Dünyada 6G... - bizdə isə 5G hazırlanır...

Bakı:

13 °C

94 %

5 m/s

Əlaqə

AZ RU EN

Ana səhifə / Yeni texnologiyalar / Dünyada 6G... - bizdə isə 5G hazırlanır...

Dünyada 6G... - bizdə isə 5G hazırlanır...

28.01.2022 [10:02]

Strategiyanın təsdiqlənməsi prosesinin sürətlənməsi doğru olar və bu vacibdir

Nicat DİLQƏMLİ

Texnologiyanın işıq sürətilə inkişaf etdiyi dövrdə ölkəmizdə bu sahədə müəyyən boşluqların, çatışmazlıqların olduğunu görmək təəssüf doğurucudur.

Sözügedən sahəyə dövlət tərəfindən yüksək diqqət ayrılmasına baxmayaraq, sözün həqiqi mənasında hələ də yerimizdə saymağa davam edirik. Belə ki, hələ dünən Radiotezliklər üzrə Dövlət komissiyası tərəfindən Azərbaycanda tezlik zolaqlarının ayrılması cədvəlini və radiotezliklər spektrinin perspektiv istifadə planları təsdiq olunub. Bu barədə Rəqəmsal inkişaf və nəqliyyat nazirinin müavini Rövşən Rüstəmov “Azərbaycanda rəqəmsal inkişaf və nəqliyyat sahəsi üzrə prioritetlər” adlı seminarda çıxış edərkən deyib. Onun sözlərinə görə, bu, qarşıdakı 10 il ərzində ölkədə keçid metodologiyanın hansı tezliklərlə, hansı formada inkişaf edəcəyinin yol xəritəsidir.

“Bu gün biz artıq yeni bir çağırışın qarşısındayıq. Yəni 5G texnologiyanın tətbiqi üçün hansı tezliklər ayrılmalıdır? Dünyada buna fərqli yanaşmalar var. Uzun bir araşdırmalardan sonra artıq ölkənin 5G strategiyası demək olar ki, hazırlanıb və hazırda bu strategiya razılaşdırılma və müzakirə mərhələsindədir”, - deyə R.Rüstəmov qeyd edib.

Hələ yeni-yeni bizə gəlib çatan 5G bizim üçün hansı imkanları yaradacaq, hansı sahələrin inkişafına dəstək verəcək?

Məsələ ilə bağlı suallarımızı cavablandıran Azərbaycan İnternet Forumunun prezidenti Osman Gündüz bildirib ki, bu texnologiyalar öz gəlişi ilə digər yüksək texnologiyalara söykənən ayrı-ayrı sahələrin də inkişafını stimullaşdırır: “Artıq dünyada, qonşu ölkələrdə 5G ilə bağlı xeyli irəliləyişlər var. Belə ki, bu şəbəkəni test rejimində işə salanlar var. Sözügedən texnologiyalar yalnız 5G, 6G-dən ibarət deyil, həm də özü ilə ayrı-ayrı innovasiyaları dartıb gətirir. 5G tətbiqi digər texnologiyalara söykənən sahələrin inkişafını stimullaşdırır, ağıllı şəhərlər, ağıllı kəndlər 5G-nin üzərində qurulur, bunların tətbiq edilməsi digər sahələrin də inkişafını təmin edəcək bir addımdır”.

O.Gündüz bu işlərin sürətlənməsinin əhəmiyyətini də vurğulayıb: “Biz regionun qabaqcıl ölkəsiyik və buna görə də 5G ilə bağlı tezliklərin hazırlanması istiqamətində bəlli tezliklər tələb olunur. Bu tezliklər də müvafiq qurumlar tərəfindən istifadə üçün hazırlanmalıdır və dövlət qurumu da müsabiqə təşkil etməlidir, auksiona çıxarılmalıdır. Və ya mobil operatorlara təklif olunmalıdır və müsabiqə nəticəsində tezliklər verilməlidir. Ona görə də hesab edirəm ki, strategiyanın təsdiqlənməsi prosesinin sürətlənməsi doğru olar və bu vacibdir”.

Paylaş:

Baxılıb: 1665 dəfə