Yerusəlimdə Azərbaycan multikulturalizmi modeli təqdim olunub

Bakı:

8 °C

81 %

4 m/s

Əlaqə

AZ RU EN

Ana səhifə / Xəbər lenti / Yerusəlimdə Azərbaycan multikulturalizmi modeli təqdim olunub

Yerusəlimdə Azərbaycan multikulturalizmi modeli təqdim olunub

28.01.2026 [14:30]

Bakı Beynəlxalq Multikulturalizm Mərkəzinin icraçı direktoru Rəvan Həsənov İsrailin Yerusəlim şəhərində keçirilən Avropa Ravvinləri Konfransının 70-ci Yubiley tədbirində iştirak edib.

Rəvan Həsənov konfrans çərçivəsində təşkil olunan “İnam, təhlükəsizlik və birgə dinc yanaşı yaşama” (Faith, Security and Shared Peaceful Coexistence) mövzusunda panel iclasında məruzə ilə çıxış edib. Panel iclası tanınmış siyasi müxbir və “The Daily Edition” proqramının aparıcısı Ofer Hadadinin moderatorluğu ilə keçirilib. Müzakirələrdə həmçinin İsrailin Diaspor və İrs naziri Amiçai Eliyahu, Almaniyanın İnsan Hüquqları üzrə Beynəlxalq Cəmiyyətinin və Beynəlxalq Dini Azadlıq İnstitutunun prezidenti yepiskop Tomas Paul Şirrmaxer, İsraildəki Druz icmasının ruhani lideri Şeyx Müvəffəq Tarif, eləcə də Qüdsün köməkçi yepiskopu Monsinyor Rafic Nahra çıxış ediblər.

İcraçı direktor çıxışı zamanı bildirib ki, Azərbaycanda multikulturalizm yalnız dövlət siyasəti deyil, eyni zamanda cəmiyyətin həyat tərzidir. O qeyd edib ki, ölkəmizdə müxtəlif etnik və dini icmalar – yəhudilər, xristianlar, müsəlmanlar və digər azlıqlar əsrlər boyu sülh, qarşılıqlı hörmət və etimad şəraitində birgə yaşayırlar. Rəvan Həsənov xüsusilə vurğulayıb ki, yəhudi icması Azərbaycanda min illərdir təhlükəsizlik və azadlıq mühitində yaşayır, ölkədə mövcud olan zəngin yəhudi mədəni irsi, sinaqoqlar və dini icmalar bu dinc birgəyaşayış modelinin bariz nümunəsidir.

O, çıxışında beynəlxalq müstəvidə artan təhlükəsizlik çağırışlarına, dinin siyasiləşdirilməsi tendensiyasına, eləcə də ksenofobiya, islamofobiya və antisemitizm kimi halların yayılmasına da toxunub. Rəvan Həsənov qeyd edib ki, dinin siyasi məqsədlər üçün sui-istifadə edilməsi və süni şəkildə yaradılan ekstremist hərəkatlar müxtəlif dinlər arasında etimadsızlığı və uçurumu daha da dərinləşdirir. Bu problemlərin aradan qaldırılması üçün beynəlxalq təşkilatların, dini mərkəzlərin və dövlətlərin koordinasiyalı və birgə fəaliyyətinin vacibliyini xüsusi vurğulayıb.

Rəvan Həsənovun çıxışı Azərbaycanın multikulturalizm siyasətinin beynəlxalq miqyasda uğurla təqdimatı, eləcə də dinlərarası harmoniyanın möhkəmləndirilməsinə yönəlmiş əhəmiyyətli töhfə kimi dəyərləndirilib. Onun səsləndirdiyi mesajlar sülh, qarşılıqlı hörmət və ortaq dəyərlər əsasında gələcək əməkdaşlıq üçün güclü mənəvi çağırış kimi yadda qalıb.

Tədbirin sonunda Azərbaycanın multikultural dəyərlərə, dinlərarası harmoniyaya verdiyi töhfəyə və ölkənin tolerantlıq modelinə göstərilən yüksək ehtiramın ifadəsi olaraq Rəvan Həsənova yəhudi icmaları adından imanın, tövbənin və ruhani oyanışın simvolu Şofar musiqi aləti təqdim olunub.

Paylaş:

Baxılıb: 125 dəfə