Azərbaycan – Türk dünyası və Qafqaz arasında mənəvi körpü

Bakı:

22 °C

94 %

2 m/s

Əlaqə

AZ RU EN

Ana səhifə / YAP xəbərləri / Azərbaycan – Türk dünyası və Qafqaz arasında mənəvi körpü

Azərbaycan – Türk dünyası və Qafqaz arasında mənəvi körpü

21.09.2026 [16:39]

Azərbaycan Respublikasının Prezidenti İlham Əliyev sentyabrın 15-də Türk Dövlətləri Təşkilatının (TDT) Müsəlman Dini Rəhbərləri Şurasının üzvləri və müşahidəçilərindən, Yəhya Bakuvi Beynəlxalq Konfransının həmtəşkilatçılarından və Qafqaz Xalqları Ali Dini Şurasının üzvlərindən ibarət nümayəndə heyətini qəbul edib. Görüşdə dövlətimizin başçısı çıxış edərək Azərbaycanın Türk dünyası və Qafqaz məkanında tutduğu mövqeyə, dini liderlər arasında əməkdaşlığın əhəmiyyətinə, İslam həmrəyliyinin möhkəmləndirilməsinə və ölkəmizin zəngin tarixi-mədəni irsinə dair mühüm fikirlər səsləndirib. Bakıda TDT Müsəlman Dini Rəhbərləri Şurasının 7-ci toplantısının və böyük Azərbaycan mütəfəkkiri Seyid Yəhya Bakuviyə həsr olunmuş beynəlxalq konfransın eyni vaxtda keçirilməsi xüsusi əhəmiyyət daşıyır. Prezident İlham Əliyev bu iki tədbirin paralel keçirilməsinin rəmzi məna daşıdığını vurğulayıb. Çünki dini-mənəvi dəyərlərlə zəngin olan Azərbaycan tarix boyu müxtəlif mədəniyyətlərin və sivilizasiyaların qovuşduğu məkan kimi çıxış edib. Dövlət başçısı çıxışında Azərbaycan xalqının dünya mədəniyyətinə bəxş etdiyi böyük şəxsiyyətlərdən söz açıb. Nizami Gəncəvi, Xaqani Şirvani, İmadəddin Nəsimi, Seyid Yəhya Bakuvi, Şah İsmayıl Xətai və Məhəmməd Füzuli kimi böyük mütəfəkkir və şairlərin yaradıcılığının Azərbaycan xalqının zəngin mənəvi irsinin mühüm hissəsini təşkil etdiyi diqqətə çatdırılıb. Bu şəxsiyyətlərin irsi yalnız Azərbaycan üçün deyil, bütövlükdə İslam dünyası və dünya mədəniyyəti üçün böyük dəyər daşıyır. Seyid Yəhya Bakuvi irsi isə bu baxımdan xüsusi əhəmiyyətə malikdir. XV əsrdə yaşamış böyük alim və mütəfəkkirin fəlsəfi və mənəvi irsi insanın kamilliyi, mənəvi dəyərlər, qarşılıqlı hörmət və həmrəylik kimi ümumbəşəri prinsipləri özündə ehtiva edir. Bakıda onun irsinə həsr olunmuş beynəlxalq konfransın keçirilməsi Azərbaycan elmi və mədəni irsinin beynəlxalq səviyyədə təbliği baxımından mühüm hadisədir. Prezident İlham Əliyev çıxışında tədbirlərdə müxtəlif ölkələrdən dini liderlərin iştirak etməsini də yüksək qiymətləndirib. TDT-yə üzv ölkələrin dini rəhbərləri ilə yanaşı, Gürcüstan, Suriya və Şimali Qafqazın müxtəlif bölgələrindən dini nümayəndələrin Bakıda bir araya gəlməsi geniş coğrafiyanı əhatə edən mənəvi həmrəyliyin nümunəsi kimi təqdim olunub.Bu məqam Azərbaycanın Türk dünyası ilə Qafqaz arasında mühüm əlaqələndirici rolunu da diqqətə çatdırır. Azərbaycan həm Türk dünyasının ayrılmaz hissəsidir, həm də Qafqazın mühüm dövlətlərindən biridir. Dövlət başçısının qeyd etdiyi kimi, Azərbaycanın