Müzəffər və Qalib Ordumuz

Bakı:

26 °C

83 %

4 m/s

Əlaqə

AZ RU EN

Ana səhifə / YAP xəbərləri / Müzəffər və Qalib Ordumuz

Müzəffər və Qalib Ordumuz

22.06.2026 [15:11]

26 iyun Azərbaycan Respublikası Silahlı Qüvvələr Günü müstəqil Azərbaycanın dövlətçilik tarixində əlamətdar gün kimi xüsusi yer tutur və xalqımızın milli təhlükəsizliyinin, ərazi bütövlüyünün və suverenliyinin qorunmasında müstəsna rol oynayan Azərbaycan Ordusunun yaranmasını hər il böyük qürur hissi ilə qeyd edir. Bu tarix müstəqil dövlətimizin gücünü, xalqımızın yenilməz rəşadətini və milli birliyini təcəssüm etdirən əlamətdar tarixi gündür.

1918-ci il iyunun 26-da Azərbaycan Xalq Cümhuriyyətinin qərarı ilə ilk nizami hərbi hissə – Əlahiddə Azərbaycan Korpusu yaradıldı. Bu qərar müstəqil Azərbaycan dövlətinin milli ordusunun formalaşdırılması istiqamətində atılmış ən mühüm addımlardan biri oldu

Azərbaycan xalqının Ümummilli Lideri Heydər Əliyevin 22 may 1998-ci il tarixli Fərmanına əsasən, 26 iyun rəsmi dövlət bayramı – Silahlı Qüvvələr Günü elan edilmişdir. Bu qərar milli ordu quruculuğu tariximizin əhəmiyyətinin dövlət səviyyəsində təsdiqi idi.Xalqımız bu bayramı hər il təntənə ilə qeyd edir.

1969-cu ildə Heydər Əliyevin Azərbaycanda siyasi hakimiyyətə gəlməsi ölkənin bütün sahələrində olduğu kimi, hərbi kadr hazırlığı sahəsində də yeni mərhələnin başlanğıcını qoydu. Ulu Öndər Heydər Əliyev milli hərbi kadrların hazırlanmasını Azərbaycanın gələcəyi üçün strateji məsələ hesab edirdi.

Onun təşəbbüsü ilə 1971-ci ildə Cəmşid Naxçıvanski adına Hərbi Məktəb yaradıldı. Bu məktəb sonralar minlərlə peşəkar zabitin yetişməsində mühüm rol oynadı. Həmçinin Azərbaycan gənclərinin keçmiş SSRİ-nin nüfuzlu ali hərbi məktəblərində təhsil almasına geniş imkanlar yaradıldı. Bunun nəticəsində müstəqillik dövründə Azərbaycan Ordusunun peşəkar zabit korpusunun formalaşması üçün möhkəm zəmin yarandı.

Ulu Öndər Heydər Əliyev deyirdi ki, Azərbaycanın müstəqilliyini qorumağın əsas təminatçısı güclü ordudur. Bu müdrik fikir bu gün də dövlətimizin hərbi siyasətinin əsas istiqamətlərindən biri olaraq qalır.

Ölkəmizdə 2003-cü ildən etibarən Prezident, Silahlı Qüvvələrin Ali Baş Komandanı cənab İlham Əliyevin rəhbərliyi ilə Azərbaycan Ordusu keyfiyyətcə yeni inkişaf mərhələsinə qədəm qoymuşdur. Ordu quruculuğu dövlət siyasətinin prioritet istiqamətlərindən biri kimi müəyyən edilmiş, Silahlı Qüvvələrin maddi-texniki bazasının möhkəmləndirilməsi, hərbi qulluqçuların sosial müdafiəsinin gücləndirilməsi və döyüş hazırlığının artırılması istiqamətində mühüm tədbirlər həyata keçirilmişdir.

