Qubadlının azadlığı – milli iradəmizin təntənəsidir

Bakı:

25 °C

53 %

5 m/s

Əlaqə

AZ RU EN

Ana səhifə / YAP xəbərləri / Qubadlının azadlığı – milli iradəmizin təntənəsidir

Qubadlının azadlığı – milli iradəmizin təntənəsidir

22.10.2026 [14:11]

Azərbaycan xalqının yaddaşında əbədi yaşayacaq əlamətdar günlərdən biri də 25 Oktyabr – Qubadlı Şəhəri Günüdür. Bu tarix xalqımızın mübarizə əzmini, Vətən sevgisini, milli birliyini və tarixi ədalətin bərpasını özündə ehtiva edir. Qubadlının azadlığı Azərbaycanın ərazi bütövlüyünün təmin olunması yolunda qazanılmış mühüm tarixi nailiyyətlərdən biridir.
1993-cü il avqustun 31-də Ermənistan silahlı qüvvələrinin hücumu nəticəsində Qubadlı rayonu işğal edildi. Doğma yurdlarından didərgin düşən sakinlər uzun illər ərzində ağır məhrumiyyətlərlə üzləşdilər. İşğal nəticəsində bölgənin tarixi-mədəni irsinə, yaşayış məntəqələrinə və sosial infrastrukturuna ciddi ziyan dəydi. Lakin bütün bu çətinliklər Qubadlı sakinlərinin doğma torpaqlarına qayıtmaq ümidini və Vətənə bağlılığını sarsıda bilmədi.
2020-ci il sentyabrın 27-də başlayan 44 günlük Vətən müharibəsi Azərbaycanın müasir tarixində yeni bir mərhələnin əsasını qoydu. Prezident, Müzəffər Ali Baş Komandan İlham Əliyevin rəhbərliyi ilə Azərbaycan Ordusu misilsiz qəhrəmanlıq və peşəkarlıq nümayiş etdirərək torpaqlarımızı işğaldan azad etdi. 2020-ci il oktyabrın 25-də Qubadlı şəhərinin azad olunması hərbi əməliyyatların gedişində mühüm dönüş nöqtələrindən biri oldu. Bu qələbə Azərbaycan əsgərinin cəsarətinin, xalqımızın sarsılmaz iradəsinin və dövlətimizin qətiyyətli siyasətinin parlaq təzahürü kimi tarixə yazıldı. Həmin gün Qubadlının azadlığı uğrunda canından keçən şəhidlərimizin xatirəsi xalqımızın qəlbində əbədi ehtirama çevrildi.
Azərbaycan Respublikası Prezidentinin 31 iyul 2023-cü il tarixli Sərəncamına əsasən, hər il oktyabrın 25-i Qubadlı Şəhəri Günü kimi qeyd olunur. Bu qərar tarixi Zəfərin əbədiləşdirilməsi və gələcək nəsillərə çatdırılması baxımından xüsusi əhəmiyyət daşıyır.
Bu gün işğaldan azad edilmiş ərazilərimizdə həyata keçirilən genişmiqyaslı bərpa və quruculuq işləri Azərbaycanın gücünü, iqtisadi imkanlarını və gələcəyə hesablanmış inkişaf strategiyasını nümayiş etdirir. Qubadlıda da müasir infrastrukturun yaradılması, yaşayış məntəqələrinin yenidən qurulması, yol və kommunikasiya sistemlərinin inkişafı istiqamətində mühüm addımlar atılır.
Qubadlının gələcəyi, ilk növbədə, onun sakinlərinin doğma torpaqlarına qayıtması, burada firavan həyatın bərqərar olması ilə bağlıdır. Uzun illər yurd həsrəti ilə yaşayan insanlar üçün Qubadlının yenidən qurulması yalnız infrastruktur layihəsi deyil, həm də tarixi ədalətin və mənəvi bütövlüyün tamamlanması deməkdir.

Böyük Qayıdış proqramı çərçivəsində həyata keçirilən tədbirlər işğaldan azad olunmuş ərazilərin ölkənin iqtisadi və sosial həyatına yenidən inteqrasiyasına xidmət edir. Qubadlıda yaradılan yeni imkanlar əhalinin məşğulluğunun artırılması, sahibkarlığın inkişafı və gələcək nəsillərin doğma torpaqlarda yaşayıb fəaliyyət göstərməsi baxımından böyük əhəmiyyət daşıyır. Əminliklə demək olar ki, yenidən qurulan Qubadlı gələcəkdə müasir şəhərsalma nümunələri, inkişaf etmiş infrastrukturu və canlanan sosial həyatı ilə Azərbaycanın tərəqqisinə töhfə verən bölgələrdən birinə çevriləcək.
25 Oktyabr – Qubadlı Şəhəri Günü Azərbaycan xalqının qəhrəmanlıq salnaməsinin mühüm səhifəsidir. Bu tarix bizə bir daha xatırladır ki, milli birlik, dövlətə sədaqət və Vətən sevgisi ən çətin sınaqlardan belə qalib çıxmağa imkan verir.

Gündüz Alıkişiyev

YAP Tərtər rayon təşkilatının məsləhətçisi

Paylaş:

Baxılıb: 12 dəfə

Xəbər lenti

Hamısına bax