Beynəlxalq arenada Sumqayıt imzası – gənc riyaziyyatçı ilə MÜSAHİBƏ

Bakı:

5 °C

81 %

4 m/s

Əlaqə

AZ RU EN

Ana səhifə / Xəbər lenti / Beynəlxalq arenada Sumqayıt imzası – gənc riyaziyyatçı ilə MÜSAHİBƏ

Beynəlxalq arenada Sumqayıt imzası – gənc riyaziyyatçı ilə MÜSAHİBƏ

26.02.2026 [18:03]

Sumqayıt şəhər 23 nömrəli tam orta məktəbinin şagirdi beynəlxalq və yerli olimpiadalarda qazandığı uğurlarla diqqət çəkir. Onun sözlərinə görə medal sevinc gətirsə də, əsas qazanc dəyişən düşüncə tərzi və qazandığı təcrübədir. Gənc riyaziyyatçı ilə uğur yolundan, beynəlxalq yarış təcrübəsindən və gələcək planlarından danışdıq.

– Olimpiadalarda qazandığın medallar sənin üçün nə ifadə edir? İlk uğurunu xatırlayırsanmı?
– Medallar məni sevindirir, çünki çəkilən zəhmətin real nəticəsidir. Amma mənim üçün əsas qazanc medal deyil, düşünmə tərzimin dəyişməsidir. İlk uğurumda həyəcan daha çox idi. O zaman başa düşdüm ki, çətin sual qorxulu deyil, sadəcə sistemli yanaşma tələb edir.

– Beynəlxalq yarışlara hazırlaşarkən gündəlik dərs və məşq rejimin necə olur?
– Hazırlıq dövründə günüm planlı keçir: mövzu təkrarı, çətin sualların həlli və vaxtla sınaqlar. Bəzi günlər istədiyim kimi alınmır, səhvlər çox olur. Amma məhz o günlər inkişaf etdirir. Mənim üçün əsas motivasiya özümü keçməkdir.

– Xarici ölkələrdə keçirilən olimpiadalarda iştirak etmək sənə hansı təcrübələri qazandırıb?
– Xarici yarışlar mənə göstərdi ki, riyaziyyatın dili universaldır. Fərqli ölkələrdən olan şagirdlərlə eyni problemi həll edəndə anlayırsan ki, səviyyə qlobaldır. Bu həm özgüvən yaradır, həm də məsuliyyət hissini artırır.

– Yüksək rəqabət şəraitində qərar vermək bacarığını necə inkişaf etdirmisən?
– Bu bacarıq çoxlu sınaq və analizlə formalaşıb. Bəzən asan sualı buraxıb çətinə keçmişəm və vaxt itirmişəm. Sonra səhvlərimi analiz etmişəm. İndi əvvəlcə sakitləşir, sonra seçim edirəm.

– Komanda yarışlarında ən vacib hesab etdiyin keyfiyyətlər hansılardır?
– Qarşılıqlı hörmət və açıq ünsiyyət. Kim daha tez düşünür yox, kim daha dəqiq izah edir – bu daha önəmlidir.

– 23 nömrəli məktəbdə təhsil almaq və müəllimlərinin dəstəyi uğurlarına necə təsir edib?
– Məktəbdə müəllimlərim mənə inanıb. Bu inam insanı daha məsuliyyətli edir. Dəstək olanda daha çox çalışmağa meyl yaranır.

– Sumqayıtı beynəlxalq olimpiadalarda təmsil etmək sənə hansı hissləri yaşadır?
– Bu, böyük qürur hissidir. Sənin adınla yanaşı şəhərinin adı çəkilir. Bu isə insanı daha ciddi və məsuliyyətli olmağa vadar edir.

– Səncə, Sumqayıtda riyaziyyata marağın artırılması üçün hansı təşəbbüslər həyata keçirilə bilər?
– Riyaziyyat klubları, açıq dərslər və real layihələr təşkil olunsa maraq daha da artar. Şagird problem həllinin praktik nəticəsini görəndə motivasiya yüksəlir.

– Gələcəkdə riyaziyyat və memarlıq sahələrini birləşdirmək istəyirsən. Bu qərar necə formalaşıb?
– Mənim üçün riyaziyyat və memarlıq bir-birini tamamlayır. Hesablamalar və forma birlikdə olanda həm məntiq, həm də yaradıcılıq işləyir. Bu istiqamət mənə daha maraqlı və perspektivli görünür.

– Sənin kimi uğur qazanmaq istəyən şagirdlərə nə tövsiyə edərdin?
– Məsləhətim sadədir: tez nəticə gözləməyin. Çətinlik normaldır. Hər səhvi analiz edin. Davamlılıq istedaddan daha güclüdür.

Paylaş:

Baxılıb: 36 dəfə