Azərbaycan regionda sabitləşdirici amildir

Bakı:

15 °C

94 %

0 m/s

Əlaqə

AZ RU EN

Ana səhifə / Gündəm / Azərbaycan regionda sabitləşdirici amildir

Azərbaycan regionda sabitləşdirici amildir

18.06.2011 [12:28]

Prezident İlham Əliyev: Güclü iqtisadi təməl üzərində müasir siyasi sistemin formalaşdırılması, dövlətçiliyin əsaslarının möhkəmləndirilməsi, azərbaycançılıq ideologiyasının gücləndirilməsi məsələləri bizim üçün prioritet məsələlərdir
Azərbaycan Respublikasının yüksək inkişafı ölkəmizin yerləşdiyi regionun lider dövlətinə çevrilməsi ilə yanaşı, dünyanın aparıcı ölkələri ilə də yaxın tərəfdaşlıq əlaqələri qurmasında əsaslı rol oynayır. Bu inkişaf isə ümummilli liderimiz Heydər Əliyev siyasi kursuna əsaslanır. 1993-cü ildə xalqın təkidli tələbi ilə hakimiyyətə qayıdan Ulu öndər Heydər Əliyev qısa müddətdə ölkədə siyasi sabitliyin yaradılmasına nail oldu. Ulu öndər Heydər Əliyevin əsasını qoyduğu bu siyasi kurs Prezident İlham Əliyev tərəfindən də uğurla davam etdirilir. Bu gün Azərbaycan dünyanın aparıcı dövlətləri, o cümlədən, beynəlxalq təşkilatlar ilə ikitərəfli əlaqələrə malikdir. Bu əlaqələr isə dünyanın çoxsaylı dövlətlərinin ölkəmizə olan iqtisadi marağının artmasına imkan yaradır. Azərbaycan bu gün nəinki yerləşdiyi Cənubi Qafqaz regionunda, hətta bir sıra yaxın ölkələri də nəzərə alsaq böyük bir coğrafiyada xarici sərmayələrə açıq və təminat verəcək dövlət sayılır. Digər tərəfdən, Azərbaycan həm də regionun siyasi cəhətdən də ən sabit ölkəsidir. Azərbaycanda demokratik prinsiplərə sadiqlik nümayiş etdirilir, aparılan siyasi islahatlar ölkəmizin demokratik inkişafının təminatında, vətəndaş cəmiyyətinin yüksək səviyyədə formalaşmasında böyük əhəmiyyət daşıyır.
Qeyd olunduğu kimi, bu gün Azərbaycanın iqtisadi imkanları artdıqca beynəlxalq mövqeləri də möhkəmlənir. Bu isə problemlərimizin həllində əsaslı rol oynayır. Prezident İlham Əliyev də bildirib ki, iqtisadi imkanlarımızın, regiondakı rolumuzun artması beynəlxalq mövqelərimizin möhkəmlənməsinə şərait yaradır: “Eyni zamanda, ölkədə iqtisadi və sosial məsələlər öz həllini tapmaqdadır. Son 7 il ərzində büdcə xərclərimiz 12 dəfə artmışdır. Maaşlar, pensiyalar dəfələrlə artmışdır. Bu gün Azərbaycan dinamik inkişaf edən, öz ehtiyaclarını özü ödəyən müasir ölkədir. Bizim siyasətimiz çox açıqdır, aydındır. Güclü iqtisadi təməl üzərində müasir siyasi sistemin formalaşdırılması, dövlətçiliyin əsaslarının möhkəmləndirilməsi, azərbaycançılıq ideologiyasının gücləndirilməsi məsələləri bizim üçün prioritet məsələlərdir. Bununla bərabər, ölkəmizin sosial-iqtisadi inkişafının davamı üçün konkret layihələr, konkret proqramlar icra edilir”.
Azərbaycandakı iqtisadi inkişafın əsasında isə sabitlik amili dayanır. ölkə başçısı bu məqamı xüsusi qeyd edib ki, bu gün Azərbaycan regionda sabitləşdirici amildir: “Bizim təşəbbüslər bir çox hallarda regionda həlledici rol oynayır. Regional məsələlərdə iştirakımız regional əməkdaşlığı daha da zənginləşdirir. Bu regional əməkdaşlığın hüdudları da genişləndirilir. Bizim irəli sürdüyümüz və icra etdiyimiz layihələr tərəfdaş dövlətləri də cəlb edir. Azərbaycan artıq çox etibarlı tərəfdaş kimi özünü dünyada təsdiq etmişdir”.
Bəli, bu gün Azərbaycan faktiki olaraq Cənubi Qafqaz regionunun təhlükəsizlik qarantına çevrilib. Əsası Ulu öndər Heydər Əliyev tərəfindən qoyulan və Prezident İlham Əliyevin uğurla davam etdirdiyi neft strategiyası ölkəmizin bu nailiyyətlərə imza atmasına şərait yaradıb. Bu, bir həqiqətdir ki, Azərbaycanın iştirakı olmadan bölgədə hər hansı böyükmiqyaslı layihələrin reallaşması mümkün deyil. İstər coğrafi-tranzit şəraiti baxımından, istərsə də karbohidrogen ehtiyatları Azərbaycanın regiondakı çəkisinin günü-gündən artmasına imkan verir. Bu gün Azərbaycan sözün əsl mənasında yerləşdiyi ərazidə lider ölkədir. Bu isə Prezident İlham Əliyevin yürütdüyü düzgün, davamlı və qətiyyətli siyasi kursun qanunauyğun nailiyyətidir.

Paylaş:

Baxılıb: 1160 dəfə