İnformasiya müharibəsində atəşkəs yenə pozuldu

Bakı:

22 °C

94 %

5 m/s

Əlaqə

AZ RU EN

Ana səhifə / MEDİA / İnformasiya müharibəsində atəşkəs yenə pozuldu

İnformasiya müharibəsində atəşkəs yenə pozuldu

18.03.2022 [10:25]

MÜŞFİQƏ

Ötən əsrin mütəxəssisləri düşünürdülər ki, XXI əsrdə savaşların böyük bir hissəsini informasiya müharibələri təşkil edəcək. Görünən mənzərədən aydın olur ki, heç də yanılmayıblar. Artıq “üçüncü informasiya-psixoloji dünya müharibəsinin” getdiyini açıq-aşkar söyləyə bilərik. İnformasiya müharibəsi milli təhlükəsizliyin əsasını təşkil edir. Bu gün informasiya müharibəsi internet məkanında daha çox vüsət alıb. Onun silahı dağıdıcı silahlardan qətiyyən geridə qalmır. Nəticə etibarilə, indiki şəraitdə dövlətlər düşmənin informasiya sistemini dağıtmağa çalışırlar. İnformasiya müharibəsi sərhəd tanımaz deyiblər. Onun nə cəbhə xətti, nə minalanmış sahəsi var. İnformasiya müharibəsi gurultusuz, səssiz, bir sözlə, sükutun səsidir.

Sərhəd tanımayan informasiya müharibəsi

“Media və jurnalist savaşın tərkib hissəsi olmamalıdır. Jurnalistin işi həqiqəti yaymaqdan ibarətdir. Düşmən tərəfə zərbə vurmaq üçün faktların təhrif edilməsi, qeyri-dəqiq xəbərlərin yayılması yolverilməzdir. Beynəlxalq nəzəriyyə belə desə də, məsələ orasındadır ki, bu prinsipi elə onun qurucusu olan Qərb pozur. Yaxın illərdə istər İraq, istər Əfqanıstan, istərsə də digər ərazilərdə aparılan müharibə zamanı Qərb mediasının həmin o informasiya savaşına necə alət olduğunun şahidi olduq.

Bu fikirləri media eksperti Müşfiq Ələsgərli qəzetimizə açıqlaması zamanı deyib. Onun sözlərinə görə, Rusiya-Ukrayna qarşıdurması zamanı hər iki tərəfin mediası bu savaşın alətinə çevrildi: “Fikir plüralizminin olması, müxtəlif fikirlərin auditoriyaya çatdırılması medianın prinsipidir. Müharibə başlayan kimi Avropa İttifaqı (Aİ) Şurası Rusiyanın “Russia Today” (RT) və “Sputnik” telekanallarının Aİ daxilində yayımına qadağan qoydu. Söhbət Rusiyanın haqlı və ya haqsız tərəf olması deyil. Məsələ qarışıqdır. Bir tərəfdə təcavüz edən, digər tərəfdə təcavüzə məruz qalmış dövlət var. Təbii ki, təcavüz edənə qarşı müqavimət göstərmək lazımdır. Ancaq bunu bir millətə, dövlətə qarşı tətbiq edib, digərinə qarşı etməyəndə bu artıq ikili standartdır. Avropanın özünün yaratdığı prinsipləri pozması deməkdir. Media informasiya savaşına alət olmamalıdır deyənlərin özləri o prinsipi pozurlar. Təbii ki, bir ölkənin milli təhlükəsizliyindən söhbət gedirsə, bütün vətəndaşlar kimi media işçiləri də bu məsələdə öndə olmalı, öz ölkələrinin haqlı mövqeyini işıqlandırmalıdır”.

Yalnız döyüş meydanında deyil, informasiya müharibəsində də qələbə qazandıq

Məlum olduğu kimi, müstəqilliyinin bərpasının 30-cu ilini qeyd edən Azərbaycan ötən dövr ərzində informasiya savaşı, hibrid savaşlar, psixoloji savaşlarla üzləşib. Xüsusilə Qarabağ müharibəsi - Ermənistanın Azərbaycana qarşı həyata keçirdiyi işğalçılıq siyasəti məhz bu əsaslarla, psixoloji savaşla, hibrid savaşlarla müşayiət olunub. Dünyanın dezinformasiyanı hələ tam qavramadığı dövrdə Azərbaycan bu cür savaşlarla üz-üzə qalıb. Lakin 1990-cı illərin əvvəllərində Azərbaycan bu savaşa hazır deyildi. Ona görə də Ermənistan Azərbaycan torpaqlarını işğal etmişdi. Dünyada “erməni soyqırımı” adı altında təbliğat aparılırdı. Çətinliklərə baxmayaraq, həqiqəti dünyaya çatdırmağa nail olduq. Bu, xüsusilə Azərbaycanın Vətən müharibəsində bir daha özünü doğrultdu.

Azərbaycan Prezidenti dünya mediası ilə birbaşa təmas quraraq ölkəmizin apardığı strateji kommunikasiyada ön sırada oldu. 44 gün davam edən Vətən müharibəsi dövründə dövlətimizin başçısı dünyanın 30-dan çox aparıcı televiziyalarına və informasiya agentliklərinə saatlarla davam edən müsahibələr verdi. Məhz bunun sayəsində Azərbaycan yalnız döyüş meydanında deyil, informasiya müharibəsində də qələbə qazandı.

Müşfiq Ələsgərli vurğulayıb ki, Azərbaycanda aparılan müharibə dövründə həm media işçilər həm də sosial media istifadəçiləri rəqibin susdurulması üçün əllərindən gələni etdilər. Azərbaycan haqlı tərəf idi və torpaqlarının işğaldan azad olunması üçün mübarizə aparırdı. Nəticədə informasiya müharibəsində də Azərbaycan qalib gəlmiş oldu.

Məqalə “Azərbaycan Respublikasının Medianın İnkişafı Agentliyi”nin maliyyə dəstəyi ilə “Fikir, söz və məlumat azadlığının, plüralizmin inkişaf etdirilməsi” istiqaməti üzrə hazırlanmışdır

Paylaş:

Baxılıb: 1219 dəfə

Xəbər lenti

Hamısına bax