Hərbi büdcə dəfələrlə artırılmış, ən müasir silah və texnika alınmış, Azərbaycan Ordusu dünyanın qabaqcıl orduları sırasında layiqli yer tutmağa başlamışdır. Müasir pilotsuz uçuş aparatları, yüksək dəqiqlikli raket sistemləri, xüsusi təyinatlı qüvvələrin inkişafı və beynəlxalq standartlara uyğun hərbi hazırlıq ordumuzun döyüş qabiliyyətini əhəmiyyətli dərəcədə yüksəltmişdir.

Prezident İlham Əliyev dəfələrlə vurğulamışdır ki, Azərbaycan Ordusu bu gün dünyanın ən güclü orduları sırasındadır.

2020-ci ilin 44 günlük Vətən müharibəsində Azərbaycan Ordusunun qazandığı möhtəşəm Zəfər, tarixi Qələbə uzun illər aparılan məqsədyönlü ordu quruculuğu siyasətinin məntiqi nəticəsi oldu. Müzəffər Ali Baş Komandan cənab İlham Əliyevin müdrik rəhbərliyi altında Azərbaycan Ordusu işğal altında olan torpaqlarımızı azad etdi, ölkəmizin ərazi bütövlüyünü bərpa etdi və xalqımızın otuz illik həsrətinə son qoydu.

Şuşanın azad olunması hərbi tariximizin ən parlaq səhifələrindən biri kimi yadda qaldı. Azərbaycan əsgəri öz qəhrəmanlığı, peşəkarlığı və vətən sevgisi ilə bütün dünyaya örnək oldu. Vətən uğrunda canından keçən şəhidlərimizin əziz xatirəsi xalqımızın qəlbində əbədi yaşayacaqdır.

Azərbaycan Ordusunun əsas gücü yalnız müasir silahlarla deyil, həm də şəxsi heyətin yüksək mənəvi-psixoloji hazırlığı, Vətənə bağlılığı və döyüş ruhu ilə ölçülür. Azərbaycan əsgəri hər zaman dövlətinə, xalqına və torpağına sədaqətlə xidmət edir.

Vətən müharibəsində göstərilən qəhrəmanlıq nümunələri sübut etdi ki, Azərbaycan gəncliyi milli-mənəvi dəyərlərə bağlı, vətənpərvər və mübariz ruhda yetişmişdir. Məhz bu ruh ordumuzun əsas dayaqlarından biridir.

2021-ci il iyunun 15-də Azərbaycan və Türkiyə arasında imzalanan Şuşa Bəyannaməsi regionda təhlükəsizlik və əməkdaşlıq baxımından mühüm əhəmiyyət daşıyan tarixi sənəddir. Bəyannamədə mühüm məsələlər tam öz əksini tapmışdır.

Belə ki, Azərbaycan və Türkiyə arasında müttəfiqlik münasibətlərinin daha da möhkəmləndirilməsi, müdafiə və təhlükəsizlik sahəsində əməkdaşlığın genişləndirilməsi, hərbi təlimlərin keçirilməsi və müdafiə sənayesi sahəsində birgə fəaliyyət. Regional sabitliyin və təhlükəsizliyin təmin olunması, dövlətlərin suverenliyi, ərazi bütövlüyü və sərhədlərinin toxunulmazlığına qarşı təhdidlər zamanı qarşılıqlı dəstək mexanizmlərinin gücləndirilməsi. Bəyannamədə qeyd edilmişdir

Şuşa Bəyannaməsi Azərbaycan-Türkiyə qardaşlığının və strateji tərəfdaşlığının yeni mərhələyə yüksəlməsinin bariz nümunəsidir.

Bu gün Azərbaycan Ordusu regionun ən güclü hərbi qüvvələrindən biri hesab olunur. Müstəqil dövlətimizin təhlükəsizliyinin etibarlı təminatçısı olan Müzəffər Silahlı Qüvvələrimiz yüksək döyüş hazırlığına, müasir silahlanmaya və peşəkar kadr potensialına malikdir.

Böyük xilaskar Heydər Əliyevin yaratdığı Azərbaycan ordusunun bundan sonra da müdafiə qabiliyyəti daha da güclənəcəkdir.

Qadir İbrahimov

YAP Culfa rayon təşkilatının sədri

Paylaş:

Baxılıb: 483 dəfə