Fərruxda erməni vəhşiliyi...

Bakı:

4 °C

75 %

8 m/s

Əlaqə

AZ RU EN

Ana səhifə / Xəbər lenti / Fərruxda erməni vəhşiliyi...

Fərruxda erməni vəhşiliyi...

05.04.2022 [10:19]

Tural Gəncəliyev: Bu barədə faktlar beynəlxalq məhkəmələrə çıxarılmalıdır

Nardar BAYRAMLI

Vətən müharibəsində əldə edilmiş qələbədən sonra işğaldan azad edilmiş ərazilərində Birinci Qarabağ müharibəsində itkin düşmüş vətəndaşlarımıza aid məzar yerlərinin müəyyən edilməsi işləri davam etdirilir. Martın 28-də Xocalı rayonu ərazisindəki Fərrux yüksəkliyində bir neçə insana aid naməlum meyit qalıqları aşkarlanıb. Adı çəkilən yüksəklik uğrunda Birinci Qarabağ müharibəsi zamanı ağır döyüşlərin getdiyini və Ermənistan silahlı birləşmələri tərəfindən işğal edildiyini nəzərə alaraq, tapılan meyit qalıqlarının şəhid olmuş Azərbaycan hərbçilərinə aid olduğu ehtimal edilir. Tapılmış meyit qalıqları ərazidən götürülərək müvafiq ekspertizanın aparılması üçün aidiyyəti üzrə təhvil verilib. Fərrux yüksəkliyində tapılan insan qalıqlarının ekshumasiyası aparılacaq.

Qeyd edək ki, Birinci Qarabağ müharibəsində Fərrux yüksəkliyi uğrunda döyüşlərdə 62 nəfər Azərbaycan hərbçisi itkin düşmüş şəxs kimi Əsir və itkin düşmüş, girov götürülmüş vətəndaşlarla əlaqədar Dövlət Komissiyasında qeydiyyata alınıb. Eyni zamanda, Dövlət Komissiyasında toplanmış məlumatlara əsasən, Fərrux yüksəkliyinin yaxınlığında yerləşən, Xocalı rayonunun Pirlər kəndində 46 nəfər, Ağdam rayonunun Əliağalı kəndində 11 nəfər Azərbaycan hərbçisi itkin düşüb.

Məsələ ilə bağlı “Yeni Azərbaycan”a danışan “Qarabağa dönüş” ictimai birliyinin sədri, millət vəkili Tural Gəncəliyevin fikrincə, Xocalı rayonunun Fərrux kəndi ərazisində insan qalıqlarının aşkar edilməsi göstərir ki, Azərbaycana qarşı soyqırımı cinayətləri, olmazın müsibətlər törətmək Ermənistanın dövlət ideologiyasının nüvəsini təşkil edir. O qeyd edib ki, Fərrux yüksəkliyi istiqamətində azərbaycanlıların qalıqlarının tapılmasını bütün dünyaya çatdırmalıyıq: “Bunu Ermənistanın terrorçu dövlət kimi mahiyyətinin ifşasında, Ermənistan dövlətinin və onun Azərbaycan xalqına qarşı cinayət törətmiş rəhbərliyinin məsuliyyətə cəlb olunmasında istifadə etməliyik. Azərbaycan Ermənistana qarşı beynəlxalq məhkəmələr kontekstində sübutlar irəli sürüb, xeyrimizə qərarlar da qəbul edilib. Bu faktları həmin məhkəmələrə təqdim edə bilərik. Yenidən Ermənistanın və azərbaycanlılara qarşı soyqırımı törətmiş ermənilərin fərdi cinayət məsuliyyətinə cəlb edilməsinə nail ola bilərik. Keçmiş prezidentlər - Serj Sarkisyan, Robert Koçaryan, Qarabağdakı cinayətkar terrorçu dəstələrin tör-töküntüləri və onlara rəhbərlik edən Arayik Arutyunyan, Vitali Balasanyan, David Babayan və digər quldurlar cəzalandırılmalıdırlar”.

Millət vəkilinin sözlərinə görə, Birinci Qarabağ müharibəsində qətlə yetirilmiş hərbçilərimizin, itkin düşən şəxslərin qalıqları təkcə Fərrux kəndində deyil, bütün Qarabağ ərazisində aşkarlana bilər: “Əminəm ki, Qarabağ ərazisində yenə bu cür faktların şahidi olacağıq. Birinci Qarabağ müharibəsindən sonra 4 min Azərbaycan vətəndaşından heç bir məlumat alınmayıb, Ermənistan tərəfindən taleyi açıqlanmayıb və itkin siyahısına daxil edilib. Böyük ehtimalla onlar ermənilər tərəfindən qətlə yetirilib, kütləvi məzarlıqlarda dəfn olunublar. Biz bu faktları aşkara çıxarmalı, araşdırmalı, Ermənistanın ifşasında istifadə etməliyik”.

Paylaş:

Baxılıb: 916 dəfə