Sərhədləri aşan həmrəylik!

Bakı:

22 °C

52 %

2 m/s

Əlaqə

AZ RU EN

Ana səhifə / MEDİA / Sərhədləri aşan həmrəylik!

Sərhədləri aşan həmrəylik!

04.06.2026 [09:55]

Azərbaycanın dünyadakı səsi necə formalaşır?

Sürətlə dəyişən siyasi, iqtisadi və mədəni reallıqlar fonunda diaspor quruculuğu hər bir xalqın milli maraqlarının beynəlxalq müstəvidə qorunması, tarixi həqiqətlərin dünya ictimaiyyətinə çatdırılması üçün strateji əhəmiyyət kəsb edir. Azərbaycan diasporunun formalaşması və inkişafı ölkəmizin xarici siyasət prioritetləri arasında xüsusi yer tutur. Müxtəlif ölkələrdə yaşayan milyonlarla azərbaycanlının təşkilatlanması, vahid məqsəd və ideya ətrafında birləşməsi diaspor quruculuğunun əsas məqsədlərindən biridir. Bu fəaliyyət dövlətimizin beynəlxalq nüfuzunun möhkəmləndirilməsinə də mühüm töhfələr verir.

Bu gün dünyanın fərqli qitələrində yaşayan azərbaycanlılar müxtəlif peşələrdə, müxtəlif ictimai mövqelərdə və fərqli həyat şəraitlərində fəaliyyət göstərirlər. Həmin soydaşlarımızı birləşdirən ən mühüm dəyər Azərbaycan sevgisi, milli mənsubiyyət hissi və tarixi köklərə bağlılıqdır. Məhz bu mənəvi bağ dünya azərbaycanlılarının həmrəyliyinin əsasını təşkil edir və onların bir xalqın ayrılmaz hissəsi olduqlarını nümayiş etdirir.

“Azərbaycan Ev”ləri milli kimliyimizin xaricdəki ünvanıdır

Mövzu barədə fikirlərini “Yeni Azərbaycan”la bölüşən politoloq Tural İsmayılov bildirib ki, Azərbaycan diaspor təşkilatları dünyanın müxtəlif ölkələrində fəaliyyət göstərərək ölkəmizin zəngin tarixi, qədim mədəniyyəti, multikultural dəyərləri, iqtisadi nailiyyətləri və beynəlxalq əməkdaşlığa mühüm töhfələr verir. Onun sözlərinə görə, eyni zamanda xalqımızın üzləşdiyi tarixi ədalətsizliklər, xüsusilə də, torpaqlarımızın işğalı dövründə baş vermiş hadisələr və xalqımıza qarşı törədilmiş cinayətlər barədə dünya ictimaiyyətinin məlumatlandırılması istiqamətində mühüm təşəbbüslər həyata keçirilir: “Əsas hədəf dünya azərbaycanlılarını birləşdirmək, onların səsini beynəlxalq aləmdə eşitdirmək və milli maraqları müdafiə etməkdir. Bu məqsədlə Diasporla İş üzrə Dövlət Komitəsinin fəaliyyətləri genişləndirilib və daha çevik mexanizmlərlə təchiz olunub. Komitə müxtəlif ölkələrdə diaspor şuraları və koordinatorları təyin etməklə regional şəbəkələşməni təmin edir.

Eyni zamanda “Azərbaycan Evi” layihələri ilə ölkələr üzrə fiziki məkanlar yaradılır, bu da ictimai diplomatiyanın dayağına çevrilir. Azərbaycanlı tələbələrin, ziyalıların və gənc fəalların diaspor hərəkatına cəlb edilməsi məqsədilə “Diaspor Gənclərinin Yay Düşərgəsi” kimi tədbirlər təşkil olunur. Dövlət bu yolla diaspor təşkilatlarının intellektual bazasını formalaşdırmağa çalışır”.

T.İsmayılovun sözlərinə görə, unutmaq olmaz ki, həmrəylik yalnız xüsusi günlərdə və tədbirlərdə nümayiş etdirilən birlik deyil: “Həmrəylik gündəlik həyatın bütün sahələrində özünü göstərən, insanların bir-birinə dəstəyində, dəyərlərə hörmətində və ortaq məqsədlər uğrunda birgə fəaliyyətində təzahür edən güclü mənəvi qüvvədi. Məhz bu qüvvə Azərbaycan xalqının dünyanın harasında yaşamasından asılı olmayaraq, vahid xalq kimi tanınmasının əsas şərtlərindən biridir”.

Diaspor diplomatiyasının yeni dövrü

Politoloq onu da vurğulayıb ki, yeni mərhələdə dövlət diaspor diplomatiyasını peşəkar və davamlı lobbiçilik modelinə çevirmək niyyətindədir: “Bu gün dünyanın müxtəlif ölkələrində yaşayan azərbaycanlıların elm, təhsil, biznes, mədəniyyət, siyasət və digər sahələrdə qazandıqları uğurlar həm Azərbaycanın beynəlxalq imicinin möhkəmlənməsinə xidmət edir, həm də gənc nəslin milli kimliyə bağlılıq ruhunda yetişməsinə stimul verir. Bunun nəticəsində xaricdə yaşayan soydaşlarımız yaşadıqları cəmiyyətlərin fəal üzvləri olmaqla yanaşı, öz milli köklərini qoruyub saxlayan və gələcək nəsillərə ötürən mühüm bir körpü rolunu oynayırlar.

Müasir informasiya texnologiyalarının sürətl? inkişaf etdiyi bir dövrdə diaspor quruculuğu və lobbiçilik fəaliyyəti ənənəvi üsullarla yanaşı rəqəmsal platformalarda da həyata keçirilir. Sosial şəbəkələr, beynəlxalq media resursları və müxtəlif kommunikasiya vasitələri vasitəsilə Azərbaycan həqiqətlərinin daha geniş auditoriyalara çatdırılması mümkün olur. Bu da milli maraqlarımızın müdafiəsində yeni imkanlar yaradır.

Nəticə etibarilə, diaspor quruculuğu, lobbiçilik və dünya azərbaycanlılarının həmrəyliyi bir-birini tamamlayan, Azərbaycanın milli maraqlarının qorunmasına, dövlətimizin beynəlxalq mövqeyinin güclənməsinə və xalqımızın dünyada daha güclü şəkildə təmsil olunmasına xidmət edən mühüm amillərdir. Hər bir azərbaycanlının bu prosesdə fəal iştirak etməsi birliyin, həmrəyliyin və gələcək uğurların əsas təminatlarından biri hesab olunur”.

Yeganə BAYRAMOVA

Məqalə “Azərbaycan Respublikasının Medianın İnkişafı Agentliyi”nin maliyyə dəstəyi ilə “Diaspor quruculuğu, lobbiçilik və dünya azərbaycanlılarının həmrəyliyi” istiqaməti üzrə hazırlanmışdır.

Paylaş:

Baxılıb: 169 dəfə