Güclü İqtisadiyyat, Sarsılmaz İdeologiya

Bakı:

19 °C

88 %

0 m/s

Əlaqə

AZ RU EN

Ana səhifə / YAP xəbərləri / Güclü İqtisadiyyat, Sarsılmaz İdeologiya

Güclü İqtisadiyyat, Sarsılmaz İdeologiya

08.10.2026 [15:34]

Yeni Azərbaycan Partiyasının (YAP) VIII Qurultayı ölkəmizin ictimai-siyasi həyatında, sözün əsl mənasında, yeni və şərəfli bir mərhələnin başlanğıcı kimi tarixdə dərin iz buraxdı. Azərbaycanın ərazi bütövlüyünün və suverenliyinin tam bərpasından sonra reallaşan bu möhtəşəm Qurultayda birbaşa nümayəndə kimi iştirak etmək, partiyamızın Sədri, Azərbaycan Respublikasının Prezidenti cənab İlham Əliyevin dərin məzmunlu və konseptual nitqini canlı dinləmək hər bir iştirakçı kimi mənim üçün də sonsuz qürur, eyni zamanda böyük məsuliyyət hissidir.

Qurultayda dövlətimizin başçısının proqram xarakterli çıxışı yalnız partiyanın gələcək fəaliyyət istiqamətlərini deyil, bütövlükdə Azərbaycanın yeni strateji inkişaf xəttini müəyyən etdi. Cənab Prezident öz nitqində İkinci Qarabağ müharibəsi və həyata keçirilən uğurlu antiterror tədbirləri nəticəsində qazanılan tarixi Zəfərin əhəmiyyətini xüsusi vurğuladı. Qeyd olundu ki, bu möhtəşəm qələbələr yalnız torpaqlarımızın işğaldan azad edilməsi deyil, həm də regional və qlobal səviyyədə tamamilə yeni bir siyasi reallığın bərqərar olması deməkdir. Bu reallıq Cənubi Qafqazda sülhün, təhlükəsizliyin və çoxşaxəli əməkdaşlığın möhkəm təməlini qoymuşdur.

Cənab Prezident İlham Əliyevin diqqət çəkdiyi ən mühüm məqamlardan biri milli təhlükəsizliyin təmin edilməsi, dövlət müstəqilliyinin qorunması və ideoloji təxribatlara qarşı mübarizə məsələsi oldu. Dövlət başçısı aydın şəkildə bildirdi ki, bu gün xarici risklər və qərəzli kampaniyalar qarşısında ən böyük sipər xalqımızın milli həmrəyliyi, gənclərimizin yüksək təhsil səviyyəsi və sarsılmaz vətənpərvərlik ruhudur. Yad ideoloji təsirlərdən uzaq, öz milli maraqlarına və tarixi dəyərlərinə söykənən müstəqil daxili və xarici siyasət Azərbaycanın dəyişməz prioritetidir.

Eyni zamanda, ölkəmizin iqtisadi müstəqilliyi və maliyyə dayanıqlılığı xüsusi vurğulandı. Xarici dövlət borcunun ümumi daxili məhsulun cəmi 5,6 faizinə endirilməsi dünya miqyasında nadir göstəricilərdən biri olmaqla yanaşı, Azərbaycanın gələcək nəsillər üçün qurduğu möhkəm təməlin bariz sübutudur. İqtisadi suverenlik bizim siyasi müstəqilliyimizin əsas dayağıdır və bu amil işğaldan azad olunmuş Qarabağ və Şərqi Zəngəzurun sürətlə bərpa edilməsinə, "Böyük Qayıdış" proqramının uğurla icra olunmasına imkan verir.

YAP-ın VIII Qurultayı bir daha sübut etdi ki, Yeni Azərbaycan Partiyası ümummilli lider Heydər Əliyevin ideyalarına sadiq qalaraq, cənab Prezident İlham Əliyevin rəhbərliyi ilə Azərbaycanı daha parlaq gələcəyə aparan əsas siyasi qüvvədir. Qurultay zalındakı yüksək əhval-ruhiyyə, nümayiş olunan yekdillik, sarsılmaz inam və həmrəylik hər birimizə gələcək fəaliyyətimizdə böyük stimul və ruh yüksəkliyi verdi.

Bir Qurultay iştirakçısı kimi tam əminliklə deyə bilərəm ki, bu tarixi forumda səsləndirilən fikirlər və müəyyən edilən hədəflər hər bir partiya üzvü üçün konkret yol xəritəsidir. Biz dövlətimizin qüdrətlənməsi, qazanılan tarixi Zəfərin əbədi olunması və yeni dövrün çağırışlarına layiqli cavab vermək üçün cənab Prezidentin ətrafında sıx birləşərək var qüvvəmizlə çalışmağa davam edəcəyik.

Elman Verdiyev,

YAP Naftalan şəhər “İslam Həsənzadə küçəsi 4” (Naftalan Bələdiyyəsi) ünvanı üzrə ərazi partiya təşkilatının sədri, Naftalan Bələdiyyəsinin sədri

Paylaş:

Baxılıb: 49 dəfə