Xədicə İsmayılovanın əsl xisləti Azərbaycan cəmiyyətinə yaxşı məlumdur

Bakı:

23 °C

64 %

3 m/s

Əlaqə

AZ RU EN

Ana səhifə / Siyasət / Xədicə İsmayılovanın əsl xisləti Azərbaycan cəmiyyətinə yaxşı məlumdur

Xədicə İsmayılovanın əsl xisləti Azərbaycan cəmiyyətinə yaxşı məlumdur

11.08.2015 [10:06]

Bakı Ağır Cinayətlər Məhkəməsində Xədicə İsmayılovanın cinayət işi üzrə məhkəmə prosesi davam etdirilib
Dünən Bakı Ağır Cinayətlər Məhkəməsində hakim Ramella Allahverdiyevanın sədrliyi ilə Xədicə İsmayılovanın cinayət işi üzrə məhkəmə prosesi davam etdirilib. Məhkəmə prosesində zərərçəkənin və şahidlərin ifadəsi dinlənilib.
Bu məqamda xatırlatmaq yerinə düşər ki, Baş Prokurorluğun yaydığı məlumata görə, “Azadlıq” radiosu və “Meydan” TV teleradio şirkətində müxbir vəzifəsində işləmiş Tural Mustafayevin özünü öldürməyə cəhd etməsi faktına görə Səbail rayon Prokurorluğunda Cinayət Məcəlləsinin 125-ci (özünü öldürmə həddinə çatdırma) maddəsi ilə cinayət işi başlanıb.
T.Mustafayev Baş Prokurorluğa müraciət edərək, “Azadlıq” radiosunun Bakı ofisində jurnalist işləyən və onunla uzun müddət yaxın münasibətlərdə olmuş İsmayılova Xədicə Rövşən qızı tərəfindən ona qarşı təzyiq və təqiblər edilməsi, mütəmadi olaraq şərəf və ləyaqətinin alçaldıldığına görə özünü öldürmə həddinə çatdırılması ilə əlaqədar barəsində müvafiq tədbirlərin görülməsini istəyib. Səbail rayon Məhkəməsinin 5 dekabr 2014-cü il tarixli qərarı ilə X.İsmayılova barəsində 2 ay müddətinə həbs qətimkan tədbiri seçilib. Həmin müddət bir neçə dəfə uzadılıb. Daha sonra Xədicə İsmayılovaya qarşı yeni ittihamlar irəli sürülüb. O, Cinayət Məcəlləsinin 179.3.2-ci (mənimsəmə və israf etmə - külli miqdarda törədildikdə), 192.2.2-ci (qanunsuz sahibkarlıq), 213.1-ci (vergi ödəməkdən yayınma) və 308.2-ci (vəzifə səlahiyyətlərindən sui-istifadə) maddələri üzrə də təqsirləndirilir.
Ümumiyyətlə, X.İsmayılovanın əsl xisləti Azərbaycan cəmiyyətinə yaxşı məlumdur. Belə ki, o, öz “fəaliyyəti” ilə aşkar şəkildə başqa-başqa dövlətlərin maraqlarına xidmət etdiyini təsdiqləyib. X.İsmayılova Azərbaycanın qazandığı uğurları nəinki heç vaxt təqdir etməyib, əksinə, buna müxtəlif don geyindirməyə çalışıb və yalnız əsassız tənqidlərə üstünlük verib. Bütün bunlar isə onun siyasi sifarişlə çalışmasının göstəricisidir. Digər tərəfdən, X.İsmayılova və bu tip digər insanların Azərbaycanın uğurlarına qısqanc münasibəti təkcə siyasi müstəvidə məhdudlaşmır. Belə ki, hətta Azərbaycanın mədəni sahədə, elm və təhsilin inkişafında əldə etdiyi nailiyyətlər də bu insanlar tərəfindən fərqli istiqamətdə yozulur, özünəməxsus şəkildə “dəyərləndirilir”. Məsələn, Azərbaycanın “Eurovision” yarışmalarında uğur əldə etməsi, o cümlədən, bu yarışın 2012-ci ildə Bakıda keçirilməsi X.İsmayılovanı və onun xarici havadarlarını ciddi narahat etmişdi.
Bundan başqa, X.İsmayılova “Azadlıq” radiosunun Bakı bürosunun rəhbəri olarkən xeyli qanunsuzluqlara da yol verib. Lakin sonradan bu əməllərin üstü açılıb. Belə ki, Xədicə İsmayılovanın məlum əməllərinin coğrafiyası yalnız Azərbaycanla məhdudlaşmayıb, o, həmçinin, özünəxas “məharətlə” radionun baş ofisinə də kələk gəlib. Məlum olduğu kimi, hüquq-mühafizə orqanları Xədicə İsmayılovanın bir sıra iqtisadi xarakterli cinayət əməllərinə yol verdiyinin aşkarlayıb. Ona qarşı həm də vergidənyayınma ittihamı irəli sürülərək barəsində həbs qətimkan tədbiri seçilib. Araşdırma zamanı o da aydın olub ki, sonuncu yol verdiyi cinayətləri jurnalist “fəaliyyət”i ilə pərdələməyə çalışırmış. Ancaq Azərbaycan hüquqi dövlətdir və Xədicə İsmayılovanın peşə fəaliyyəti onun törətdiyi cinayətin məsuliyyətini sığortalaya bilmədi. Digər tərəfdən, Xədicə İsmayılovanın həbsi, həmçinin, radionun Azərbaycan xidmətini diqqət mərkəzinə gətirib. Belə ki, Xədicə İsmayılovanın hansı əməllərdən çıxdığını yaxşı bilən radionun Azərbaycan xidmətinin sabiq əməkdaşlarından biri burada yoxlamalar aparılması təşəbbüsü ilə çıxış edib. Sabiq əməkdaş şikayətində Bakı bürosunun keçmiş rəhbəri Xədicə İsmayılovanın işçilər arasında təfriqə yaratdığını, ayrı-seçkilik saldığını, kənar maliyyə qaynaqlarından radioya cəlb etdiyi vəsaitləri özünə yaxın çevrə arasında bölüşdürdüyünü bildirib. Şikayət əsasında aparılan yoxlamalar nəticəsində isə məlum maliyyə qalmaqalı üzə çıxıb. Hazırda isə X.İsmayılova ədalət məhkəməsi qarşısında cavab verməkdədir.
Nardar BAYRAMLI

Paylaş:

Baxılıb: 535 dəfə