Son sözü martın 18-də xalq deyəcək

Bakı:

26 °C

83 %

0 m/s

Əlaqə

AZ RU EN

Ana səhifə / Gündəm / Son sözü martın 18-də xalq deyəcək

Son sözü martın 18-də xalq deyəcək

16.03.2009 [08:59]

“Yeni Azərbaycan” təşviqat qrupu Abşeron rayonunda görüş keçirib
“Yeni Azərbaycan” təşviqat qrupu vətəndaşların yüksək əhval-ruhiyyəsi, aktivliyi ilə müşahidə olunan görüşlər seriyasını davam etdirməkdədir. Belə tədbirlərdən biri də martın 14-də Abşeron rayonunda keçirilib. “Yeni Azərbaycan” təşviqat qrupunun Abşeron rayon şöbəsinin sədri Bilman Vəliyev xatırladıb ki, bir müddət öncə hakim Yeni Azərbaycan Partiyası Azərbaycan Respublikası Konstitusiyasına əlavə və dəyişikliklər edilməsi təklifi ilə çıxış edib. O, bütövlükdə 29 maddəni əhatə edən bu dəyişikliklərin dövrün tələbi olduğunu, Azərbaycan dövlətinin qüdrətlənməsinə, ölkə vətəndaşlarının hüquqlarının möhkəmlənməsinə xidmət etdiyini vurğulayıb.
Bilman Vəliyev qeyd edib ki, bu dəyişikliklərin hər biri xalqımızın həyat şəraitinin daha da yaxşılaşmasına, övladlarımızın gələcəyinin təminat altına alınmasına yönəlib. Onun sözlərinə görə, referendumda müzakirəyə çıxarılmış məsələlər ölkənin bugünkü reallıqları baxımından vacibdir. Nəzərdə tutulmuş əlavə və dəyişikliklərdə məqsəd insan hüquqlarını daha da genişləndirmək, vətəndaşların həyat şəraitini yaxşılaşdırmaqdan ibarətdir. 18 mart referendumu Azərbaycan cəmiyyətində insan hüquq və azadlıqlarının daha da genişləndirilməsi, vətəndaşların həmin hüquq və azadlıqlardan daha da səmərəli istifadəsinin təmin edilməsi yolunda daha bir addımdır: “Bilirsiniz ki, bugünkü Azərbaycan Konstitusiyası 1995-ci ildə xalqımızın ümummilli lideri Heydər Əliyev tərəfindən hazırlanıb və ümumxalq səsverməsi yolu ilə qəbul olunub. Amma ötən 14 ildə Azərbaycan dəyişib, inkişaf edib. İqtisadi gücümüz artıb, beynəlxalq mövqelərimiz güclənib. Artıq Azərbaycan dövləti öz vətəndaşları üçün daha yaxşı imkanlar yaratmağa, onların daha yaxşı yaşayışını təmin etməyə qadirdir. Bunun üçün isə ilk olaraq hüquqi baza formalaşdırmaq, yeni qanunlar qəbul etmək lazımdır. Qanunların məhz Konstitusiyamızın bazasında formalaşdırıldığını nəzərə alsaq, bu islahatların nə üçün gərəkli olduğu məlum olur”.
Tədbirdə çıxış edən Səbutay Həsənov Konstitusiyanın bəzi maddələri üzrə təklif olunan dəyişikliklərin qüdrətli Azərbaycan və zəngin vətəndaş prinsiplərinə əsaslandığını deyib: “ümumiyyətlə, bütün maddələr ölkəmizin tərəqqisinə, əhalinin xoşbəxt gələcəyinə təminat verir. Amma elə maddələr var ki, birbaşa xalqın azad, demokratik və ən geniş iqtisadi-sosial hüquqlarının əhatə olunmasını şərtləndirir. Məsələn, Konstitusiyanın 12-ci maddəsinə təklif olunan dəyişikliklər insanların sosial həyat şəraitinin yaxşılaşmasına xidmət edir. Bundan başqa, 15-ci maddə onların gələcək iqtisadi inkişafı üçün dərin əsaslar yaradır. Vətəndaşların hüquq və azadlıqlarının daha da genişlənməsinə xidmət edən digər maddələr də təqdir olunacaq qədər mükəmməl dəyişikliklərdir”.
Tədbirdə fikirlərini bölüşən iştirakçılar isə Konstitusiyada təklif edilən əlavə və dəyişiklikləri mütərəqqi islahatlar kimi dəyərləndirib və 18 martda keçiriləcək referendumda fəal iştirak edəcəklərini diqqətə çatdırıblar. Görüş maraqlı dialoq şəraitində davam edib. Seçicilərə Konstitusiya islahatları ilə bağlı suallara ətraflı cavablar verilib.
Görüşün sonunda YAP Abşeron rayon təşkilatının “Caspian Fish” şirkətindəki ilk təşkilatının yeni üzvlərinə vəsiqələr təqdim edilib.
Ramil VƏLİBƏYOV

Paylaş:

Baxılıb: 1681 dəfə