tarixi keçmişi bu iki coğrafiyanın qarşılıqlı əlaqələrini aydın şəkildə göstərir. Qafqaz Albaniyasının və Atabəylər dövlətinin tarixində Azərbaycanın mühüm rol oynaması ölkəmizin regionun siyasi, mədəni və sivilizasiya tarixindəki yerini nümayiş etdirir. Azərbaycanın Türk dünyası və Qafqaz xalqları ilə münasibətləri yalnız siyasi və iqtisadi əlaqələrlə məhdudlaşmır. Tarixi yaxınlıq, ortaq mənəvi dəyərlər, qarşılıqlı hörmət və humanitar münasibətlər bu əməkdaşlığın mühüm istiqamətlərindəndir. Bakıda müxtəlif ölkələrin dini liderlərinin bir araya gəlməsi də bu əlaqələrin mənəvi-humanitar ölçüsünü daha aydın nümayiş etdirir.Prezident İlham Əliyev müsəlman dini liderlərinin cəmiyyətlərə təsir imkanlarına da toxunaraq onların sülh, əməkdaşlıq, əmin-amanlıq və barışıq ideyalarının təşviqində mühüm rol oynadığını bildirib. Müasir dünyada dini liderlərin konstruktiv çağırışları xalqlar və cəmiyyətlər arasında qarşılıqlı anlaşmanın möhkəmləndirilməsinə mühüm töhfə verə bilər. Azərbaycanın bu istiqamətdəki fəaliyyəti ölkəmizin multikulturalizm və tolerantlıq ənənələri ilə də sıx bağlıdır. Müxtəlif dini konfessiyaların nümayəndələrinin sülh və qarşılıqlı hörmət şəraitində birgə fəaliyyət göstərməsi Azərbaycanın beynəlxalq aləmdə tolerantlıq məkanı kimi tanınmasına şərait yaradıb. Görüşün digər mühüm tərəfi Türk Dövlətləri Təşkilatı çərçivəsində dini əməkdaşlığın inkişaf etdirilməsi ilə bağlıdır. Dini liderlər arasında müzakirələrin və qarşılıqlı təcrübə mübadiləsinin genişləndirilməsi ortaq mənəvi dəyərlərin qorunmasına və Türk dünyasında həmrəyliyin daha da möhkəmlənməsinə xidmət edən istiqamətlərdən biri kimi qiymətləndirilə bilər. Sentyabrın 15-də Bakıda keçirilən görüş bir daha göstərdi ki, Azərbaycan Türk dünyası, İslam aləmi və Qafqaz arasında mənəvi və humanitar əlaqələrin inkişafında mühüm platformalardan birinə çevrilib. Belə tədbirlər yalnız dini və elmi dialoqun inkişafına deyil, həm də xalqlar arasında qarşılıqlı anlaşmanın, dostluğun və əməkdaşlığın möhkəmlənməsinə xidmət edir. Prezident İlham Əliyevin çıxışında səsləndirilən fikirlər Azərbaycanın tarixi-mədəni irsə, milli-mənəvi dəyərlərə və beynəlxalq dini dialoqa verdiyi əhəmiyyəti bir daha nümayiş etdirir. Bakının müxtəlif ölkələrdən dini və elmi xadimləri bir araya gətirməsi ölkəmizin beynəlxalq humanitar və mədəni dialoq məkanı kimi mövqeyinin daha da möhkəmləndiyini göstərir. Bu baxımdan, Türk Dövlətləri Təşkilatının Müsəlman Dini Rəhbərləri Şurasının 7-ci toplantısının və Yəhya Bakuvi Beynəlxalq Konfransının Bakıda keçirilməsi Azərbaycanın zəngin tarixi irsinin, İslam mədəniyyətinə töhfələrinin və Türk dünyası ilə mənəvi bağlarının beynəlxalq auditoriyaya çatdırılması baxımından mühüm hadisə kimi diqqət çəkir.

Lalə Məmmədova

YAP Samux rayon təşkilatının əməkdaşı

Paylaş:

Baxılıb: 92 dəfə