Azərbaycanda investisiya layihələri uğurla icra edilir

Bakı:

21°C

73%

7m/s

Əlaqə

AZ RU EN

Ana səhifə / Gündəm / Azərbaycanda investisiya layihələri uğurla icra edilir

Azərbaycanda investisiya layihələri uğurla icra edilir

21.04.2010 [09:20]

Prezident İlham Əliyev: Bu il üçün nəzərdə tutulmuş investisiya layihələri bizi tam şəkildə təmin edir
Azərbaycan iqtisadiyyatına investisiya qoyuluşları 2009-cu ildə olduğu kimi, 2010-cu ildə də müşahidə olunmaqdadır. Sərmayə qoyuluşlarının dinamikası əvvəlki templə davam edir və iqtisadiyyatın real sektoruna yatırılan kapital resursları ən mühüm sosial və infrastruktur layihələrini əhatə etməkdədir. Bir sıra dövlətlərdə qlobal böhranla bağlı maliyyə və bank sisteminin problemlərlə üzləşməsi səbəbindən infrastruktur və investisiyayönümlü layihələrin icrası təxirə salınsa da, ölkəmizdə sərmayə proqramlarının icrası davamlı xarakter daşıyıb. Böhrana qarşı təmkinli, çevik və mükəmməl strategiya hazırlayaraq həyata keçirən Azərbaycan hökuməti yerli investisiya bazarını nəinki xarici təsirlərdən qorumağa nail olub, eyni zamanda, bu sahəyə sərmayə qoyuluşlarının daha da artırılmasını təmin edib.
Nazirlər Kabinetinin 2010-cu ilin birinci rübünün sosial-iqtisadi inkişafının yekunlarına həsr olunmuş iclasındakı çıxışı zamanı Prezident İlham Əliyev bildirib ki, ölkəmizə investisiya qoyuluşları davamlı xarakter almaqdadır: “Azərbaycanda investisiya layihələri uğurla icra edilir. Son illər ərzində on milyardlarla dollar vəsait qoyulubdur, daxili investisiyalar xarici investisiyaları böyük fərqlə üstələyir. Bizim siyasətimiz ondan ibarətdir və maliyyə böhranından belə uğurlu çıxmağımızın səbəbi də ondadır ki, biz əldə edilmiş gəlirləri həm əmanət kimi çox etibarlı şəkildə saxlamışıq və ehtiyatlarımız artıb. Eyni zamanda, ölkənin tələbatını ödəmək üçün investisiya şəklində sənaye istehsalına, infrastruktur layihələrinə qoymuşuq ki, həm iş yerləri açıldı, həm də iqtisadiyyatın şaxələndirilməsi üçün əlavə imkanlar yarandı. Biz bu siyasəti gələcəkdə də davam etdirəcəyik. Bu il üçün nəzərdə tutulmuş investisiya layihələri hesab edirəm ki, bizi tam şəkildə təmin edir. Əlbəttə ki, gələcək illərdə biz başqa sahələrə investisiyanın cəlb edilməsini təmin edəcəyik”.
Qeyd edək ki, sərmayə qoyuluşlarında Azərbaycanın daxili maliyyə resursları xüsusi üstünlük təşkil edir və son illərdə olduğu kimi, 2010-cu ilin birinci rübündə də bu dinamika nəzərə çarpıb. Prezident İlham Əliyevin müəyyən etdiyi siyasətin həyata keçirilməsi nəticəsində, ölkəmizin müasir iqtisadi təhlükəsizlik şəbəkəsi qurulub. Bu isə respublikamızın maliyyə-iqtisadi potensialının artması fonunda sosial layihələrin uğurlu icrasını təmin etməklə bərabər, investisiya proqramlarının davamlılığını stimullaşdırıb. Bu ilin ilk rübündə ümumi sərmayə qoyuluşlarında yerli kapitalın təxminən 80 faizə yaxınını Azərbaycanın daxili resursları təşkil edib. Bu tendensiya respublikamızın maliyyə potensialının yüksək göstəricisi hesab oluna bilər. ölkəmizin maliyyə qüdrətinin artmasında yerli şirkətlərin inkişaf etməsi və onların imkanlarının yüksəlməsi, dövlət tərəfindən sahibkarlığın inkişafına ayrılan vəsaitlərin, həmçinin, hökumətin ayırdığı kreditlərin və subsidiyaların çoxalması və digər tədbirlər mühüm rol oynayıb. İnvestisiyalar ölkəmizdə güclü infrastruktur layihələrinin icrasına, yeni yolların və körpülərin tikintisinə, elektrik stansiyalarının və mühüm sosial obyektlərin yaradılmasına və digər layihələrə yönəldilib.
2010-cu ildə investisiya, infrastruktur layihələrinin icrasının davam etdirilməsi ilə yanaşı, onların maliyyə tutumu və miqyasının bir qədər də genişləndirilməsi nəzərdə tutulur. Azərbaycan hökuməti davamlı xarakter alan infrastruktur layihələrinin və investisiya proqramlarının 2010-cu ildə geniş vüsət alması üçün kifayət qədər maliyyə resurslarına malikdir. Onu da qeyd edək ki, bu il investisiya layihələrində xarici dövlətlərin ən nəhəng şirkətlərinin iştirak payı da artmaqda davam edir. Eyni zamanda, sərmayə proqramlarında dünyanın ən nəhəng maliyyə institutlarının iştirakı nəzərə çarpır.
İnvestisiya layihələrinin icrası qeyri-neft sektorunun inkişafında mühüm rol oynayır. Həmin sahədə çoxsaylı layihələrin həyata keçirilməsi isə xarici investorların axını üçün əlverişli zəmin yaradır. Məsələn, sosial obyektlərin tikintisi, məktəb və xəstəxanaların inşası, təmiri, yeni müasir tibb müəssisələrinin yaradılması və ən son texnika ilə təminatı, qaçqın və məcburi köçkünlər üçün yeni yaşayış qəsəbələrinin salınması, körpü, yol tikintisi, elektrik stansiyalarının yenidən qurulması və digər layihələrin həyata keçirilməsi ölkəmizdə iqtisadiyyatın modernizasiyasını dərinləşdirir ki, bu da xarici şirkətlərin respublikamızda fəaliyyətini stimullaşdırmış olur.
Azərbaycanda investisiyaların həcminin artmasında yaradılmış əlverişli sərmayə mühitini xüsusi qeyd etmək lazımdır. Yəni, xarici sərmayəçilərin fəaliyyəti üçün yaradılmış əlverişli investisiya mühiti onları ən iri layihələrə kapital yatırmağa həvəsləndirir. Bunun nəticəsidir ki, xarici ölkələrin ən nüfuzlu şirkətləri Azərbaycanda böyük həcmli investisiya proqramlarını həyata keçirməkdədir. Hazırda, Qafqaz regionunda reallaşdırılan ən mühüm investisiya layihələri də Azərbaycanı əhatə edir.
Elbrus CƏFƏRLİ

Paylaş:

Baxılıb: 1073 dəfə