana marağın artmasında əhəmiyyətli rol oynayır. Bu günlərdə dövlət başçısı İlham Əliyev Albaniyanın paytaxtı Tiranada keçirilmiş Avropa çempionatında komanda hesabında Avropa çempionu olan yunan-Roma güləşi və sərbəst güləş, həmçinin qadın güləşi üzrə medal qazanmış idmançıları və onların məşqçilərini qəbul edərkən bu məqamlara xüsusi diqqət yönəltdi. Vurğuladı ki, Avropa çempionatında komanda hesabında birinci olmaq, əlbəttə ki, böyük nailiyyətdir. Xüsusilə nəzərə alsaq ki, bu gün həm dünyada, həm Avropada güləş üzrə mübarizə daha gərgin keçir, bir çox ölkələrdən olan tanınmış güləşçilər böyük nəticələr göstərirlər və mübarizə də çox gərgin idi. Bizim idmançılarımız öz peşəkarlığını göstərərək rəqibləri ədalətli mübarizədə məğlub etmişlər. Bu, əlbəttə, bütün xalqımızı sevindirir və bir daha göstərir ki, güləşimiz uğurla inkişaf edir. Güləşimizin böyük ənənələri var və biz bu ənənələri yaşadırıq. Şadam ki, tanınmış güləşçilərlə bərabər gənc güləşçilərimiz də böyük nəticələr əldə edirlər. Bu onu göstərir ki, məşq prosesi, seleksiya prosesi düzgün qurulubdur: “Hər dəfə beynəlxalq yarışlarda bizim bayrağımız qaldırılanda bütün Azərbaycan xalqı qürur hissi keçirir, sevinir. Bu qələbə sevincini idmançılarımız xalqımıza bəxş edir və bu da öz növbəsində gənc nəsli vətənpərvərlik ruhunda tərbiyə etmək üçün çox önəmli amildir. İdman, ümumiyyətlə, cəmiyyətimizin ayrılmaz hissəsidir və xüsusilə son illər ərzində idmanda gedən müsbət proseslər, əlbəttə ki, hamımızı sevindirir”.

Nəsillərin dəyişdiyini, amma Azərbaycan idmanının uğurlarının dəyişmədiyini qeyd edən Prezident İlham Əliyev bildirdi ki, həm Olimpiya Oyunlarında, həm də dünya, Avropa çempionatlarında bizim idmançılarımız ölkəmizi ləyaqətlə təmsil edirlər: “Əlbəttə ki, uğurlarla bərabər məğlubiyyətlər də olur. Amma idmanda hər şey mümkündür. Əsas odur ki, idmançılarımızda qələbə əzmi çox güclüdür və bir daha ölkəmizin ümumi inkişafını əks etdirir. Bu gün qalib dövlət və qalib xalq kimi yaşayan dövlətimiz, xalqımız, o cümlədən idman uğurları ilə fəxr edir”.

Dövlətimizin başçısı bu məqamı da xüsusi qeyd etdi ki, milli komandada belə yaxşı ab-havanın, ruh yüksəkliyinin olmasına çox şaddır. Hamı vahid ailə kimi bir-birinin qələbəsinə sevinir və bu, çox qiymətlidir. Tanınmış idmançılar daim cəmiyyətin diqqət mərkəzindədirlər. İdmançılarımızın həm cəmiyyətdə, həm də məişətdə özlərini layiqincə aparmaları məni medallardan da çox sevindirir. Məşhur idmançıların, çempionların adi həyatda məhz bu səviyyəni saxlaya bilmədiklərinə dair tarixdə çoxlu nümunələr var və bir müddət sonra onlara idmançı kimi münasibət həmin səhvlər və ya yanlış hərəkətlər ucbatından pis istiqamətdə dəyişir: “Bizdə isə artıq dediyim kimi, ən azı mənim təqribən 30 ildir Milli Olimpiya Komitəsinə rəhbərlik etdiyim dövrdə xatırladığıma görə, belə hallar olmayıb. Bu, çox vacibdir. Medallardan heç də az əhəmiyyətli olmayan odur ki, çempionlar və mükafatçılar, həmçinin cəmiyyətdə və çalışdıqları kollektivlərdə yüksək mənəvi keyfiyyətlər nümayiş etdirsinlər. Bu belə də olmalıdır. Əlbəttə ki, burada çempionlarımızın - Olimpiya çempionlarının, Avropa çempionlarının və dünya çempionlarının nümunəsi var. Dediyim kimi, vaxtilə federasiyaya rəhbərlik edənlərə və məşqçilərə azarkeşlik etmişəm, bu gün isə onlar öz tələbələrinə azarkeşlik edirlər. Bu, bizim regionumuzda ənənələrin davamlılığıdır. Tarixdə ənənələr həmişə mühüm rol oynayıb və bu, Azərbaycan cəmiyyətində və bütövlükdə Qafqaz regionunda davam edir. Bu, bizi daha da yaxınlaşdırır”.

Azərbaycan idmanı inkişaf dövrünü yaşayır. Ölkəmizin ev sahibliyi etdiyi beynəlxalq idman yarışlarının fonunda Azərbaycanın hansı imkanlara malik olduğu özünü nümayiş etdirir. İdman tədbirləri, eyni zamanda, dostluq, əməkdaşlıq, birlik çağırışlarını özündə ehtiva edir.

Fəxrəddin Vəliyev,

YAP Şəmkir rayon təşkilatının sədri

Paylaş:

Baxılıb: 216 dəfə