Bizim siyasi əlaqələrimiz ən yüksək səviyyədədir

Bakı:

30 °C

51 %

3 m/s

Əlaqə

AZ RU EN

Ana səhifə / YAP xəbərləri / Bizim siyasi əlaqələrimiz ən yüksək səviyyədədir

Bizim siyasi əlaqələrimiz ən yüksək səviyyədədir

05.05.2026 [15:46]

Mansur Quliyev

YAP Ağdam rayon təşkilatının sədri

Azərbaycan Respublikasının Prezidenti İlham Əliyev ilə İtaliya Respublikasının Nazirlər Şurasının sədri Ciorcia Meloni arasında 2026-cı il mayın 4-də Bakıda keçirilmiş görüş və mətbuata verilən bəyanatlar iki ölkə arasındakı münasibətlərin strateji mahiyyətini bir daha nümayiş etdirdi. Dövlət başçısının “Bizim siyasi əlaqələrimiz ən yüksək səviyyədədir” fikri Azərbaycan–İtaliya tərəfdaşlığının bugünkü reallığını dəqiq ifadə edir.

Azərbaycan ilə İtaliya arasında münasibətlər uzun illər ərzində qarşılıqlı etimad, dostluq və səmərəli əməkdaşlıq prinsipləri əsasında inkişaf edib. Bu əlaqələr yalnız diplomatik çərçivə ilə məhdudlaşmayaraq, iqtisadiyyat, enerji, humanitar sahələr və beynəlxalq platformalarda qarşılıqlı dəstək müstəvisində də özünü qabarıq şəkildə göstərir. Xüsusilə enerji təhlükəsizliyi sahəsində həyata keçirilən iri layihələr Avropanın enerji xəritəsində Azərbaycanın rolunu daha da gücləndirib, İtaliyanı isə bu əməkdaşlıqda əsas tərəfdaşlardan birinə çevirib.

Prezident İlham Əliyevin bəyanatında vurğulanan yüksək səviyyəli siyasi əlaqələr, ilk növbədə, dövlətlərarası dialoqun intensivliyi və məzmunu ilə ölçülür. Son illər ərzində baş tutan qarşılıqlı səfərlər, keçirilən görüşlər və imzalanan sənədlər Azərbaycan–İtaliya münasibətlərinin strateji tərəfdaşlıq səviyyəsinə yüksəldiyini açıq şəkildə sübut edir. Bu baxımdan, Baş nazir Ciorcia Meloninin Azərbaycana səfəri də əlaqələrin daha da möhkəmləndirilməsi istiqamətində mühüm addım kimi qiymətləndirilməlidir.

İtaliya Azərbaycanın Avropada ən böyük ticarət tərəfdaşlarından biri olmaqla yanaşı, ölkəmizin həyata keçirdiyi iri enerji layihələrinin əsas iştirakçılarındandır. Bu əməkdaşlıq təkcə iqtisadi fayda ilə məhdudlaşmır, eyni zamanda siyasi dialoqun dərinləşməsinə də xidmət edir. Məhz bu qarşılıqlı maraqlar və ortaq məqsədlər siyasi münasibətlərin yüksək səviyyəyə çatmasını şərtləndirir.

Bununla yanaşı, iki ölkə arasında humanitar və mədəni əlaqələrin inkişafı da xüsusi əhəmiyyət daşıyır. Təhsil, mədəniyyət və turizm sahələrində həyata keçirilən birgə layihələr xalqlarımız arasında qarşılıqlı anlaşmanı daha da möhkəmləndirir. Bu isə siyasi münasibətlərin dayanıqlığını təmin edən əsas amillərdən biridir.

Müasir beynəlxalq münasibətlər sistemində etibarlı tərəfdaşlıq xüsusi önəm kəsb edir. Azərbaycan və İtaliya bu baxımdan bir-birinə güvənən, strateji məsələlərdə ortaq mövqe nümayiş etdirən ölkələr kimi çıxış edirlər. Prezident İlham Əliyevin səsləndirdiyi fikir də məhz bu reallığa əsaslanır və iki ölkə arasında formalaşmış münasibətlərin yüksək səviyyəsini ifadə edir.

Azərbaycan–İtaliya əlaqələri bu gün təkcə regional deyil, həm də qlobal miqyasda əhəmiyyətli tərəfdaşlıq modelinə çevrilmişdir. “Bizim siyasi əlaqələrimiz ən yüksək səviyyədədir” ifadəsi isə bu münasibətlərin mahiyyətini dolğun şəkildə əks etdirərək gələcək əməkdaşlıq üçün möhkəm zəmin yaradır.

Paylaş:

Baxılıb: 467 dəfə