Qubadlıda yeni həyat: Zəfərin quruculuqla davam edən yolu

Bakı:

25 °C

53 %

5 m/s

Əlaqə

AZ RU EN

Ana səhifə / YAP xəbərləri / Qubadlıda yeni həyat: Zəfərin quruculuqla davam edən yolu

Qubadlıda yeni həyat: Zəfərin quruculuqla davam edən yolu

22.10.2026 [14:08]

Qubadlı Azərbaycanın tarixində özünəməxsus yeri olan qədim yaşayış məskənlərindən biridir. Bu torpaq zəngin tarixi, mədəni irsi və təbiəti ilə yanaşı, Vətən uğrunda göstərilən qəhrəmanlığın da ünvanıdır. Qubadlı Şəhəri Günü doğma torpağın azadlığına qovuşduğu tarixi, şəhidlərin əziz xatirəsini və bu gün burada həyata keçirilən böyük quruculuq işlərini ehtiramla yad etmək baxımından mühüm əhəmiyyət daşıyır.

Qubadlı rayonu 1993-cü il avqustun 31-də Ermənistan silahlı qüvvələri tərəfindən işğal edilmişdi. İşğal nəticəsində rayonun əhalisi doğma yurdlarından didərgin salındı, yaşayış məntəqələri dağıdıldı, tarixi və mədəni irsə ciddi ziyan vuruldu. Uzun illər ərzində qubadlılıların ən böyük arzusu öz doğma torpaqlarına qayıtmaq idi.

2020-ci ilin payızında başlanan Vətən müharibəsi bu arzunun gerçəkləşməsi üçün tarixi zəmin yaratdı. Azərbaycan Ordusunun həyata keçirdiyi uğurlu hərbi əməliyyatlar nəticəsində Qubadlı 2020-ci il oktyabrın 25-də işğaldan azad edildi. Qubadlının azad olunması Azərbaycanın ərazi bütövlüyünün bərpası istiqamətində mühüm qələbələrdən biri kimi xalqımızın yaddaşına həkk olundu.

Bu gün Qubadlıda tamamilə yeni bir mərhələ başlayıb. İşğaldan azad edilmiş ərazilərdə həyata keçirilən Böyük Qayıdış prosesi çərçivəsində Qubadlının bərpası və yenidən qurulması istiqamətində genişmiqyaslı layihələr icra olunur. Şəhərin müasir şəhərsalma prinsipləri əsasında qurulması, infrastrukturun yaradılması, sosial obyektlərin inşası və yaşayış məhəllələrinin salınması doğma yurda qayıdışın möhkəm əsaslarını formalaşdırır. Qubadlının yeni siması keçmişlə gələcəyin vəhdətini nümayiş etdirir. Şəhərin bərpası yalnız dağıdılmış binaların yenidən inşa edilməsi ilə məhdudlaşmır. Burada məqsəd insanların rahat və təhlükəsiz yaşayacağı, müasir imkanlara malik dayanıqlı şəhər mühiti yaratmaqdır.

2021-ci il oktyabrın 25-də Prezident İlham Əliyev tərəfindən imzalanan “Şərqi Zəngəzur iqtisadi rayonunda yerləşən Qubadlı şəhərinin Baş planının hazırlanması ilə bağlı tədbirlər haqqında” Sərəncam Qubadlı şəhərinin yenidən qurulmasını təmin edəcək mühüm sənəddir. Hazırda Qubadlı rayonunda mühüm infrastruktur layihələri uğurla həyata keçirilməkdədir. Bütün bu layihələrin həyata keçirilməsi Qubadlının sosial-iqtisadi inkişafını və rayon sakinlərinin öz doğma yurd yerlərinə qayıdışını təmin edir. 2023-cü ilin mayında isə Prezident İlham Əliyevin iştirakı ilə Qubadlı şəhərində ilk yaşayış məhəlləsinin, inzibati binanın, tam orta məktəbin, Mərkəzi Xəstəxananın, Xanlıq, Mahruzlu və Zilanlı kəndlərinin təməlqoyma mərasimləri keçirilib.

Qubadlı həm də öz təbii gözəllikləri və zəngin mədəni irsi ilə seçilir. Rayonun tarixi abidələrinin, mədəni irs nümunələrinin qorunması və bərpası Böyük Qayıdış prosesinin mühüm istiqamətlərindəndir. Bu torpaqlarda tariximizin izlərinin qorunması gələcək nəsillərə milli yaddaşın ötürülməsi baxımından böyük əhəmiyyət daşıyır. Qubadlının dirçəlişi Azərbaycanın işğaldan azad edilmiş ərazilərində həyata keçirilən genişmiqyaslı bərpa prosesinin mühüm nümunələrindən biridir. Vaxtilə işğalın ağır nəticələri ilə üzləşən şəhər bu gün inkişaf, yenilənmə və həyatın qayıdışını simvolizə edir.

Qubadlı Şəhəri Günü həm də xalqımızın keçdiyi Zəfər yolunu xatırladan əlamətdar gündür. Bu gün biz həm Qubadlının azadlığı uğrunda mübarizə aparan qəhrəmanlarımızı yad edir, həm də şəhərin gələcəyinə böyük inamla baxırıq. Qubadlı artıq yalnız keçmişin xatirəsi deyil. O, Azərbaycanın Zəfərinin canlı nümunəsi, Böyük Qayıdışın ünvanlarından biri və gələcəyə doğru inamla addımlayan şəhərdir.

Qubadlının azadlığı uğrunda canından keçən şəhidlərimizin xatirəsi daim uca tutulacaq, qazilərimizin qəhrəmanlığı heç vaxt unudulmayacaq. Bu gün yenidən qurulan Qubadlı isə həmin Zəfərin əbədi yadigarı kimi gələcək nəsillərə Azərbaycanın gücünü, iradəsini və Vətən sevgisini nümayiş etdirəcək.

Araz Xudadanov

YAP Sabunçu rayon təşkilatının sədri

Paylaş:

Baxılıb: 8 dəfə

Xəbər lenti

Hamısına bax