Əli Kərimlinin növbəti “Facebook” nağılı

Bakı:

21 °C

46 %

1 m/s

Əlaqə

AZ RU EN

Ana səhifə / Daxili siyasət / Əli Kərimlinin növbəti “Facebook” nağılı

Əli Kərimlinin növbəti “Facebook” nağılı

12.06.2014 [09:27]

Real siyasi platformada ictimai dəstək qazana bilməyən AXCP sədri virtual məkanda “layk” axtarışına çıxıb
Bu günlərdə AXCP sədri Əli Kərimli “Facebook” sosial şəbəkəsində lağ obyektinə çevrilən yeni bir status paylaşıb. Radikalların nəzarətində olan mətbuat orqanlarının da tirajladığı həmin statusda AXCP sədri Polşanın son 25 ildə keçdiyi demokratiya yolundan danışaraq uğursuz müqayisələr aparır. Son dönəmlərdə partiya sədri kimi “siyasi fəaliyyəti” sosial şəbəkələrdə “komentlər” yazmaqdan, “layklar” etməkdən o yana getməyən Əli Kərimli haqqında bəhs olunan statusda sözün əsl mənasında nala-mıxa vurub.
Partiyası getdikcə marginallaşan, funksionallığını itirən, radikal düşərgənin autsayderinə çevrilən Əli Kərimlinin Polşanın məsələsini “təhlil” etməyə girişməsi və bu istiqamətdə fikirləri bütün ciddi ekspertlər tərəfindən tənqid olunur.
Qeyd olunur ki, AXCP sədri “Facebook” əhlinin, necə deyərlər, “ictimai şüurunu” səhv istiqamətə yönəltməyə hesabladığı statusunda, əslində özünün və təmsil etdiyi radikal düşərgənin qarınağrısı bəhanələrini büruzə verib. Nə qədər qəribə görünsə də, Əli Kərimli ölkəmizin ötən əsrin 90-cı illərinin əvvəllərindəki vəziyyəti ilə indiki durumunu müqayisə edir. Guya o vaxtkı iqtidarın dövründə (keçmiş ittifaq məkanında baş verən ictimai-siyasi proseslərin axarında Azərbaycanda 1992-ci ilin mayında hakimiyyəti mənimsəyən AXC-“Müsavat” iqtidarı nəzərdə tutulur-M.A.) insanlar “demokratiya gölündə” üzürmüşlər, ölkədə demokratiya aşıb-daşırmış, hər tərəfdən “demokratiya mahnıları” eşidilirmiş, insan hüquqları gen-bol təmin olunurmuş, hər kəs istədiyini edirmiş və s. Bu cəhətdən AXCP sədrinin paylaşdığı statusu onun “demokratiya illüziyası” və yaxud “demokratiya nağılı” adlandırmaq daha doğru olardı.
Əli Kərimlinin “demokratiya nağılı”ndan hasil olan nəticə budur ki, radikallar “ah, necə kef çəkməli əyyam idi” xülyasından yaxa qurtara bilməyiblər və hələ də nostalji hisslərlə yaşayırlar. Görünür, “25 il dövlət quruculuğu üçün kifayət qədər uzun bir dönəmdir” deyən Əli Kərimli həm də o qənaətdədir ki, bu uzun dönəmdə təmsil olunduğu AXC-”Müsavat” iqtidarının ölkəni hansı metodlarla idarə etdiyi, ümumiyyətlə, o illərdə baş verənlər insanların yaddaşından silinib və indi “boşluğu” illüziyalarla doldurmaq mümkündür.
Ancaq Əli Kərimli anlamır ya da anlamaq istəmir ki, AXC-“Müsavat” iqtidarının birillik yarıtmaz hakimiyyətinin acı dərslərini Azərbaycan cəmiyyəti həmişə xatırlayacaq. Bir anlığa Əli Kərimlinin mədh etdiyi həmin dövrə qayıdaq. Bu o dövr idi ki, ölkəmiz Əli Kərimlinin özünün də yüksək vəzifə sahibi olduğu AXC-”Müsavat” iqtidarının səriştəsiz rəhbərliyi ucbatından çox çətin vəziyyətə düşmüşdü, Azərbaycanın XX yüzillikdə ikinci dəfə qazandığı müstəqilliyinin əldən çıxmasına real təhlükə yaranmışdı. Həyatın bütün sahələrini tənəzzül çuğlamışdı. İqtisadiyyatdakı gerilik işsizliyə, insanların sosial durumlarının ağırlaşmasına gətirib çıxarmışdı. Müharibə vəziyyətində olan ölkənin ordusunda pərakəndəlik hökm sürürdü. Komandirlərdən biri əsgərlərə “irəli” əmri verəndə digər komandirlərdən “geri çəkilmək” göstərişi gəlirdi. AXC-”Müsavat” iqtidarının hakimiyyəti ələ almasından cəmi 1 il sonra isə ölkə vətəndaş müharibəsinin astanasında dayandı.
Bəs nədən Əli Kərimli öz statusunda vaxtilə təmsil olunduğu iqtidarın dövründə respublikanın ictimai-siyasi, sosial-iqtisadi mənzərəsini şərtləndirən bu kimi cəhətləri “unudur”? AXCP sədri hansı demokratiyadan danışır ki, vaxtilə onun da üzvü olduğu komandanın naziri televiziya studiyasının qapılarını təpiklə açaraq canlı efirdə aranı qatmış, jurnalistə fiziki xəsarət yetirmişdi?
Belə misalların sayı kifayət qədər çoxdur. Ancaq elə bu deyilənlər də Əli Kərimlinin müqayisəsini apardığı məlum zaman kəsiyinin üzərinə çəkmək istədiyi “demokratiya” pərdəsinin yırtılması üçün kifayətdir. Müqayisələr reallığa söykənəndə, həqiqəti əks etdirəndə inandırıcı olur. Əli Kərimlinin “Facebook” nağılına isə çətin ki, kimsə inansın. Çünki bu nağılda AXCP sədri yenə öz ampluasında qalaraq həyat həqiqətlərini təhrif etməyə, yaxın tariximizi saxtalaşdırmağa və baş verənlərin fonunda özünün “qəhrəman” obrazını yaratmağa çalışır. Buna görə də, qaş düzəltmək istədiyi yerdə vurub göz çıxardıb. Onun sosial şəbəkədə paylaşdığı status bumeranq effekti verərək özünü məzəmmət obyektinə çevirib.
Mübariz ABDULLAYEV

Paylaş:

Baxılıb: 1457 dəfə