26 İyun – Azərbaycan Silahlı Qüvvələri Günü: Güclü ordunun şanlı yoluna baxış

Bakı:

25 °C

78 %

10 m/s

Əlaqə

AZ RU EN

Ana səhifə / YAP xəbərləri / 26 İyun – Azərbaycan Silahlı Qüvvələri Günü: Güclü ordunun şanlı yoluna baxış

26 İyun – Azərbaycan Silahlı Qüvvələri Günü: Güclü ordunun şanlı yoluna baxış

25.06.2026 [11:22]

Hər il iyunun 26-sı Azərbaycanda böyük qürur və ehtiram hissi ilə Silahlı Qüvvələr Günü kimi qeyd olunur. Bu əlamətdar gün Azərbaycan Ordusunun yaranmasının ildönümü olmaqla yanaşı, dövlətimizin müstəqilliyinin, suverenliyinin və təhlükəsizliyinin təmin edilməsində ordumuzun rolunu bir daha xatırladır. Azərbaycan Ordusu xalqımızın qürur mənbəyi, dövlətçiliyimizin ən mühüm dayaqlarından biridir.

Azərbaycan Xalq Cümhuriyyəti dövründə, 1918-ci il iyunun 26-da ilk milli hərbi hissələrin yaradılması haqqında qərar qəbul edilmişdir. Məhz bu tarix müasir Azərbaycan Ordusunun yaranmasının başlanğıcı hesab olunur. Sonralar Azərbaycan müstəqilliyini bərpa etdikdən sonra ümummilli lider Heydər Əliyev tərəfindən 26 iyun tarixi Silahlı Qüvvələr Günü elan edilmiş və bu gün dövlət səviyyəsində qeyd olunmağa başlanmışdır. Müstəqilliyin ilk illərində ölkəmiz mürəkkəb siyasi və hərbi vəziyyətlə üzləşmişdi. Ermənistanın Azərbaycana qarşı təcavüzü nəticəsində torpaqlarımızın bir hissəsi işğal edilmişdi. Həmin dövrdə nizami ordunun formalaşdırılması dövlət qarşısında duran əsas vəzifələrdən biri idi. Ümummilli lider Heydər Əliyevin hakimiyyətə qayıdışından sonra ordu quruculuğu sahəsində mühüm addımlar atıldı, hərbi hissələrin fəaliyyəti gücləndirildi, peşəkar zabit hazırlığına xüsusi diqqət yetirildi.

Azərbaycan Prezidenti, Ali Baş Komandan İlham Əliyev tərəfindən ordu quruculuğu dövlət siyasətinin prioritet istiqamətlərindən biri elan edildi. Müdafiə xərcləri artırıldı, ordumuz müasir silah və texnika ilə təchiz olundu, hərbi qulluqçuların sosial müdafiəsi gücləndirildi. Bütün bunlar Azərbaycan Ordusunun regionun ən güclü ordularından birinə çevrilməsinə şərait yaratdı. 44 günlük Vətən müharibəsi Azərbaycan Ordusunun gücünü və peşəkarlığını bütün dünyaya nümayiş etdirdi. Ali Baş Komandan İlham Əliyevin rəhbərliyi altında Azərbaycan Ordusu işğal altında olan torpaqlarımızın böyük hissəsini azad etdi. Şanlı qələbə nəticəsində xalqımızın 30 ilə yaxın davam edən torpaq həsrətinə son qoyuldu.

Vətən müharibəsi zamanı Azərbaycan əsgəri və zabiti yüksək döyüş ruhu, qəhrəmanlıq və vətənpərvərlik nümayiş etdirdi. Füzuli, Cəbrayıl, Zəngilan, Qubadlı, Şuşa və digər rayonların azad olunması ordumuzun peşəkarlığının və xalq-ordu birliyinin bariz nümunəsi oldu. Xüsusilə Şuşa şəhərinin azad edilməsi Azərbaycanın hərb tarixinə qızıl hərflərlə yazılmış qəhrəmanlıq salnaməsidir. Bu gün Azərbaycan Ordusu müasir hərbi texnologiyalarla təchiz olunmuş, yüksək döyüş qabiliyyətinə malik peşəkar silahlı qüvvədir. Hərbi təhsil müəssisələrində peşəkar zabitlərin hazırlanması, beynəlxalq hərbi əməkdaşlığın genişləndirilməsi və müasir döyüş təcrübəsinin öyrənilməsi ordumuzun daha da güclənməsinə xidmət edir.

Ordumuzun maddi-texniki bazasının möhkəmləndirilməsi, yeni hərbi hissələrin yaradılması, sərhədlərimizin etibarlı qorunması istiqamətində davamlı tədbirlər həyata keçirilir. Azərbaycanın müdafiə sənayesi də inkişaf edir və ölkəmiz bir sıra hərbi təyinatlı məhsulları artıq özü istehsal edir. Azərbaycan Ordusu yalnız ölkənin təhlükəsizliyini təmin etmir, eyni zamanda gənclərin vətənpərvərlik ruhunda tərbiyəsində mühüm rol oynayır. Məktəblərdə və ali təhsil müəssisələrində keçirilən tədbirlər, hərbi-vətənpərvərlik layihələri gənc nəslin Vətənə bağlılığını daha da gücləndirir. 26 İyun – Silahlı Qüvvələr Günü Azərbaycan xalqının qürur günüdür. Bu gün biz dövlətimizin müstəqilliyi və ərazi bütövlüyü uğrunda canlarından keçən şəhidlərimizi dərin ehtiramla yad edir, qazilərimizə minnətdarlığımızı bildiririk. Azərbaycan Ordusu bu gün ölkəmizin təhlükəsizliyinin, sabitliyinin və gələcəyinin etibarlı təminatçısıdır. Xalqımız əmindir ki, güclü dövlət və güclü ordu birliyi sayəsində Azərbaycan bundan sonra da öz inkişaf yolunu uğurla davam etdirəcək. Silahlı Qüvvələr Gününün qeyd olunması hər bir vətəndaşda vətən sevgisini, milli birlik və həmrəylik hissini daha da gücləndirir.

Azər Ağayev
YAP Tərtər rayon təşkilatının sədr müavini

Paylaş:

Baxılıb: 293 dəfə