Hüquqlarımızı müdafiə edənlər...

Bakı:

25 °C

65 %

12 m/s

Əlaqə

AZ RU EN

Ana səhifə / Sosial / Hüquqlarımızı müdafiə edənlər...

Hüquqlarımızı müdafiə edənlər...

28.12.2024 [08:58]

Azərbaycanda Vəkillərin peşə bayramıdır

İnsan hüquqlarının qorunması demokratik inkişafın başlıca meyarlarından biri sayılır. Qanunun aliliyi, müstəqillik, demokratizm, humanizm, ədalət, aşkarlıq və konfidensiallıq prinsipləri əsasında fəaliyyət göstərən peşə sahiblərindən biri də məhz vəkillərdir. Hüquq təkcə sadə vətəndaşlar üçün deyil, həm də qurumlar, dövlətlər üçündür.

Hər bir peşənin özünə görə əhəmiyyəti, müəyyən çətinliyi var. Lakin bütün peşələrin üzləşəcəyi hər hansısa qanunsuzluqda ədaləti təmin edə biləcək sahə məhz vəkillikdir. Bu şərəfli peşənin sahibləri öz işlərinə bağlı, dürüst və qanunun aliliyinə sadiq olmalıdırlar. Vəkil olmaq nə qədər çətin olsa da, bir o qədər qürurvericidir. Haqqı tapdalanan insanlar üçün ədaləti bərpa etmək məsuliyyətli və şərəflidir...

5 il öncə...

Yeri gəlmişkən, bu gün ölkəmizdə “Vəkillər günü”dür. Ölkəmizdə bu günün təsis edilməsi məsələsinə toxunmazdan əvvəl ötən tarixə qısa nəzər salaq. Şərqdə qadınlara seçki hüququ vermiş ilk ölkə olan Azərbaycanda 20-ci əsrdə ciddi problemlərlə üzləşmiş hüquq müdafiəçiləri 70 il ərzində sovetlər tərəfindən sərt nəzarət altına alınmış və yalnız 1991-ci ildə müstəqillik bərpa edildikdən sonra onlara sərbəstlik verilmişdi.

Heydər Əliyev tərəfindən 28 dekabr 1999-cu ildə “Vəkillər və vəkillik fəaliyyəti haqqında” qanun imzalanıb, Azərbaycan tarixində ilk dəfə vəkillik tam müstəqil, hakimiyyətin heç bir qolundan asılı olmayan bir təsisat olmuşdu. Həmin dövrdə qəbul olunmuş yeni prosessual qanunvericiliyə əsasən, vəkillik çəkişmə prinsipi çərçivəsində prosesin bərabərhüquqlu tərəfinə çevrilmişdi. Müstəqilliyin təməlini qoyan qanunun qəbulundan sonra isə ilk dəfə olaraq 3 noyabr 2004-cü ildə keçirilmiş təsis yığıncağı ilə Azərbaycan Respublikasının Vəkillər Kollegiyası təsis edilib.

“Azərbaycan Respublikasında vəkilliyin inkişafı ilə bağlı əlavə tədbirlər haqqında” Azərbaycan Respublikası Prezidentinin 22 fevral 2018-ci il tarixli sərəncamının preambulasında da qeyd edildiyi kimi, insan hüquq və azadlıqlarının etibarlı müdafiəsi və ədalət mühakiməsinin səmərəli fəaliyyəti üçün güclü və nüfuzlu vəkillik təsisatının böyük əhəmiyyəti var.

Prezident İlham Əliyevin 2019-cu il dekabrın 25-də imzaladığı “Vəkil günü” peşə bayramının təsis edilməsi haqqında sərəncamına əsasən isə hər il dekabrın 28-i ölkəmizdə “Vəkillər günü” kimi qeyd olunur. Şübhəsiz ki, bu, vəkillik institutuna dövlət başçısı tərəfindən verilən yüksək dəyərin bariz nümunəsidir. Qərar qəbul edildiyi gündən bu yana hər il haqq və hüquqlarımızın mühafizəçilərinin peşə bayramı xüsusi təntənə ilə qeyd edilir.

Azərbaycan post-sovet məkanında vəkillik institutuna müstəqillik verən ilk dövlətlərdən biridir. Ölkəmizdə vəkillik institutunun inkişafı və nüfuzunun artırılması istiqamətində bir sıra normativ-hüquqi aktlar, çoxsaylı sərəncamlar və digər sənədlər qəbul edilib. Heç bir dövlət qurumunun vəkillik fəaliyyətinin işinə müdaxilə edə bilmədiyi, qanunla da bu məsələnin həllini tapdığı, o cümlədən hazırda vəkillik fəaliyyətinin yeni dövrünü yaşayaraq inkişaf etdiyinin şahidi oluruq.

Vəkillərin daxil olduğu təşkilat...

Qeyd edək ki, Azərbaycan Respublikasının Vəkillər Kollegiyası qeyri-dövlət, müstəqil, özünüidarə edən və bütün vəkillərin daxil olduğu təşkilatdır. Vəkillər Kollegiyasının əsas vəzifəsi hər bir şəxsin hüquq və azadlıqlarının, qanunla qorunan mənafelərinin müdafiə edilməsindən, onlara peşəkar, yüksək keyfiyyətli, vicdanlı hüquqi yardım göstərilməsini təmin etməkdən, vəkillik peşəsinin nüfuzunu yüksəltməkdən ibarətdir.

Bütün vəkilləri peşə bayramı münasibətilə təbrik edir, ölkəmizdə hüquq və azadlıqların müdafiəsi kimi şərəfli fəaliyyətlərində uğurlar arzu edirik!

Yeganə BAYRAMOVA

Paylaş:

Baxılıb: 482 dəfə