Heydər Əliyev
yeni azerbaycan logo

Ana səhifə / Xəbər lenti / Zəfər paradı tarixi Qələbəmizin nidası oldu

Zəfər paradı tarixi Qələbəmizin nidası oldu

10.12.2021 [17:38]

 “44 günlük İkinci Qarabağ müharibəsində tarixi Qələbəmiz 30 illik işğal dövrünün reallıqlarının, Azərbaycan dövlətinin, Prezident İlham Əliyevin qətiyyətinin,  Azərbaycan Ordusunun gücünün, xalqımızın birliyinin təqdimatı oldu. 30 ildə Azərbaycan ədalətin, beynəlxalq hüququn norma və prinsiplərinin tətbiqi, BMT Təhlükəsizlik Şurasının qətnamələrinin icrası tələbini dünyanın ən nüfuzlu təşkilatlarının, o cümlədən  BMT-nin tribunasından səsləndirdi. Amma 30 ilə yaxın dövrdə qəbul olunan qətnamələr  kağız üzərində saralaraq nə zamansa icra olunacağını gözlədi.   Dövət başçısı, Müzəffər Ali Baş Komandan İlham Əliyev daim bu  bəyanatla da  çıxış edirdi ki, qətnamələrin  icrası üçün vahid mexanizm olmalıdır.  Bəzi dövlətlər  üçün bu qətnamələr  bir neçə saat ərzində icra edilir, Azərbaycana gəldikdə isə 25 ildən artıqdır ki, gözləyirik. Münaqişənin həllində sülh danışıqlarına üstünlük verən Azərbaycan 30 ilə yaxın dövrdə Ermənistanın danışıqlara sadəcə imitasiya naminə qatıldığını görür və bu gedişlərin sonunu gözləyirdi. Amma işğalçı Ermənistan havadarlarının dəstəyinə arxalanaraq bu prosesin  ömürlük olacağını düşünür, hələ  bir qədər də irəli gedərək yeni ərazilər uğrunda müharibə planı hazırlayırdı. Artıq bütün bu proseslər arxada qalıb. Azərbaycan Vətən müharibəsində tarixi Qələbəsi ilə həm işğala, həm Ermənistanın yaratdığı  miflərə, həm də dünyanın bu məsələdə ikili standartlara əsaslanan siyasətinə son qoydu.”

  Bu fikirləri Yeni Azərbaycan Partiyası Xətai rayon təşkilatının sədri, siyasi elmlər doktoru Vüqar Rəhimzadə KİV-ə açıqlamasında bildirib.   

     V.Rəhimzadə qeyd edib ki, Azərbaycan İkinci  Qarabağ savaşında həm döyüş meydanında, həm də informasiya cəbhəsində üstünlüyünü dünyaya nümayiş etdirdi: “İşğalçı dövlət heç bir sahədə Azərbaycanla rəqabət aparmaq imkanında deyildi.   Ermənistan xarici ianələrdən asılı olan kasıb ölkədir. İşğalçı dövlətin büdcəsinin 70-80 faizi erməni lobbisinin ayırdığı vəsaitlər hesabına formalaşır. Belə bir vəziyyətdə olan dövlətin güclü iqtisadiyyatdan və ordudan danışması heç zaman inandırıcı görünə bilməz. 44 günlük İkinci Qarabağ müharibəsi bu  məqama da işıq saldı. Ermənistan silahlı qüvvələrinin məhv edilmiş, yaxud qənimət kimi götürülmüş hərbi texnikasının  ümumiləşdirilmiş məbləğini nəzərə alsaq kasıb ölkənin bu qədər vəsaiti haradan aldığı maraq doğurmaya bilməzdi. Ölkə Prezidenti 44 günlük Vətən  müharibəsi dövründə xarici mətbuata çoxsaylı müsahibələrində də bu suala cavab tapmaq istədi. Ermənistanın himayədarları tərəfindən silahlandırıldığı   Azərbaycana  və dünyaya çox yaxşı bəlliddir. Lakin bu  suala cavabı  məhz onların özlərinin dilindən eşitməklə  ikili oyunlara son qoymağın zamanı olduğunu həmin dövlətlərə bir daha çatdırmaq istədik.  Xalqımız əmin idi  ki, yeganə problemimiz olan Dağlıq Qarabağ münaqişəsi tezliklə öz ədalətli  həllini tapacaq, hər sahədə davamlı uğurları ilə  seçilən, inkişaf strategiyası nümunə göstərilən Azərbaycan daha da qüdrətlənəcək, inkişaf edəcək.  Ən yüksək tribunalardan səsləndirilən “Bir qarış torpağımız belə düşmənə verilməyəcək”, “Azərbaycan xalqının səbri tükənməz deyil” kimi bəyanatlar  işğalçı Ermənistana və ona dəstək olan dövlətlərə ciddi mesaj kimi ünvanlanırdı.”

  “Azərbaycan 44 gündə yazdığı tarixlə haqqı-ədaləti, beynəlxalq hüququ bərpa etdi, işğala son qoydu, “Dağlıq Qarabağ münaqişəsi” ifadəsi artıq yoxdur” söyləyən YAP Xətai rayon təşkilatının sədri bildirib ki,  ölkə Prezidenti, Ali Baş Komandan İlham Əliyevin daim  hücum əmrini gözləyən Azərbaycan Ordusu göstərdiyi şücaəti ilə bir daha işğalçı Ermənistana yerini göstərdi, diz çökdürdü, kimin haqlı, kimin saxta tarix yazaraq yalanları ilə həqiqəti inkar etmək yolu tutduğunu dünyaya nümayiş etdirdi.

