Ermənistanda siyasi böhran davam edir

Bakı:

27 °C

47 %

2 m/s

Əlaqə

AZ RU EN

Ana səhifə / Dünya / Ermənistanda siyasi böhran davam edir

Ermənistanda siyasi böhran davam edir

14.07.2021 [08:52]

Məlum olduğu kimi, növbədənkənar parlament seçkilərindən 20 gündən çox keçsə də, müxalifətin nəticələrin ləğv edilməsi yönündə tələbi ölkədəki siyasi böhranın davam etməsinə səbəb olub. Məsələ ilə bağlı 4 siyasi qüvvə tərəfindən ünvanlanan müraciətlərin iyulun 9-dan konstitusiya məhkəməsində baxılması və məhkəmə işinin gərgin keçməsi bunu deməyə əsas verir. Erməni mətbuatı yazır ki, konstitusiya məhkəməsi məsələ ilə bağlı iclaslarını davam etdirir. Xatırladaq ki, “Ermənistan” və “Şərəfim var” blokları, “Zartonk” (“Yüksəliş”) və “Hayots hayrenik” (“Erməni vətəni”) partiyalarının 20 iyunda keçirilmiş seçkilərin nəticələrinin etibarsız sayılması ilə bağlı müraciətlərinə KM-də baxılması iyulun 16-a qədər yekunlaşmalıdır.
Qeyd edək ki, müxalifətin seçkinin nəticələrini şübhə altına almasına baxmayaraq, hakimiyyət artıq parlamentin formalaşdırılması prosesinə hazırlıq görür. “Armenia today” yazır ki, seçkidə qalib elan edilən “Vətəndaş müqaviləsi” partiyasının idarə heyəti parlamentdəki fraksiyanın rəhbəri və katibi vəzifələrinə namizədlərini müəyyən edib. Partiyanın nümayəndəsi Lilit Makuntsun verdiyi məlumata görə, idarə heyətinin baş nazir vəzifəsini icra edən N.Paşinyanın da iştirak etdiyi yığıncağında proporsional siyahıda adları olan Hayk Koncoryan fraksiya rəhbəri, Nazeli Bağdasaryan isə fraksiya katibi vəzifəsinə namizəd göstərilib.
Buna baxmayaraq, hakim komanda daxilində ciddi qarşıdurma hökm sürür. Belə ki, Paşinyanla münasibətləri pisləşən və hətta istefası tələb edilən Yerevan meri Hayk Marutyan geri çəkilmək əvəzinə paytaxtda “təmizləmə” işlərinə başlayıb. “Armenia today” yazır ki, merin qərarı ilə ötən il vəzifəyə təyinat alan Nor Nork inzibati ərazisi üzrə icma rəhbəri Hovhannes Manukyan istefaya göndərilib.
Yeri gəlmişkən, Ermənistan Xarici İşlər Nazirliyində (XİN) də qeyri-müəyyənlik hökm sürür. “Past” qəzeti yazır ki, xarici siyasət həmişə mövcud hökumətin problemli sahələrindən biri olub və hazırda XİN bərbad vəziyyətdədir. Qəzetin yazdığına görə, yaxın gələcəkdə Ermənistanın diplomatik korpusunda çox ciddi və köklü dəyişikliklər gözlənilir: “Üstəlik, söhbət yalnız bir nazir və ya nazir müavininin təyin edilməsindən getmir. Əldə etdiyimiz məlumata görə, müxtəlif ölkələrdə akkreditə olunmuş 25-ə yaxın səfir geri çağırılacaq və əvəzinə bu hökumətə xidmət etməyə hazır kadrlar təyin ediləcək. Ancaq burada da olduqca ciddi problemlər var”.
Beləliklə, Paşinyan növbədənkənar seçkidə qalib gəlsə də, seçkilərin nəticələrinə etiraz edən müxalifətlə ciddi qarşıdurma davam edir. Hakimiyyət daxilindəki konfrontasiya isə məğlub ölkədə gərginliyin artmasını şərtləndirir. Bu durum isə yaxın gələcəkdə məğlub ölkədə siyasi böhranın dərinləşəcəyinə dəlalət edir.
Qaşqay ZİYƏDDİNOĞLU

Paylaş:

Baxılıb: 807 dəfə