Azərbaycan ilə Rusiya arasında əməkdaşlığın miqyası genişlənir

Bakı:

27 °C

47 %

2 m/s

Əlaqə

AZ RU EN

Ana səhifə / Gündəm / Azərbaycan ilə Rusiya arasında əməkdaşlığın miqyası genişlənir

Azərbaycan ilə Rusiya arasında əməkdaşlığın miqyası genişlənir

25.11.2009 [10:16]

“Vneştorqbank”ın respublikamızda fəaliyyətə başlaması qeyri-neft sektoruna kredit qoyuluşlarının artmasında mühüm rol oynayacaq
Rusiya və Azərbaycan arasında siyasi-iqtisadi münasibətlərin dinamik inkişafı son dövrlərdə ən yüksək mərhələyə çatıb və əməkdaşlığın əhatə dairəsi bütün sferalarda özünü göstərməyə başlayıb. Səmimi dostluq münasibətlərinə söykənən Rusiya-Azərbaycan əməkdaşlığı dinamizm və inteqrasiya baxımından geniş xarakter almaqla regionda humanitar dəhlizin yaradılmasına impuls verməkdədir. Hər iki ölkə həm MDB çərçivəsində əlaqələri inkişaf etdirmək, həm də ikitərəfli münasibətlərin dərinləşməsinə baza yaratmaqla əməkdaşlığın dinamizminin və tempinin yüksəlməsinə səbəb olub.
ölkələr arasında ticarət dövriyyəsinin son illərdə əhəmiyyətli dərəcədə artması və Rusiyanın respublikamızın ticarət partnyorları sırasında ilk yerlərdən birində qərar tutması əməkdaşlığın formatında yeni prioritetlərin meydana çıxmasına imkan verib. Hazırda ölkələr arasında mal mübadiləsinin həcmi 2 milyard dolları ötməkdədir. Son illərdə keçirilən biznes-forumlar isə bu əlaqələrin inkişafına daha da impuls verib. İkitərəfli əlaqələrin dinamizminə hökumət səviyyəsində qarşılıqlı təmaslarla yanaşı, hər iki ölkənin müvafiq qurumları arasında əldə olunmuş razılaşmalar da mühüm təsir göstərməkdədir. Dövlət İnvestisiya Şirkəti, AZPROMO, Rusiya Ticarət Evi, hər iki ölkənin Sənaye və Ticarət palataları münasibətlərin intensiv inkişafına öz töhfəsini verməkdədir.
Rusiya ilə Azərbaycan arasında iqtisadiyyatın hər bir sahəsi üzrə faydalı əməkdaşlıq mövcuddur. Rus şirkətləri ölkəmizin daxili bazarında aparıcı yer tuturlar. Maşınqayırma, metallurgiya, sənayenin bir çox bölmələri, xidmət, ticarət, kənd təsərrüfatı və digər sahələrdə rus şirkətləri investisiya qoyuluşları həyata keçirməkdədir. Neft sektorunda həyata keçirilən layihələrin bir neçəsində Rusiya böyük paya malikdir. Azərbaycan Bakı-Novorossiysk kəməri ilə bu ölkəyə neft ixrac edir və bu, enerji sahəsində münasibətlərin inkişafına təkan verməkdədir. Azərbaycanın Rusiya ilə qaz nəqlinə dair saziş imzalaması isə əməkdaşlığın ən yeni mərhələyə qədəm qoymasını şərtləndirən başlıca faktorlardan biri hesab oluna bilər. Rusiyanın “Qazprom” şirkəti ilə Dövlət Neft Şirkəti arasında imzalanmış memoranduma əsasən respublikamız 2010-cu ilin yanvar ayından etibarən bu ölkənin şimal bölgələrinə, Dağıstan və ətraf rayonlara yanacaq ixrac edəcək. Şimal marşrutu - Qazıməmməd-Şirvanovka-Mozdok qaz kəməri vasitəsilə yanacağın nəql olunması mühüm iqtisadi hadisə olmaqla yanaşı, Rusiyanın respublikamızın çoxvektorlu ixrac strategiyasına, diversifikasiya siyasətinə qoşulmasını şərtləndirmiş olur. Rəsmi Moskva Azərbaycandan yanacaq almaqla Xəzər regionundakı mövcud tranzit-nəql imkanlarından faydalanmaq imkanı əldə etmiş olur. Azərbaycanın dünya enerji bazarında nüfuzunun və mövqeyinin daha da möhkəmlənməsi, Avropa ilə əməkdaşlıqda çoxşaxəli enerji siyasəti yürütməsi Rusiyanın da diqqət mərkəzindədir və bu məqsədlə Kreml respublikamızın diversifikasiya siyasətindən kənarda qalmaq istəmədiyini nümayiş etdirmiş oldu.
Rusiya ölkəmizlə bütün məsələlərdə qarşılıqlı etimada söykənən dərin münasibətlər qurub və dövlətlər arasında hər bir element üzrə ortaq mövqe mövcuddur. Xəzərin hüquqi statusu üzrə razılaşmaya imza atan ilk ölkələrdən biri də məhz Rusiyadır. Bu ölkə Xəzər regionunu əməkdaşlıq və sülh dəhlizi hesab edir və bütün sahilyanı dövlətlərlə qarşılıqlı əməkdaşlığın genişləndirilməsinin tərəfdarıdır. Rusiya bu mövqeyini Xəzərin hüquqi statusuna dair razılaşmaya imza atmaqla nümayiş etdirib. Azərbaycanla Rusiya arasında maliyyə, bank, sığorta, qiymətli kağızlar və digər sahələrdə də əməkdaşlıq intensiv xarakter almaqdadır. Azərbaycan Beynəlxalq Bankının törəmə bankı olan “ABB-Moskva” Rusiyada ən çevik maliyyə qurumlarından birinə çevrilib. “ABB-Moskva”nın aktivləri 10,5 milyard rubl, kapitalı 1,1 milyard rubl, kredit portfeli isə 8,1 milyard rubl civarındadır. Bu qurum Rusiyanın ən iri 30 bank qrupuna daxil olub. Yekaterinburq, Sankt-Peterburq və Moskvada şəbəkəsi olan “ABB-Moskva” 2010-cu ildə Nijni-Novqorod şəhərində yeni ofisini açmağı da planlaşdırır. Rusiyanın ən nəhəng maliyyə piramidası hesab olunan “Vneştorqbank”ın isə respublikamızda fəaliyyətə başlaması maliyyə-bank sektorunda əməkdaşlığın dərinləşməsinə stimul verəcək. Rusiya, MDB və Avropada 1000-ə yaxın bölməsi olan bu bankın maliyyə resurslarının respublikamızın iqtisadiyyatına yönəldilməsi qeyri-neft sektorunun inkişafının sürətlənməsində mühüm rol oynaya bilər. Eyni zamanda, iri biznes qurumları ilə yanaşı, kiçik və orta sahibkarlar da “Vneştorqbank”ın kreditlərindən yararlanmaq imkanı qazana biləcəklər ki, bu da sahibkarlığın inkişafına təkan vermiş olacaq.
ELBRUS CƏFƏRLİ

Paylaş:

Baxılıb: 1242 dəfə