  Vüqar Rəhimzadə qeyd edib ki,  Vətən müharibəsində tarixi Zəfərimiz  dövlət başçısı, Müzəffər Ali Baş Komandan İlham Əliyevin  “Qarabağ Azərbaycandır  və nida işarəsi” bəyanatının, Zəfər paradı isə  tarixi Qələbəmizin nidası oldu.  Ötən ilin bu günü, 10 dekabrda keçirilən   Zəfər paradı Azərbaycan xalqının yenilməzliyini, məğrurluğunu, tarixinə, torpaqlarına sahib çıxan xalq olduğunu bir daha dünyaya nümayiş etdirdi. Paradda Azərbaycan Ordusunun Ermənistan silahlı qüvvələrinin məhv etdiyi, yaxud qənimət kimi götürdüyü  hərbi texnikalarının bir qismi də   nümayiş olundu.

Zəfər paradı Azərbaycan-Türkiyə dostluğunun sarsılmazlığına da  işıq saldı.  Belə ki, müharibə başlandığı ilk gündən Azərbaycanın yanında olan Türkiyə Prezidenti Rəcəb Tayyib Ərdoğan Zəfər paradında da  dövlət başçısı İlham Əliyevin yanında oldu.  Türkiyə Prezidenti Rəcəb Tayyib Ərdoğanla birlikdə mətbuata bəyanatında dövlət başçısı İlham Əliyevin  “Bu gün Türkiyə-Azərbaycan tarixində çox əlamətdar, önəmli bir gündür. Bu gün biz birlikdə Zəfər paradını seyr edərkən bir-birimizi təbrik etdik. Bu Zəfər münasibətilə xalqlarımızı təbrik etdik. Bu tarixi Zəfər bizim birliyimizin təcəssümüdür”  fikirlərinin davamı olaraq Türkiyə Prezidenti  Azərbaycanın  Prezident İlham Əliyevin qətiyyətli rəhbərliyi ilə dastan yazmaqda davam edəcəyinə əminliyini ifadə etməklə yanaşı, onu da  qeyd etmişdir ki,  Azərbaycanın həm hərbi, həm də diplomatiya sahəsində əldə etdiyi bu uğurda ən böyük paylardan biri şübhəsiz ki,  Prezident İlham Əliyevə aiddir: “Qardaşım İlham Əliyev bununla mərhum Heydər Əliyevin ona vəsiyyət olaraq etdiyi arzusunu da yerinə yetirib. Fürsətdən istifadə edərək güclü Azərbaycanın əsasını qoyan ümummilli lider Heydər Əliyevi də burada rəhmətlə yad edirəm. Azərbaycan qardaşım İlham Əliyevin qətiyyətli rəhbərliyi altında, inşallah, dastan yazmaqda davam edəcək.”

      YAP Xətai rayon təşkilatının sədri Azərbaycanın son bir ildə  gördüyü işlərə diqqəti yönəldərək bildirib ki, Azərbaycan dastan yazmaqda davam edir:  “İşğaldan azad edilmiş torpaqlarımızda bərpa və quruculuq işləri həyata keçirilir, soydaşlarımızın Böyük Qayıdışı yaxınlaşır. Dövlət başçısı İlham Əliyevin “ağıllı şəhər” və “ağıllı kənd” strategiyasına  uyğun olaraq  bütün şəhər və kəndlərimiz  müasir dövrün tələblərinə uyğun bərpa olunur. Bu ərazilərdə  3  Beynəlxalq Hava Limanının  tikilməsi nəzərdə tutulub və artıq onlardan biri - Qarabağın dünyaya açılan hava qapısı kimi dəyərləndirilən Füzuli Beynəlxalq Hava Limanı istifadəyə verildi. Bu tarixi hadisəni də Azərbaycan və Türkiyə Prezidentləri birgə qeyd etdilər. Dövlət başçısı İlham Əliyevin Zəfər yolu kimi dəyərləndirdiyi Füzuli-Şuşa yolu da istifadəyə verildi.  Son bir ildə işğaldan azad edilmiş torpaqlarımızda ən mühüm hadisələrin qeyd olunduğu zamanlarda  Azərbaycan və Türkiyə Prezidentlərinin bir yerdə olması qürurvericidir.15 iyun Milli Qurtuluş Günündə  imzalanaraq dünyaya səs salan Şuşa Bəyannaməsi iki qardaş ölkənin müttəfiqliyinin təqdimatı oldu.”

Vüqar Rəhimzadə bu ümumiləşdirməni aparıb ki, artıq Azərbaycanın həyatında yeni dövrün-işğaldan azad edilmiş ərazilərimizdə bərpa və quruculuq işlərinin ikinci ilini yaşayırıq:  “2022-ci ilin dövlət büdəsindən ayırmalarda da bərpa və quruculuq işləri əsas yer tutur. Qürurla qeyd edirik ki, tezliklə bu ərazilərimizdə bərpa  işləri başa çatacaq, Azərbaycanın dayanıqlı inkişafı üçün bu torpaqların malik olduqları   resurslardan səmərəli istifadə olunacaq. Son bir ilin mühüm addımları sırasında yer alan  iqtisadi  rayonların yeni bölgüsü ilə bağlı Fərman da dünyaya bir sıra mesajları çatdırdı. Qarabağ və Şərqi Zəngəzur iqtisadi rayonunun yaradılması  bir daha Dağlıq Qarabağ münaqişəsinin  tarixə qovuşduğunun təsdiqi oldu.”

Paylaş
Baxılıb: 159 dəfə

Xəbər lenti

Hamısına bax

Sosial

Müsahibə

İqtisadiyyat

MEDİA

İqtisadiyyat

Gündəm

Xəbər lenti

Arxiv
B Be Ça Ç Ca C Ş
1
2 3 4 5 6 7 8
9 10 11 12 13 14 15
16 17 18 19 20 21 22
23 24 25 26 27 28 29
30 31