9-cu şəhər...

Bakı:

18 °C

72 %

5 m/s

Əlaqə

AZ RU EN

Ana səhifə / Xəbər lenti / 9-cu şəhər...

9-cu şəhər...

07.04.2023 [10:52]

Şuşa - İsfara qardaşlaşıb

Günel ABBASOVA

Şəhərlərin qardaşlaşması müxtəlif mədəniyyətlərin harmoniyası üçün ən optimal versiyalardan biridir. Tarixi incimiz olan Şuşanın nəinki Azərbaycanda, ümumilikdə, bütün Türk dünyasında xüsusi yeri və əhəmiyyəti olduğunu qeyd etmək lazımdır. Şuşa şəhərinin mədəniyyət paytaxtımız elan edilməsi, ötən ilin “Şuşa İli” olması onu göstərir ki, dövlət başçımızın da Şuşaya xüsusi diqqəti var. Şuşaya verilən önəm həm Azərbaycanda, həm də bütün Türk dünyasında yüksək dəyərləndirilir. Bir neçə gün əvvəl Şuşa və Tacikistanın İsfara şəhərləri arasında qardaşlaşma protokolunun imzalanması da bunun bir nümunəsidir.

“Azərbaycan Respublikasının Şuşa şəhəri ilə Tacikistan Respublikasının İsfara şəhəri arasında qardaşlaşma əlaqələrinin qurulması haqqında Protokol”u Azərbaycan Respublikası Prezidentinin Şuşa rayonu üzrə xüsusi nümayəndəsi Aydın Kərimov və Tacikistan Respublikasının İsfara şəhərinin rəhbəri Baxovaddin Baxodurzoda imzalayıblar. Qeyd edək ki, sənəd Azərbaycan Prezidenti İlham Əliyevin aprelin 5-də Tacikistana dövlət səfəri çərçivəsində imzalanıb.

Deputat Cavid Osmanov “Yeni Azərbaycan”a açıqlamasında bildirib ki, ümumiyyətlə, biz həmişə Şuşanın Azərbaycan-türk şəhəri olduğunu, buranın bizim dövlətçilik, mədəniyyət tarixi ilə sıx bağlı olduğunu demişik: “Şuşanın azadlığından sonra Şuşanın beynəlxalq qardaşlaşdırılması, onun təbliği daha da gücləndirilməlidir. Bizim qarşımızda duran və icra etməkdə olduğumuz məsələlərdən biri də Şuşanın Azərbaycana həm tarixi, həm milli-mədəni, həm dini, həm də siyasi baxımdan yaxın, doğma olan ölkələrin şəhərləri ilə qardaşlaşdırılması prosesinin həyata keçirilməsidir. Əlbəttə, Şuşa, ilk növbədə, Türkiyənin şəhərləri ilə qardaşlaşdırılmalı idi və bu belə də oldu. Dövlətimizə daha yaxın dost olan ölkələrin şəhərləri ilə Şuşa şəhəri arasında qardaşlaşmanın qurulması, yaxud qardaşlaşdırılmış şəhər obrazının yaradılması prosesini həyata keçirmək çox müsbətdir. Ümumiyyətlə, beynəlxalq təbliğatın Şuşanın tarixi Azərbaycan şəhəri, həm də bir Azərbaycan türklüyünün məkanı olması istiqamətində qurulması çox vacibdir”.

Deputat qeyd edib ki, Şuşa şəhəri indiyə qədər Tacikistanın İsfara şəhəri, Serbiyanın Novi Pazar şəhəri, Özbəkistanın Xivə şəhəri, Bolqarıstanın Veliko, Tırnova şəhəri, Türkiyənin Kayseri və Ərzurum şəhərləri ilə qardaşlaşıb. Macarıstanın Vesperm şəhəri, Cənubi Koreyanın Andonq şəhəri ilə isə dostlaşıb.

C.Osmanov hesab edir ki, Şuşa ilə qardaşlaşdırılmış şəhərlər sırasına Orta Asiyanın bir sıra şəhərləri də qoşulmalıdır, biz bu istiqamətdə də prosesi həyata keçirə bilərik. Özbəkistanın, Qazaxıstanın, Qırğızıstanın, Türkmənistanın və s. şəhərləri ilə bu prosesi tam həyata keçirmək mümkündür. Fikrimcə, bütün hallarda, seçimi ağıllı və məntiqli şəkildə aparmaq lazımdır. Şuşanın yeni müstəvidə təqdim edilməsi, əslində, onun keçmişinin, tarixinin, mədəniyyətinin, hər bir məsələsinin Azərbaycanla, azərbaycançılıqla, türkçülüklə bağlı olmasını da ortaya qoymuş olacaq. Bütün hallarda, bu istiqamətdə işlərin görülməsi müsbət olardı. Şuşanın beynəlxalq müstəvidə müxtəlif ölkələrin şəhərləri ilə qardaşlaşdırılması prosesi Azərbaycanın dünyadakı mövqeyini və mənafeyini daha da gücləndirməkdədir və bundan sonra da eyni xətlə davam edəcək”.

Paylaş:

Baxılıb: 511 dəfə