“İsraildə Azərbaycan Evi”ndə görüş...

Bakı:

15 °C

88 %

2 m/s

Əlaqə

AZ RU EN

Ana səhifə / MEDİA / “İsraildə Azərbaycan Evi”ndə görüş...

“İsraildə Azərbaycan Evi”ndə görüş...

02.05.2025 [08:35]

Bu gün dünyanın bir çox ölkəsində Azərbaycan evi fəaliyyət göstərir. 2019-cu ildən etibarən bir sıra xarici ölkələrdə yaradılan Azərbaycan evlərinin fəaliyyəti milli adət-ənənələrimizin, mədəniyyətimizin, dilimizin təbliği və qorunması, ölkəmizlə bağlı həqiqətlərin dünyaya çatdırılması istiqamətlərində dəyərləndirilə bilər. Hansı ki, qeyd edilən məsələlər inkişaf mərhələsindən və yaşadığı dövrdən asılı olmayaraq, bütün dövlətlər, xalqlar üçün hər zaman aktual və prioritetdir.

Tolerantlıq nümunəsi olan ölkəmizdə də hər zaman multikultural dəyərlərə və ənənələrə həssaslıqla, hörmətlə yanaşılıb. Azərbaycan, eyni zamanda, millətlərarası və dinlərarası münasibətlərin inkişaf etdirilməsi baxımından da nümunəvi ölkə kimi xarakterizə olunur. Azərbaycanın tarix boyu ev sahibliyi etdiyi xalqlar sırasında yəhudiləri xüsusilə vurğulamaq yerinə düşər.

Azərbaycanda anti-semitizm mövcud olmayıb...

Bu günlərdə İsrailin Azərbaycana yeni təyin olunmuş səfiri Ronen Kraus “İsraildə Azərbaycan Evi” diaspor qurumunun, ölkədəki Dağ Yəhudilərinin Koordinasiya Mərkəzinin və Akko Şəhər Dağ Yəhudiləri İcmasının qonağı olub. Görüşdə bir çox təşkilat və icma rəhbərləri iştirak edib. Azərbaycan və İsrail mədəni əlaqələrinin, hər iki xalq və dövlət arasındakı dostluq və müttəfiqlik münasibətlərinin möhkəmlənməsinə həsr edilmiş görüş dəyirmi masa formatında keçirilib.

Məclisi giriş sözü ilə açan “İsraildə Azərbaycan Evi”nin direktoru, Dağ Yəhudilərinin Koordinasiya Mərkəzinin rəhbəri, Akko Şəhər Dağ Yəhudiləri İcmasının sədri Nexamiya Şirin Mixaeli diaspor qurumunun necə ərsəyə gəlməsi və onun fəaliyyəti ilə bağlı məlumat verib. O, xalqlarımızın hələ min illər öncəyə söykənən dostluq və qardaşlıq münasibətlərindən söz açıb. İcma sədri bildirib ki, Azərbaycan dünyada yeganə ölkədir ki, heç bir zaman anti-semitizm mövcud olmayıb və burada yəhudilərlə bərabər bütün millətlər azad və xoşbəxt yaşayırlar.

Bütün inanclar azaddır!

Nexamiya Şirin Mixaeli, həmçinin qeyd edib ki, Azərbaycanda bütün inanclar azaddır: “Xüsusən Yəhudi xalqı ilə Azərbaycan xalqı min illərdir ki, qohumlaşmış və qardaşlaşmış xalqdır. Hər iki qardaş xalq ən çətin günlərdə bir-birinə dəstək olub və bu, əsrlərin sınağından çıxmış bir qardaşlıqdır. Bu gün Prezident İlham Əliyev Ulu Öndərin siyasi irsini layiqincə davam etdirərək bu dostluq və qardaşlığı daha da möhkəmləndirməkdədir. Qətiyyətlə demək olar ki, İlham Əliyev və onun rəhbərlik etdiyi Azərbaycan dövləti dünyada İsrailin ən etibarlı və ən yaxın dostu və müttəfiqidir. Bunu hər bir yəhudinin və hər bir İsraillinin dilindən eşitmək olar”.

Ali dəyərlərə sadiq tolerant ölkə

Səfir Ronen Kraus 2011-ci ildə Bakıda İsrail səfirliyində müşavir işlədiyi illəri məmnunluqla xatırlayaraq bildirib ki, Azərbaycan dünyada qonaqpərvər və ali dəyərlərə sadiq tolerant ölkədir. Burada hər xalq azad və xoşbəxt yaşayır. Səfir Azərbaycanla münasibətlərin önəmindən də söz açıb: “Bundan sonra da Azərbaycan və İsrail əlaqələri artan xətlə inkişaf edəcək”.

Azərbaycan tərəfindən bütün imkanlar yaradılıb!

Daha sonra Kiryat-Byalik şəhərindəki Dağ Yəhudiləri icmasının sədri Adil Danilov da Azərbaycandakı tolerantlıq barədə fikirlərini bölüşüb: “Azərbaycan dünyada İsraildən sonra yəhudilərin ən azad və təhlükəsiz yaşadığı ölkədir. Burada hər kəs inancını rahat ifadə edə bilir. Bunun üçün Azərbaycan dövləti tərəfindən bütün imkanlar yaradılıb. Tarix boyu hər iki xalq mehribanlıq şaitində, doğmalıq içərisində yaşayıblar. Bu, dünyada bənzəri olmayan haldır”.

Dəyirmi masa iştirakçıları bir daha Azərbaycan dövlətinə və xalqına öz sarsılmaz dəstəyini ifadə edərək, daim dost və qardaş Azərbaycan xalqının və dövlətinin yanında olduqlarını bildiriblər.

Göründüyü kimi, Azərbaycan dünya üçün nümunə olan bir ölkədir. Ölkəmizdəki tolerantlıq dəyərləri və multikultural yaşam ənənəsi sözün həqiqi mənasında dünyanın heç bir yerində rast gəlinməyən nadir bir nümunədir. Bütün bunlar isə ölkə başçısının parlaq və müdrik siyasətinin nəticəsidir.

Yeganə

Məqalə “Azərbaycan Respublikasının Medianın İnkişafı Agentliyi”nin maliyyə dəstəyi ilə “Dini və milli tolerantlıq, millətlərarası münasibətlərin inkişaf etdirilməsi” istiqaməti üzrə hazırlanmışdır.

Paylaş:

Baxılıb: 997 dəfə