Qarşılıqlı maraqlara əsaslanan əməkdaşlıq

Bakı:

23 °C

83 %

8 m/s

Əlaqə

AZ RU EN

Ana səhifə / YAP xəbərləri / Qarşılıqlı maraqlara əsaslanan əməkdaşlıq

Qarşılıqlı maraqlara əsaslanan əməkdaşlıq

15.10.2026 [16:17]

2026-cı il oktyabrın 12-də Azərbaycan Respublikasının Prezidenti cənab İlham Əliyev Kamboca Krallığının Baş naziri Hun Manet ilə görüşdən sonra mətbuata bəyanatla çıxış edib. Dövlət başçısı bəyanatında iki ölkə arasında mövcud siyasi münasibətlərdən, iqtisadi əməkdaşlığın genişləndirilməsi imkanlarından və beynəlxalq təşkilatlar çərçivəsində qarşılıqlı fəaliyyətin əhəmiyyətindən bəhs edib.

Möhtərəm Prezident Kambocanın Baş nazirini Azərbaycanda salamlayaraq, səfərin ikitərəfli münasibətlərin inkişafına mühüm töhfə verəcəyinə əminliyini ifadə edib. O, qeyd edib ki, Azərbaycan və Kamboca arasında dostluq və tərəfdaşlıq münasibətləri uzun tarixə malikdir. Hər iki ölkə Birləşmiş Millətlər Təşkilatı, Qoşulmama Hərəkatı və Asiyada Qarşılıqlı Fəaliyyət və Etimad Tədbirləri üzrə Müşavirə (AQEM) çərçivəsində fəal əməkdaşlıq edir və bir-birini dəstəkləyir.

Dövlət başçısı çıxışında iqtisadi əlaqələrin inkişaf etdirilməsini əsas istiqamətlərdən biri kimi vurğulayıb. Prezidentin sözlərinə görə, Azərbaycanla Kamboca arasında ticarət dövriyyəsi hazırda arzuolunan səviyyədə deyil. Bununla belə, mövcud imkanlar əməkdaşlığın genişləndirilməsi üçün əlverişli zəmin yaradır. Bu məqsədlə ticarət və investisiya sahələrində praktiki məsələləri araşdıraraq birgə işçi qrupunun yaradılması qərara alınıb. Həmçinin, iki ölkənin şirkətlərinin iştirakı ilə keçirilən biznes forumun qarşılıqlı əlaqələrin gücləndirilməsinə və yeni investisiya imkanlarının müəyyənləşdirilməsinə xidmət edəcəyi bildirilib.

Bəyanatda sənaye, turizm, təhsil, nəqliyyat və rəqəmsal transformasiya sahələrində əməkdaşlığın perspektivlərinə də xüsusi diqqət yetirilib. Cənab İlham Əliyev sovet dövründə yüzlərlə kambocalı tələbənin Azərbaycanda təhsil aldığını xatırladaraq, bu ənənənin bərpasının vacibliyini qeyd edib. Qarşılıqlı təhsil imkanlarının genişləndirilməsinin xalqlar arasında əlaqələrin möhkəmlənməsinə və qarşılıqlı anlaşmanın artmasına kömək edəcəyi vurğulanıb.

Ölkə başçısı Azərbaycanın dövlət xidmətləri sahəsində əldə etdiyi təcrübəyə də toxunub. “ASAN xidmət” modelinin Kambocada maraq doğurması bu sahədə əməkdaşlığın inkişafı üçün yeni imkanlar yaradır.

Cənab Prezident çıxışında hər iki ölkənin üzləşdiyi mina probleminə də diqqət çəkib. O bildirib ki, Azərbaycanın işğaldan azad edilmiş ərazilərində mina partlayışları nəticəsində 400-dən çox insan həlak olub və ya xəsarət alıb. Bu problemin həlli istiqamətində təcrübə və bilik mübadiləsinin, eləcə də birgə təlimlərin keçirilməsinin əhəmiyyəti vurğulanıb.

Beləliklə, cənab Prezident mətbuata verdiyi bəyanat Azərbaycan-Kamboca münasibətlərinin yeni istiqamətlər üzrə inkişaf etdirilməsi baxımından mühüm əhəmiyyət daşıyır. Səfər çərçivəsində aparılan müzakirələr və əldə olunan razılaşmalar iqtisadi, humanitar və siyasi əlaqələrin genişləndirilməsi üçün yeni imkanlar yaradır. Qarşılıqlı maraqlara və beynəlxalq hüquq prinsiplərinə əsaslanan əməkdaşlığın gələcəkdə konkret nəticələrlə möhkəmlənməsi hər iki ölkənin tərəfdaşlığının inkişafına xidmət edə bilər.

Nazim Bünyatov

YAP Ağcabədi rayon təşkilatının sədr müavini

Paylaş:

Baxılıb: 17 dəfə

Xəbər lenti

Hamısına bax