Milli Mətbuat – Həqiqətin Səsi, Dövlətçiliyin Dayağı

Bakı:

24 °C

88 %

1 m/s

Əlaqə

AZ RU EN

Ana səhifə / YAP xəbərləri / Milli Mətbuat – Həqiqətin Səsi, Dövlətçiliyin Dayağı

Milli Mətbuat – Həqiqətin Səsi, Dövlətçiliyin Dayağı

21.07.2026 [14:26]

Selcan Nağdəliyeva

YAP Kəngərli rayon təşkilatının fəalı

Mətbuat hər bir dövlətin və cəmiyyətin inkişafında mühüm rol oynayır. O, ictimai fikrin formalaşmasına, vətəndaşların operativ və düzgün məlumatlandırılmasına, milli-mənəvi dəyərlərin təbliğinə, dövlətlə cəmiyyət arasında sağlam dialoqun qurulmasına xidmət edir. Müasir dövrdə informasiya ən böyük güclərdən birinə çevrilmişdir. Buna görə də medianın məsuliyyəti daha da artmış, həqiqətin müdafiəsi, obyektivliyin qorunması və dezinformasiyaya qarşı mübarizə əsas vəzifələrdən biri olmuşdur.

Ümummilli Lider Heydər Əliyev mətbuatın cəmiyyət həyatındakı rolunu yüksək qiymətləndirərək bildirirdi: "Mətbuatın əsas vəzifəsi həqiqəti xalqa çatdırmaqdır." Bu fikir Azərbaycan jurnalistikasının fəaliyyət prinsiplərini müəyyən edən əsas istiqamətlərdən biri kimi bu gün də öz aktuallığını qoruyur.

Müstəqil Azərbaycanda medianın inkişafı dövlət siyasətinin mühüm istiqamətlərindən biridir. Prezident İlham Əliyevin rəhbərliyi ilə media sahəsində ardıcıl islahatlar həyata keçirilmiş, informasiya mühitinin müasirləşdirilməsi, jurnalistlərin peşə fəaliyyətinin dəstəklənməsi və media institutlarının inkişafı istiqamətində mühüm addımlar atılmışdır. Prezident İlham Əliyev vurğulamışdır: "Azad mətbuat hər bir demokratik cəmiyyətin vacib atributudur." Bu yanaşma ölkəmizdə sağlam media mühitinin formalaşdırılmasına və peşəkar jurnalistikanın inkişafına verilən önəmin bariz nümunəsidir.

Xüsusilə 44 günlük Vətən müharibəsi dövründə Azərbaycan mediası informasiya cəbhəsində peşəkarlıq nümayiş etdirərək ölkəmizin haqq səsinin beynəlxalq ictimaiyyətə çatdırılmasında mühüm rol oynadı. Müharibədən sonrakı dövrdə isə Qarabağ və Şərqi Zəngəzurda həyata keçirilən bərpa və quruculuq işləri, Böyük Qayıdış Proqramı, beynəlxalq tədbirlər və Azərbaycanın qazandığı uğurlar media vasitəsilə geniş şəkildə ictimaiyyətə çatdırılır.

Rəqəmsal dövrün tələbləri medianın qarşısında yeni vəzifələr müəyyənləşdirir. Operativliklə yanaşı, məlumatın dəqiqliyi, obyektivliyi, qərəzsizliyi və etik prinsiplərə sadiqlik peşəkar jurnalistikanın əsas meyarları olaraq qalır. Cəmiyyətin etibarlı informasiya ilə təmin edilməsi dövlətin, xalqın və medianın ortaq maraqlarına xidmət edir.

Milli Mətbuat Günü yalnız jurnalistlərin peşə bayramı deyil, həm də söz azadlığına, həqiqətə və milli dəyərlərə verilən yüksək qiymətin ifadəsidir. Azərbaycan mətbuatı bu gün də dövlətçilik ənənələrinin möhkəmləndirilməsinə, milli maraqların qorunmasına və ölkəmizin beynəlxalq nüfuzunun daha da yüksəldilməsinə layiqli töhfələr verməyə davam edir.

Paylaş:

Baxılıb: 214 dəfə