Mədəniyyətimizə və milli musiqimizə qayğının daha bir nümunəsi

Bakı:

25 °C

73 %

3 m/s

Əlaqə

AZ RU EN

Ana səhifə / Xəbər lenti / Mədəniyyətimizə və milli musiqimizə qayğının daha bir nümunəsi

Mədəniyyətimizə və milli musiqimizə qayğının daha bir nümunəsi

12.05.2022 [10:26]

Şuşa şəhərində məşhur tarzən, bəstəkar Sadıqcanın yaşadığı ev bərpa olunur

N.BAYRAMLI

Xəbər verildiyi kimi, Azərbaycan Prezidenti İlham Əliyev və birinci xanım Mehriban Əliyeva mayın 10-da Şuşada məşhur tarzən, bəstəkar və Azərbaycan tarını təkmilləşdirən sənətkar Sadıqcanın vaxtilə yaşadığı evin bərpası işləri ilə tanış olublar. Şuşa şəhərinin mərkəzində, Mərdinli məhəlləsində yerləşən bina erməni vandalizminin qurbanı olub, ilkin görkəmini 80 faizə qədər itirib. Binanın qalan hissələrində isə konstruktiv çatlar müşahidə olunur və qəza vəziyyətindədir. Sadıqcanın evində də bərpa işlərini Heydər Əliyev Fondu həyata keçirəcək. Dördbucaqlı plan quruluşu olan ev ikimərtəbəlidir. Bina Şuşaya xas memarlıq üslubunda inşa olunub.

Sadıqcan kimdir? Əsl adı Mirzə Sadıq Əsəd oğlu Sadıqcan olan sənətkar 1846-cı ildə Şuşada anadan olub. Sadıqcan Azərbaycanın tanınmış tarzənlərindən biridir. Tədqiqatçıların yazdıqlarına görə, o, tarı təkmilləşdirərək ona cingənə və kök simləri əlavə edib, simlərin sayını 5-dən 11-ə çatdırıb. Sadıqcana qədər tar diz üstə ifa olunurmuş, amma o ilk dəfə tarı sinədə ifa etməyə başlayıb. Məhz onun təkmilləşdirdiyi Azərbaycan tarı Qafqazda və Orta Asiyada geniş yayılaraq milli musiqimizin rəmzinə çevrilib.

Məlumatlara görə, bütün şuşalılar kimi, Sadıqcan da kiçik yaşlarından öz gücünü xalq mahnılarının və muğamlarımızın ifası sahəsində sınayıb. Sənətkar toylarda, konsertlərdə, ziyafətlərdə, həmçinin Bakı və Şuşada Azərbaycan və İran qastrolçularının qoyduqları tamaşaların fasilələri zamanı tarda ifa edir, özü də Qafqaza, Orta Asiya və İrana tez-tez səfərlərə gedərək, burada musiqi məclislərində iştirak edirdi. Qafqazın birinci tarzəni kimi tanınan sənətkar öz sənətində böyük uğurlar qazanıb.

Mirzə Sadıq, eyni zamanda, istedadlı bir bəstəkar olub. O, “Orta Segah” və “Bayatı-Şiraz” muğamlarına bir neçə rəng bəstələmişdi. Bu və digər muğamların tərkibinə daxil olmuş musiqi pyesləri onların dolğunlaşmasında mühüm rol oynayıb. Onun Azərbaycan musiqisinin inkişaf tarixindəki rolu əvəzedilməzdir. Sadıqcan Azərbaycan milli musiqisində misilsiz rol oynayan dahi sənətkar kimi tarixdə iz qoyub. Tarı dizdən sinə üstünə qaldıran Sadıqcan böyük bir azərbaycanlı kimi milli ideologiyamıza, mənəvi dəyərlərimizə xidmətlər göstərib. Tarixdə öz sənəti ilə iz qoyan Sadıqcanın adı milli musiqi tariximizdə daim qalacaq. Bu gün tarzən və bəstəkar Sadıqcanın Şuşadakı evinin bərpası da onun sənətinə verilən qiymətdir.

Paylaş:

Baxılıb: 797 dəfə